BEEROT

[Mga Atabay].

Usa sa upat ka Hivihanong mga siyudad nga sa pagkamaalamon mihimog usa ka pakigsaad kang Josue, ug mopatim-aw nga ang mga tawo sa siyudad sa Gabaon mao ang nanguna sa paghimo niini nga pakigsaad. (Jos 9:3-17) Human niadto ang siyudad gilakip sa panulondon sa tribo ni Benjamin. (Jos 18:​21, 25) Sa dihang gihubit nga gipatay sa mga tawo nga gikan sa Beerot si Is-boset nga anak nga lalaki ni Saul, giingon nga “ang Beerot, usab, giisip nga bahin sa Benjamin.” Lagmit nagpakita kini nga ang siyudad nahimutang duol sa utlanan sa silingan nga tribo, mao nga kinahanglang tinoon ang tribonhong teritoryo diin kini nahimutang. (2Sa 4:2-6) Gihisgotan ang pagkalagiw sa mga molupyo niini ngadto sa Gitaim, apan ang hinungdan wala ibutyag; lagmit tungod kini sa mga pagpanulong sa mga Filistehanon human sa ilang kadaogan batok sa kasundalohan ni Saul didto sa Bukid sa Gilboa, o tingali kini nga pagkalagiw nahitabo human sa pagpatay kang Is-boset aron sila makalikay sa panimalos tungod sa maong pagbuno. Apan, human sa pagkadestiyero didto sa Babilonya, ang mga tawo sa Beerot gitala nga lakip niadtong namalik sa yuta sa Juda.​—Esd 2:​1, 25; Neh 7:29.

Bisan tuod gituohan sa pipila nga kini mao ang Khirbet el Burj o Nabi Samwil dapit sa H, gituohan sa uban nga kini mao ang el Bira, usa ka silingang lungsod sa modernong Ramallah, nga nahimutang nga mga 14 km (9 mi) sa A sa Jerusalem ug mga 8 km (5 mi) sa AAS sa Gabaon, busa, duol sa utlanan sa Epraim. Usa ka tubod didto ang nagtaganag maayong abiyo sa tubig. Ang nahibiling mga bahin sa usa ka karaang abtanan didto nagpakitang kini maoy usa ka pahulayanan alang sa nagapanawng mga panon.