Ang Maalamong mga Gabaonhon

DAGHAN sa mga siyudad sa Canaan karon nangandam sa pakiggubat batok sa Israel. Apan ang mga tawo sa silingan nga siyudad sa Gabaon nagtuo nga ang Diyos nagtabang sa mga Israelita. Dili sila buot makiggubat batok sa Diyos. Busa unsa ang ilang gibuhat?

Mihukom sila nga magpakaaron-ingnon nga layo kaayo ang ilang pinuy-anan. Ang pipila sa mga lalaki misul-ob gisiong mga sapot ug gubaong mga sandalyas. Gikargahan nila ang ilang mga asno sa gisiong mga sako ug mikuha sa pipila ka bahaw migahing tinapay. Unya nangadto sila kang Josue ug nag-ingon: ‘Gikan pa kami sa usa ka halayong yuta, tungod kay kami nakabati mahitungod sa tanang mga butang nga gibuhat sa inyong dakong Diyos nga Jehova alang kaninyo. Karon, kami ang inyong mga ulipon. Pakigsaad nga dili kamo makiggubat kanamo.’

Si Josue ug ang ubang mga pangulo nakakita sa ilang nagkagidlay nga mga sapot ug sa ilang nauga nga tinapay, ug sila mituo kanila. Busa sila misaad nga dili makiggubat batok kanila. Apan tulo ka adlaw sa ulahi, nahibaw-an nila nga ang mga Gabaonhon nagpuyo lamang sa duol.

‘Ngano man nga kamo nagsulti kanamo nga gikan kamo sa usa ka halayo nga yuta?’ nangutana si Josue.

Ang mga Gabaonhon mitubag: ‘Kami nakabati nga si Jehova ang inyong Diyos nagsaad sa paghatag sa tanan ning yuta sa Canaan ngadto kaninyo. Busa kami nangahadlok nga kamo magpatay kanamo.’ Apan ang mga Israelita wala magpatay kanila. Hinuon ilang gihimo sila nga ilang mga ulipon.

Ang hari sa Jerusalem nasuko sa gibuhat sa mga Gabaonhon. Busa misulti siya ngadto sa upat ka ubang mga hari: ‘Dali ug tabangi ako nga makiggubat sa Gabaon.’ Ug mao kana ang gibuhat sa lima ka hari. Ang mga Gabaonhon ba maalamon sa paghimog pakigdait uban sa Israel? Atong tan-awon.