Usa ka Tawong Dili Mahadlok

Tan-awa ang mga tawo nga nagyagayaga ning batan-ong lalaki. Nahibalo ka bag kinsa siya? Kini mao si Jeremias. Siya dako kaayong manalagna sa Diyos.

Si Jehova nagsulti kang Jeremias nga mahimong manalagna samtang si Josias hari pa gihapon. Si Jeremias naghunahuna nga siya batan-on pa kaayong mahimong usa ka manalagna, apan si Jehova nag-ingon nga Siya magtabang kaniya.

Si Jeremias misulti sa mga Israelita sa paghunong sa pagbuhat ug daotan. Apan daghan sa mga Israelita mipalabi sa pagsimba sa mga idolo kay sa pagsimba kang Jehova. Si Jeremias miingon nga ang Diyos magsilot kanila, apan ang katawhan nangatawa lamang kaniya.

Tapos si Josias namatay, ang iyang anak si Joacin nahimong hari. Si Jeremias nagpadayon sa pagpasidaan sa katawhan: ‘Ang Jerusalem pagalaglagon kon kamo dili mag-usab sa inyong daotang mga dalan.’ Ang mga saserdote nagsignit kang Jeremias ug misulti sa mga prinsipe: ‘Si Jeremias kinahanglang patyon, tungod kay siya nagsulti ug batok sa atong siyudad.’

Unsa may buhaton ni Jeremias karon? Wala siya mahadlok! Iyang gisultihan silang tanan: ‘Si Jehova nagsugo kanako sa pagsulti niining mga butanga kaninyo. Iyang laglagon ang Jerusalem kon kamo dili mohunong sa pagbuhat sa daotang mga butang.’

Ang mga prinsipe nagtugot kang Jeremias nga mabuhi, apan ang mga Israelita wala mohunong sa pagbuhat sa daotan. Sa ulahi, si Nabucodonosor, ang hari sa Babilonya, misulong ug nakig-away batok sa Jerusalem. Nabihag niya ang daghang mga Hudiyo nga mahimong iyang mga ulipon sa Babilonya. Palandonga lamang kon sama sa unsa ang pagkabihag gikan sa imong pinuy-anan ngadto sa usa ka langyawng yuta!