-
Unsa ang Gingharian sa Diyos?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 31
Unsa ang Gingharian sa Diyos?
Ang pinakaimportanteng mensahe sa Bibliya mao ang bahin sa Gingharian sa Diyos. Kana nga Gingharian gamiton ni Jehova sa pagtuman sa iyang orihinal nga katuyoan para sa yuta. Unsa ang Gingharian? Giunsa nato pagkahibalo nga nagmando na ni karon? Unsa nay nahimo niini? Ug unsay himoon niini sa umaabot? Kini tubagon niini nga leksiyon ug sa mosunod nga duha ka leksiyon.
1. Unsa ang Gingharian sa Diyos, ug kinsay Hari niini?
Ang Gingharian maoy gobyerno nga gitukod ni Jehova nga Diyos. Ang Hari niini, si Jesu-Kristo, nagmando gikan sa langit. (Mateo 4:17; Juan 18:36) Bahin kang Jesus, ang Bibliya nag-ingon: “Siya magahari . . . hangtod sa hangtod.” (Lucas 1:32, 33) Ingong Hari sa Gingharian sa Diyos, si Jesus magmando sa tibuok yuta.
2. Kinsay kauban ni Jesus sa pagmando?
Si Jesus naay kauban sa pagmando. Naay mga tawo “gikan sa matag tribo ug pinulongan ug katawhan ug nasod . . . [nga] magmando ingong hari ibabaw sa yuta.” (Pinadayag 5:9, 10) Unsa ka daghan ang kauban sa Kristo sa pagmando? Sukad nga si Jesus mianhi sa yuta, minilyong Kristohanon ang nahimong iyang sumusunod. Sila bang tanan magmando uban kaniya? Dili, kay 144,000 lang ang moadto sa langit aron magmando kauban ni Jesus. (Basaha ang Pinadayag 14:1-4.) Ang tanang ubang Kristohanon sa yuta mahimong sakop sa Gingharian.—Salmo 37:29.
3. Nganong ang Gingharian sa Diyos mas maayo kay sa mga gobyerno sa tawo?
Bisan pag ang tawhanong mga magmamando maningkamot sa pagbuhat ug maayo, wala silay gahom sa pagbuhat sa tanan nilang gusto. Sa ulahi, pulihan sila sa ubang magmamando nga tingali wala maghunahuna sa kaayohan sa ilang mga sakop. Pero ang Magmamando sa Gingharian sa Diyos, si Jesus, dili gyod pulihan ug laing magmamando. Ang Diyos ‘nagtukod ug gingharian nga dili gayod malaglag.’ (Daniel 2:44) Si Jesus magmando sa tibuok yuta, ug dili siya magpaborpabor. Siya mahigugmaon, buotan, ug nahigugma sa hustisya, ug iyang tudloan ang mga tawo nga trataron ang usag usa uban ang gugma, pagkabuotan, ug hustisya.—Basaha ang Isaias 11:9.
TUN-IG DUGANG
Sayra kon nganong ang Gingharian sa Diyos mas maayo kay sa bisan unsang gobyerno sa tawo.
4. Ang tibuok yuta mandoan ug gamhanang gobyerno
Si Jesu-Kristo mas dakog awtoridad kay kang bisan kinsang magmamando. Basaha ang Mateo 28:18, ug dayon hisgoti kini nga pangutana:
Nganong makaingon ta nga mas labaw ang awtoridad ni Jesus kay sa bisan kinsang tawhanong magmamando?
Ang mga gobyerno sa tawo pirmeng mag-usab-usab, ug usa lang ka bahin sa yuta ang mandoan sa matag gobyerno. Pero komosta ang Gingharian sa Diyos? Basaha ang Daniel 7:14, ug dayon hisgoti kini nga mga pangutana:
Nganong maayo nga ang Gingharian sa Diyos “dili malaglag”?
Nganong maayo nga magmando kini sa tibuok yuta?
5. Ang gobyerno sa tawo kinahanglang pulihan
Nganong kinahanglang pulihan sa Gingharian sa Diyos ang mga gobyerno sa tawo? I-play ang VIDEO, ug dayon hisgoti ang mosunod nga pangutana:
Unsay resulta sa pagmando sa tawo?
Basaha ang Ecclesiastes 8:9, ug dayon hisgoti kini nga mga pangutana:
Para nimo, angay bang pulihan sa Gingharian sa Diyos ang mga gobyerno sa tawo? Ngano?
6. Ang mga magmamando sa Gingharian sa Diyos makasabot nato
Kay ang atong Hari, si Jesus, nagkinabuhi kaniadto ingong tawo, siya “makasabot sa atong mga kahuyangan.” (Hebreohanon 4:15) Ang 144,000 ka matinumanong lalaki ug babaye nga magmando kauban ni Jesus gipili ni Jehova “gikan sa matag tribo ug pinulongan ug katawhan ug nasod.”—Pinadayag 5:9.
Nalipay ba ka nga si Jesus ug ang tanan niyang kaubang magmamando nakasulay nga mabuhi ingong tawo? Ngano man?
Si Jehova nagpilig mga lalaki ug babaye nga lainlaig kagikan aron magmando kauban ni Jesus
7. Ang Gingharian sa Diyos mas maayog mga balaod
Ang mga gobyerno maghimog mga balaod nga para nila makahatag ug kaayohan ug proteksiyon sa ilang mga sakop. Ang Gingharian sa Diyos naa poy mga balaod nga kinahanglang sundon sa mga sakop niini. Basaha ang 1 Corinto 6:9-11, ug dayon hisgoti kini nga mga pangutana:
Unsa kahay kahimtang sa kalibotan kon ang tanan mosunod sa mga balaod sa Diyos?a
Rasonable ba nga dahomon ni Jehova nga sundon sa mga sakop sa Gingharian kini nga mga balaod? Ngano?
Unsay nagpakita nga kadtong wala magsunod niini nga mga balaod puwedeng magbag-o?—Tan-awa ang bersikulo 11.
Ang mga gobyerno maghimog mga balaod nga makahatag ug proteksiyon ug kaayohan sa ilang mga sakop. Ang Gingharian sa Diyos mas maayog mga balaod nga makahatag ug proteksiyon ug kaayohan sa mga sakop niini
KON NAAY MANGUTANA: “Unsa ang Gingharian sa Diyos?”
Unsay imong itubag?
SUMARYO
Ang Gingharian sa Diyos maoy tinuod nga gobyerno sa langit nga magmando sa tibuok yuta.
Review
Kinsa ang mga magmamando sa Gingharian sa Diyos?
Nganong ang Gingharian sa Diyos mas maayo kay sa bisan unsang gobyerno sa tawo?
Unsa ang pipila ka butang nga gidahom ni Jehova sa mga sakop sa Gingharian?
SUSIHA
Sayra kon unsay gitudlo ni Jesus bahin sa lokasyon sa Gingharian.
“Ang Gingharian sa Diyos ba Anaa Lang sa Imong Kasingkasing?” (Web article)
Nganong ang mga Saksi ni Jehova mopili nga magmaunongon sa Gingharian sa Diyos imbes sa gobyerno sa tawo?
Susiha kon unsay giingon sa Bibliya bahin sa 144,000 nga gipili ni Jehova nga magmando kauban ni Jesus.
Unsay nakakombinsir sa usa ka babayeng binilanggo nga ang Diyos lang ang makapatunghag hustisya sa kalibotan?
“Kon sa Unsang Paagi Natubag ang Akong Pangutana Bahin sa Inhustisya” (Pagmata!, Nobyembre 2011)
a Ang uban niini nga mga balaod hisgotan sa Seksiyon 3.
-
-
Ang Gingharian sa Diyos Nagmando na Karon!Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 32
Ang Gingharian sa Diyos Nagmando na Karon!
Ang Gingharian sa Diyos nagsugod pagmando sa langit niadtong 1914. Niana pong panahona nagsugod ang kataposang mga adlaw sa pagmando sa tawo. Giunsa nato pagkahibalo? Hisgotan nato ang tagna sa Bibliya, ang kahimtang sa kalibotan, ug ang batasan sa mga tawo sukad niadtong 1914.
1. Unsay gitagna sa Bibliya?
Gipakita sa Daniel, nga basahon sa Bibliya, nga ang Gingharian sa Diyos magsugod pagmando sa kataposan sa usa ka yugto nga gitawag ug “pito ka panahon.” (Daniel 4:16, 17) Gatosan ka tuig sa ulahi, kana nga yugto gitawag ni Jesus ug “gitakdang mga panahon sa kanasoran,” ug miingon siya nga wala pa na matapos. (Lucas 21:24) Ato unyang mahibaloan nga ang pito ka panahon natapos niadtong 1914.
2. Unsay kahimtang sa kalibotan ug batasan sa mga tawo sukad niadtong 1914?
Ang mga tinun-an ni Jesus nangutana kaniya: “Unsa man unyay ilhanan sa imong presensiya ug sa hinapos sa sistema sa mga butang?” (Mateo 24:3) Sa pagtubag, si Jesus nagtagna ug daghang butang nga mahitabo dihang magsugod na siyag mando sa langit ingong Hari sa Gingharian sa Diyos. Apil niini ang giyera, kanihit sa pagkaon, ug linog. (Basaha ang Mateo 24:7.) Gitagna pod sa Bibliya nga tungod sa batasan sa mga tawo sa “kataposang mga adlaw,” ang kinabuhi “lisod sagubangon.” (2 Timoteo 3:1-5) Kini nga kahimtang ug mga batasan mas klaro natong nakita sukad niadtong 1914.
3. Nganong ang kalibotan nahimong daotan kaayo sukad nagsugod pagmando ang Gingharian sa Diyos?
Wala madugay human si Jesus mahimong Hari sa Gingharian sa Diyos, siya nakiggubat kang Satanas ug sa mga demonyo didto sa langit. Si Satanas napildi. Ang Bibliya nag-ingon nga “siya gitambog sa yuta, ug ang iyang mga anghel gitambog uban kaniya.” (Pinadayag 12:9, 10, 12) Suko kaayo si Satanas kay nahibalo siya nga laglagon siya. Busa nagpahinabo siyag kasakit ug pag-antos sa tibuok yuta. Dili ikatingala nga ang kahimtang sa kalibotan daotan kaayo! Sulbaron sa Gingharian sa Diyos kining tanang problema.
TUN-IG DUGANG
Susiha kon unsaon nato pagkahibalo nga ang Gingharian nagsugod pagmando niadtong 1914 ug kon unsay angayng epekto niini kanato.
4. 1914—sumala sa kuwentada sa mga tagna sa Bibliya
Gipadamgo sa Diyos si Nabucodonosor, nga hari sa karaang Babilonya, kon unsay mahitabo sa umaabot. Kini nga damgo ug ang interpretasyon nga gihatag ni Daniel nagpakita nga nagtumong ni sa pagmando ni Nabucodonosor ug sa Gingharian sa Diyos.—Basaha ang Daniel 4:17.a
Basaha ang Daniel 4:20-26, ug dayon gamita ang chart sa pagtubag sa mosunod nga mga pangutana:
(A) Unsay nakita ni Nabucodonosor sa iyang damgo?—Tan-awa ang bersikulo 20 ug 21.
(B) Unsay mahitabo sa kahoy?—Tan-awa ang bersikulo 23.
(C) Unsay mahitabo sa kataposan sa “pito ka panahon”?—Tan-awa ang bersikulo 26.
Kon Unsay Koneksiyon sa Damgo Bahin sa Kahoy ug sa Gingharian sa Diyos
ANG TAGNA (Daniel 4:20-36)
Pagmando
(A) Habog kaayong kahoy
Pagmando giputol
(B) “Putla ang kahoy,” ug ‘palabya ang pito ka panahon’
Pagmando gibalik
(C) “Ang imong gingharian mabalik nimo”
Sa unang katumanan niini nga tagna . . .
(D) Kinsay girepresentahan sa kahoy?—Tan-awa ang bersikulo 22.
(E) Sa unsang paagi giputol ang iyang pagmando?—Basaha ang Daniel 4:29-33.
(F) Unsay nahitabo kang Nabucodonosor dihang natapos ang “pito ka panahon”?—Basaha ang Daniel 4:34-36.
UNANG KATUMANAN
Pagmando
(D) Si Nabucodonosor, nga Hari sa Babilonya
Pagmando giputol
(E) Human sa 606 B.C.E., si Nabucodonosor nawad-an ug maayong pangisip ug wala na makahimo sa pagmando sulod sa pito ka literal nga tuig
Pagmando gibalik
(F) Si Nabucodonosor naulian ug nagmando pag-usab
Sa ikaduhang katumanan niini nga tagna . . .
(G) Kinsay girepresentahan sa kahoy?—Basaha ang 1 Cronicas 29:23.
(H) Sa unsang paagi giputol ang ilang pagmando? Giunsa nato pagkahibalo nga wala pa ni mabalik dihang si Jesus nia sa yuta?—Basaha ang Lucas 21:24.
(I) Kanus-a ug asa gibalik kini nga pagmando?
IKADUHANG KATUMANAN
Pagmando
(G) Mga hari sa Israel nga nagrepresentar sa pagmando sa Diyos
Pagmando giputol
(H) Ang Jerusalem gilaglag mao nga wala nay hari sa Israel sulod sa 2,520 ka tuig
Pagmando gibalik
(I) Si Jesus nagsugod pagmando sa langit ingong Hari sa Gingharian sa Diyos
Unsa ka taas ang pito ka panahon?
Ang usa ka bahin sa Bibliya motabang natong masabtan ang ubang bahin niini. Pananglitan, ang basahon sa Bibliya nga Pinadayag nag-ingon nga ang katumbas sa tulo ka panahon ug tunga maoy 1,260 ka adlaw. (Pinadayag 12:6, 14) Ang pito ka panahon maoy doble niana, o 2,520 ka adlaw. Usahay, gamiton sa Bibliya ang termino nga adlaw nga magtumong sa tuig. (Ezequiel 4:6) Ang pananglitan niana mao ang pito ka panahon nga gihisgotan sa basahon sa Daniel, nga nagtumong sa 2,520 ka tuig.
5. Ang kalibotan nausab sukad niadtong 1914
Gitagna ni Jesus kon unsay kahimtang sa kalibotan dihang mahimo siyang Hari. Basaha ang Lucas 21:9-11, ug dayon hisgoti kini nga pangutana:
Asa niini nga mga kahimtang ang imong namatikdan o nabalitaan?
Gihisgotan ni apostol Pablo kon unsay batasan sa mga tawo sa kataposang mga adlaw sa tawhanong pagmando. Basaha ang 2 Timoteo 3:1-5, ug dayon hisgoti kini nga pangutana:
Asa niini nga mga batasan ang imong nakita sa mga tawo karon?
6. Ang pagmando sa Gingharian sa Diyos angayng magpalihok nato
Basaha ang Mateo 24:3, 14, ug dayon hisgoti kini nga mga pangutana:
Unsang importanteng buluhaton ang nagpakita nga ang Gingharian sa Diyos nagmando na karon?
Unsay imong himoon aron makaapil ka niini nga buluhaton?
Ang Gingharian sa Diyos nagmando na karon, ug hapit na ang adlaw nga magmando ni sa tibuok yuta. Basaha ang Hebreohanon 10:24, 25, ug dayon hisgoti kini nga pangutana:
Unsay angay natong himoon “samtang makita [nato] nga ang adlaw nagkaduol na”?
Kon naa kay nakat-onan nga makatabang ug makaluwas sa uban, unsay imong himoon?
KON NAAY MANGUTANA: “Nganong ang mga Saksi ni Jehova magsige mag hisgot ug 1914?”
Unsay imong isulti?
SUMARYO
Ang mga tagna sa Bibliya, kuwentada sa panahon, ug kahimtang sa kalibotan nagpamatuod nga ang Gingharian sa Diyos nagmando na karon. Ikapakita nato nga nagtuo ta niini pinaagi sa pagsangyaw bahin niini ug sa pagtambong sa mga tigom sa kongregasyon.
Review
Unsay nahitabo sa kataposan sa pito ka panahon nga gitagna sa basahong Daniel?
Unsay nakakombinsir nimo nga ang Gingharian sa Diyos nagsugod pagmando niadtong 1914?
Unsaon nimo pagpakita nga nagtuo ka nga ang Gingharian nagmando na karon?
SUSIHA
Sayra kon unsay giingon sa mga historyano ug sa uban pa bahin sa mga kausaban sa kalibotan sukad niadtong 1914.
“Sa Dihang Kalit nga Nadaot ang Moralidad” (Pagmata!, Abril 2007)
Basaha kon sa unsang paagi ang tagna diha sa Mateo 24:14 nakaapektar sa kinabuhi sa usa ka tawo.
“Ganahan Kaayo Kog Baseball!” (Ang Bantayanang Torre Num. 3 2017)
Giunsa nato pagkahibalo nga ang tagna nga narekord sa Daniel kapitulo 4 nagtumong sa Gingharian sa Diyos?
Unsay nagpakita nga ang “pito ka panahon” nga gihisgotan sa Daniel kapitulo 4 natapos niadtong 1914?
a Tan-awa ang kataposang duha ka artikulo sa Susiha nga seksiyon niini nga leksiyon.
-
-
Kon Unsay Himoon sa GingharianMabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 33
Kon Unsay Himoon sa Gingharian
Ang Gingharian sa Diyos nagmando na. Sa dili madugay, kini maghimog dagkong kausaban sa yuta. Atong hisgotan ang pipila sa maayong mga butang nga imong madahom ubos sa pagmando sa Gingharian.
1. Sa unsang paagi ipahinabo sa Gingharian sa Diyos ang kalinaw ug hustisya sa yuta?
Si Jesus, ang Hari sa Gingharian sa Diyos, maglaglag sa daotang mga tawo ug sa mga gobyerno sa gubat sa Armagedon. (Pinadayag 16:14, 16) Nianang panahona, matuman na gyod kini nga saad sa Bibliya: “Sa dili na madugay, ang daotan mawala na.” (Salmo 37:10) Pinaagi sa Gingharian, paneguroon ni Jesus nga naay kalinaw ug hustisya sa tibuok yuta.—Basaha ang Isaias 11:4.
2. Unsay kahimtang dihang matuman na ang kabubut-on sa Diyos dinhi sa yuta?
Ubos sa pagmando sa Gingharian sa Diyos, “ang mga matarong manag-iya sa yuta, ug sila magpuyo niini hangtod sa hangtod.” (Salmo 37:29) Imadyina ang panahon dihang ang tanang tawo sa tibuok kalibotan matarong ug nahigugma kang Jehova ug sa usag usa! Wala nay masakit, ug ang tanan mabuhi na hangtod sa hangtod.
3. Unsay himoon sa Gingharian sa Diyos human malaglag ang mga daotan?
Human malaglag ang mga daotan, si Jesus magmando ingong Hari sulod sa 1,000 ka tuig. Sulod nianang panahona, siya ug ang 144,000 nga kauban niyang magmamando motabang sa mga tawo sa yuta nga mahimong hingpit ug walay sala. Sa kataposan sa 1,000 ka tuig, ang tibuok yuta nindot na nga paraiso ug ang tanang tawo malipayon kay sila nagsunod sa mga balaod ni Jehova. Dayon ibalik ni Jesus ang pagmando ngadto sa iyang Amahan, si Jehova. Nianang panahona, bug-os nang ‘mabalaan ang ngalan’ ni Jehova. (Mateo 6:9, 10) Mapamatud-an na gyod nga si Jehova maayong Magmamando nga nagmahal sa iyang mga sakop. Dayon laglagon ni Jehova si Satanas, ang mga demonyo, ug ang uban pa nga mopili sa pagrebelde sa Iyang pagmando. (Pinadayag 20:7-10) Ang hingpit nga kahimtang nga ipahinabo sa Gingharian sa Diyos magpadayon hangtod sa hangtod.
TUN-IG DUGANG
Sayra kon nganong makasalig ta nga gamiton sa Diyos ang Gingharian sa pagtuman sa tanang saad sa Bibliya para sa umaabot.
4. Wagtangon sa Gingharian sa Diyos ang mga gobyerno sa tawo
“Ang tawo nagmando sa tawo alang sa iyang ikadaot.” (Ecclesiastes 8:9) Pinaagi sa Gingharian, wad-on ni Jehova ang mga epekto niini nga inhustisya.
Basaha ang Daniel 2:44 ug 2 Tesalonica 1:6-8, ug dayon hisgoti kini nga mga pangutana:
Unsay himoon ni Jehova ug sa iyang Anak, si Jesus, sa gobyerno sa mga tawo ug sa mga nagsuportar niini?
Base sa imong nakat-onan bahin kang Jehova ug Jesus, nganong makasalig ka nga ang ilang buhaton subay sa hustisya ug patas para sa tanan?
5. Si Jesus ang pinakamaayong Hari
Ingong Hari sa Gingharian sa Diyos, daghag himoon si Jesus para sa iyang mga sakop sa yuta. I-play ang VIDEO aron imong mahibaloan kon sa unsang paagi gipakita ni Jesus nga gusto niyang tabangan ang mga tawo ug nga gihatagan siya sa Diyos ug gahom sa paghimo niana.
Dihang nia si Jesus sa yuta, gipakita niya kon unsay himoon sa Gingharian. Sa mga panalangin nga nia dinhi, asa ani ang eksayted kaayo ka? Basaha ang mga teksto nga naghisgot sa maong mga panalangin.
DIHANG DINHI SI JESUS SA YUTA, IYANG . . .
GIKAN SA LANGIT, IYANG . . .
gikontrol ang mga puwersa sa kinaiyahan.—Marcos 4:36-41.
ayohon ang tanang kadaot nga gihimo dinhi sa yuta.—Isaias 35:1, 2.
gipakaon ang linibo pinaagig milagro.—Mateo 14:17-21.
wad-on ang kagutom sa tibuok kalibotan.—Salmo 72:16.
giayo ang daghang masakiton.—Lucas 18:35-43.
seguroon nga ang tanan dili na masakit.—Isaias 33:24.
gibanhaw ang pipila ka tawo.—Lucas 8:49-55.
banhawon ang mga patay ug wad-on ang kamatayon.—Pinadayag 21:3, 4.
6. Ipahinabo sa Gingharian sa Diyos ang nindot kaayo nga kaugmaon
Bug-os nga tumanon sa Gingharian ang orihinal nga katuyoan ni Jehova para sa mga tawo. Sila mabuhi hangtod sa hangtod sa paraisong yuta. I-play ang VIDEO aron imong makita kon sa unsang paagi gigamit ni Jehova ang iyang Anak, si Jesus, sa pagtuman sa Iyang katuyoan.
Basaha ang Salmo 145:16, ug dayon hisgoti kini nga pangutana:
Unsay imong gibati sa pagkahibalo nga “tagbawon [ni Jehova] ang tinguha sa tanang buhing linalang”?
ANG UBAN MOINGON: “Kon magtinabangay lang ta, masulbad nato ang mga problema sa kalibotan.”
Unsang mga problema ang sulbaron sa Gingharian sa Diyos nga dili masulbad sa mga gobyerno sa tawo?
SUMARYO
Himoon sa Gingharian ang gusto sa Diyos nga himoon niini. Ang tibuok yuta himoong paraiso nga punog maayong mga tawo nga magsimba kang Jehova hangtod sa hangtod.
Review
Sa unsang paagi balaanon sa Gingharian sa Diyos ang ngalan ni Jehova?
Nganong makasalig ta nga tumanon sa Gingharian sa Diyos ang mga saad sa Bibliya?
Sa mga himoon sa Gingharian, asa ana ang eksayted kaayo ka?
SUSIHA
Sayra kon unsa ang Armagedon.
Susiha ang mga hitabo panahon sa gitawag ni Jesus nga “dakong kasakitan.”—Mateo 24:21.
Tan-awa kon sa unsang paagi ang mga pamilya makapamalandong sa panahon nga mag-uban sila sa Paraiso.
Sa artikulong “Daghang Pangutana ang Naghasol sa Akong Hunahuna,” sayra kon sa unsang paagi nakita sa usa ka aktibista ang tubag sa iyang mga pangutana.
“Ang Bibliya Makabag-o sa Kinabuhi” (Ang Bantayanang Torre, Enero 1, 2012)
-