Kon Unsaon Pagbadyet sa Kuwarta

Kita nagkinahanglag kuwarta aron masustentohan ang atong pamilya. (Proverbio 30:8) Ang tinuod, “ang salapi usa ka panalipod.” (Ecclesiastes 7:12) Ingong magtiayon, tingali lisod ang pagbadyet sa kuwarta, pero ayaw tugoti nga mahimo kining hinungdan sa inyong mga problema. (Efeso 4:32) Kinahanglan mong mosalig sa usag usa ug magtinabangay kon unsaon pagbadyet sa kuwarta.

1 PLANOHAG MAAYO

ANG GIINGON SA BIBLIYA: “Pananglitan usa kaninyo gusto magtukod ug tore. Dili ba siya molingkod una ug iyang banabanaon ang gasto ug tan-awon kon duna pa siyay igong salapi aron paghuman niini?” (Lucas 14:28, NCV) Importanteng planohon ninyong duha kon asa gamiton ang kuwarta. (Amos 3:3) Saboti kon unsay kinahanglang paliton ug kon pila ray inyong badyet. (Proverbio 31:16) Wala magpasabot nga kay duna moy kuwarta kinahanglan na gyod mong mamalit. Likayi nga mangutang. Ayawg lapas sa inyong badyet.—Proverbio 21:5; 22:7.

UNSAY IMONG MAHIMO?

• Kon sa kataposan sa bulan naa pa moy sobrang kuwarta, saboti kon unsay inyong himoon niana

• Kon mas dako mog nagasto kay sa inyong kinitaan, planoha kon unsaon pagpamenos sa inyong galastohan. Pananglitan, pagluto imbes mangaon sa restawran

2 MAGMATINUD-ANON UG MAGMAREALISTIKO

ANG GIINGON SA BIBLIYA: “Sulti nga matinud-anon sa usag usa.” (Zacarias 8:16) Isulti sa imong kapikas kon pila gyoy imong kinitaan ug nagasto.

Konsultaha pirme ang imong kapikas dihang mohimog dagkong desisyon bahin sa panalapi. (Proverbio 13:10) Ang pagpakigsabot bahin sa kuwarta makatabang nga magmalinawon ang inyong pamilya. Hunahunaa nga ang imong kinitaan dili nimo personal nga kuwarta, kondili sa pamilya.—1 Timoteo 5:8.

UNSAY IMONG MAHIMO?

• Saboti kon pilay puwedeng gastohon nga dili na kinahanglang ipananghid sa usag usa

• Ayaw hulata nga may problema na ayha pa hisgotan ang pagbadyet