SESBAZAR

Usa ka tinudlo ni Haring Ciro nga mangulo sa unang mga destiyero nga namalik gikan sa Babilonya. Samtang siya nangulo sa mga Hudiyo sa pagbalik, gidala ni Sesbazar ang mga galamiton nga plata ug bulawan nga gikuha ni Nabucodonosor gikan sa templo. Sa pag-abot sa Jerusalem, gipahiluna niya ang mga patukoranan sa ikaduhang templo.​—Esd 1:7-11; 5:14-16.

Ang opinyon medyo nabahin kon si Sesbazar mao ba si Gobernador Zorobabel o siya ba usa ka laing indibiduwal. Si Senazar nga anak nga lalaki ni Haring Jehoiakin nga gihisgotan sa 1 Cronicas 3:18 maoy gituohan sa pipila tungod kay kaamgid ang duha ka ngalan, ingon man ang titulo ni Sesbazar nga “prinsipe sa Juda” nga mabasa sa pipila ka bersiyon sa Esdras 1:8. (AS, RS) Apan kini nga teoriya huyang kaayo tungod kay ang kaamgiran sa mga ngalan dili ra kaayo dako, ug si Zorobabel, nga usa ka apo ni Jehoiakin, may katungod usab sa pag-angkon sa maong titulo nga “prinsipe [“pangulo,” NW] sa Juda” ingong usa ka kaliwat sa unang henerasyon.

Ang pipila ka modernong mga eskolar, tungod sa tinguhang ipaila si Sesbazar ug Zorobabel ingong magkalahing mga indibiduwal, nag-ingon nga si Ciro unang nagtudlo kang Sesbazar ingong gobernador apan sa ulahi si Sesbazar gipulihan ni Zorobabel sa panahon sa paghari ni Dario, ug busa ang pagtukod sa templo gipasidungog kang Zorobabel.

Apan mopatim-aw nga posible gayod nga si Sesbazar mao ra si Zorobabel, ug ang kadaghanan sa mga eskolar ug mga reperensiya nagpunting usab niini. Matikdi kining mga puntoha ingong pagtandi: Sa katibuk-an, kon unsay giingon nga gibuhat ni Sesbazar diha sa duha ka asoy diin siya gihisgotan ikaingong mao usab ang gibuhat ni Zorobabel diha sa ubang mga asoy. Ang duha gitawag sa titulo nga “gobernador.” (Esd 1:11; 2:​1, 2; 5:​2, 14, 16; Hag 1:​1, 14; 2:​2, 21; Zac 4:9) Si Zorobabel giila ingong pangulo sa namalik nga mga destiyero; ang ngalan nga “Sesbazar” dili gani makita niini nga talaan.​—Esd 2:2; 3:​1, 2.

Ang ngalan nga Sesbazar lagmit usa ka opisyal o Babilonyanhon nga ngalan nga gihatag kang Zorobabel, sama kang Daniel ug sa uban pa nga gihatagan ug opisyal nga mga ngalan sa palasyo. (Dan 1:7) Mopatim-aw nga ang “Sesbazar” mas Caldeanhon nga ngalan kay sa “Zorobabel.” Sa Esdras 5:14-16 dihay gikutlo nga usa ka opisyal nga sulat, ug sa Esdras kapitulo 1 gikutlo na nga dihay gipakanaog nga opisyal nga mando ni Ciro, ug lagmit kini maoy hinungdan nga gigamit ang maong posibleng opisyal nga ngalan niini nga mga asoy.