MAPAIT NGA MGA UTANON

[Heb., mero·rimʹ].

Lakip sa inasal nga nating karnero ug tinapay nga walay lebadura, ang mga Israelinhon mokaon usab ug mapait nga mga utanon o hilba sa gabii sa Paskuwa (Ex 12:8), ug kini nagpadayon nga mao ang kahikayan sa tanang umalabot nga mga pagsaulog sa Paskuwa. (Num 9:11) Wala hisgoti sa espesipiko kon unsang matanga kadto sa mapait nga mga utanon. Ang mapait nga mga utanon dayag nga nagpahinumdom sa mga Israelinhon sa mapait nga kasinatian nga ilang naagoman sa dihang naulipon sa Ehipto.

Ang samang Hebreohanon nga termino (mero·rimʹ) makaplagan sa Lamentaciones 3:15 ug kasagarang gihubad nga “kapaitan,” o “pait nga mga butang,” bisan tuod nga gituohan sa pipila nga ang “pait nga mga hilba (o mga utanon)” maoy haom nga hubad nga katumbas sa paghisgot sa ajenjo diha sa samang bersikulo.