KEDES

[Balaang Dapit].

1. Usa ka siyudad sa habagatang Juda (Jos 15:​21, 23), lagmit nga mao ra ang Kades-barnea.​—Tan-awa ang KADES, KADES-BARNEA.

2. Usa ka siyudad sa Neptali nga gihatag ngadto sa mga Gersonhon ug gilain ingong usa ka siyudad nga dalangpanan. (Jos 20:7; 21:​32, 33; 1Cr 6:​71, 76) Tungod sa nahimutangan niini, kini usab gitawag ug “Kedes-neptali” (Huk 4:6) ug “Kedes sa Galilea.” (Jos 20:7) Sanglit mopatim-awng kini ang pinuy-anan ni Maghuhukom Barak, ang Kedes nagsilbing dapit nga tagboanan sa iyang 10,000 ka tawo gikan sa Neptali ug Zabulon una pa sa ilang kadaogan batok sa Canaanhong kasundalohan ilalom ni Sisera. (Huk 4:​6, 10) Kasiglohan sa ulahi ang siyudad nabuntog ni Haring Tiglat-pileser III sa Asirya sa panahon sa pagmando ni Haring Peka sa Israel (mga 778-759 W.K.P.).​—2Ha 15:29.

Ang Kedes gituohan nga mao ang Tell Qades (Tel Qedesh), usa ka bungdo nga nag-umbaw sa usa ka gamay, tabunok nga patag nga mga 20 km (12 mi) sa HK sa Dan.

3. Usa ka dapit sa Isacar nga gipahat ngadto sa “mga anak nga lalaki ni Gersom” (1Cr 6:​71, 72), lagmit nga mao ra ang “Kision” nga gihisgotan sa samang talaan sa Josue 21:28. Ang Tell Abu Qedeis (Tel Qedesh), mga 4 km (2.5 mi) sa HS sa Megido, gituohan nga posibleng mao ang Kedes. Daw kini mohaom sa Josue 12:​21, 22, diin ang Kedes mopatim-aw nga kasikbit sa Megido ug Jokneam. Sanglit napildi ni Barak si Sisera diha sa dapit sa Megido (Huk 5:19), lagmit nga duol niini nga Kedes (ug dili sa Num. 2) nga gipatay ni Jael diha sa iyang tolda ang Canaanhong pangulo sa kasundalohan nga si Sisera.​—Huk 4:​11, 17, 21.