Si Jesus Miayo sa mga Masakiton

SAMTANG si Jesus nagpanaw libot sa yuta, iyang giayo ang mga masakiton. Daghan ang nakadungog bahin niini, ug gipanagdala nganha kaniya ang mga bakol, buta ug bungol, ug uban pa kinsa maoy masakiton. Ug si Jesus nag-ayo kanilang tanan.

Kapin sa tulo ka tuig na karon ang milabay sukad si Juan nagbawtismo kang Jesus. Ug si Jesus misulti sa iyang mga apostol nga sa dili madugay siya motungas sa Jerusalem diin siya pagapatyon, ug unya pagbuhion gikan sa patay.

Usa ka adlaw si Jesus nagpanudlo sa usa ka Igpapahulay. Ang Igpapahulay mao ang adlaw sa diskanso alang sa mga Hudiyo. Ang babaye nga imong makita dinhi nagmasakiton kaayo. Sulod sa 18 ka tuig, siya dili makatindog ug tul-id. Busa si Jesus nagpatong sa iyang mga kamot diha kaniya, ug siya nakatindog. Siya naayo!

Nasuko ang relihiyosong mga pangulo niini. Sila naghunahunang si Jesus mohimog panambal sa ubang adlaw, dili sa Igpapahulay.

Apan si Jesus misulti kanila: ‘Kamo daotang mga tawo. Si bisan kinsa kaninyo magpainom sa iyang asno sa Igpapahulay. Busa dili ba kining alaot babaye ayohon sa Igpapahulay?’

Sa ulahi, si Jesus ug ang iyang mga apostol mipaingon sa Jerusalem. Sa gawas lang sa lungsod sa Jerico, duha ka butang makalilimos nakabati sa iyang paglabay. Busa misinggit sila: ‘Jesus, tabangi kami!’

Gipangutana ni Jesus ang mga tawo unsay ilang gusto. Sila miingon: ‘Ginoo, ablihi ang among mga mata.’ Si Jesus mihikap sa ilang mata, ug diha dayon sila nakakita. Nahibalo ka ba ngano si Jesus mihimo ning tanang kahibulongang mga milagro? Tungod kay siya nahigugma sa katawhan ug nagtinguha nga sila makabatog pagtuo kaniya. Sa dihang siya magmando ingon nga Hari, wala nay masakit pa dinhi sa yuta.