PAGTAAS SA PRESYO—UNSAY IMONG MAHIMO?

Mahimong Kontento

Ang mga tawo nga kontento malipayon sa kon unsay naa nila. Ug dihang mausab ang ilang kahimtang, andam silang mo-adjust aron dili sila makagasto ug sobra sa ilang kita.

KON NGANONG IMPORTANTE NI

Ang psychologist nga si Jessica Koehler miingon nga ang mga tawo nga kontento mas positibo ug panglantaw sa kinabuhi. Namatikdan pod niya nga dili sila daling masina sa uban. Maong dili ikatingala nga ang mga tawo nga kontento sagad mas malipayon ug dili kaayo ma-stress. Gani, kadtong mga wala kaayoy kuwarta apil sa pinakamalipayong mga tawo sa kalibotan. Mao gyod nay gibati niadtong nagpokus sa makapalipayng mga butang nga dili mapalit ug kuwarta, sama sa paggahin ug panahon uban sa pamilya ug mga higala.

“Kon duna tay makaon ug masul-ob, kita magmakontento na niini.”—1 Timoteo 6:8.

ANG IMONG MAHIMO

Ayaw ikompara ang imong kaugalingon sa uban. Kon imong ikompara ang imong simpleng kinabuhi sa hayahay nga kinabuhi sa mga dato, basig dili na ka makontento o masina pa gani. Dugang pa, dili sa tanang panahon nga tinuod ang imong nakita, kay ang uban morag hayahay kaayo tan-awon pero sa tinuod naputos diay sa utang. Si Nicole, nga taga-Senegal, miingon: “Wala ko manginahanglag daghang materyal nga butang aron magmalipayon. Kon kontento ko, malipay ko bisag ang uban mas daghag nabatonan kay kanako.”

Sulayi ni: Likayi ang pagtan-aw ug mga advertisement o mga post sa social media nga nagpakita sa daghan kaayong materyal nga mga butang ug hayahay nga kinabuhi sa mga dato.

“Bisag dato ang usa ka tawo, ang iyang kabtangan dili makahatag niyag kinabuhi.”—Lucas 12:15.

Mahimong mapasalamaton. Ang mga tawo nga mapasalamaton mas kontento ug sagad dili mobati nga naa pay kulang nila. Dili pod sila maghunahuna nga angay silang makabaton ug dugang materyal nga mga butang. Si Roberton, nga taga-Haiti, miingon: “Hunahunaon gyod nako ang kaayo nga gihimo sa uban para nako ug sa akong pamilya. Dayon sultihan nako sila nga mapasalamaton kaayo ko sa ilang gihimo. Gitudloan pod nako ang akong otso anyos nga anak nga magpasalamat pirme kon naay manghatag niya.”

Sulayi ni: Kada adlaw, isulat ang mga butang nga mapasalamaton ka. Apil tingali ani ang maayong panglawas, malipayong pamilya, tinuod nga mga higala, o bisan ang nindot kaayo nga pagsalop sa adlaw.

“Kadtong malipayon ug kasingkasing pirmeng nagkombira.”—Proverbio 15:15.

Usahay, lisod gyod nga mahimong kontento sa kon unsa ray naa nato. Pero dili masayang ang atong mga paningkamot. Kon kontento ta, malipay ta. Ug kana nga kalipay dili gyod mabayran ug kuwarta.