DAGAMI, PINUTLAN SA TRIGO

Sa pagkagamit sa Bibliya, ang dagami o pinutlan sa trigo mopatim-awng nagtumong sa nahibiling mga lindog sa mga lugas nga nagbarog diha sa uma human sa pag-ani. Ang dagami o pinutlan sa trigo mao ang gisugo nga kuhaon sa mga Israelinhon sa dihang ang Paraon sa Ehipto wala na maghatag kanila sa regular nga suplay sa uhot alang sa paghimog mga tisa.​—Ex 5:10-12.

Ang dagami kanunayng gihisgotan diha sa masambingayong mga kahimtang, ug gigamit kini nga mga paglarawan tungod kay kini gaan ug huyang (Job 13:25; 41:​1, 28, 29), daling padparon sa hangin (Isa 40:24; 41:2; Jer 13:24), ug daling modilaab ug mopitipiti kon masunog (Isa 5:24; Joe 2:5; Abd 18; Nah 1:10). Ang mga daotan, ang mga kaaway ni Jehova, maingon man ang daotang mga laraw nga tinong mapakyas, gitandi sa dagami. (Ex 15:7; Sal 83:13; Mal 4:1; Isa 33:11) Si apostol Pablo, sa paghisgot bahin sa Kristohanong buluhaton nga pagpanukod, nagtala sa dagami ingong materyales nga kinaubsan ug bili, usa nga dili makabarog sa pagsulay pinaagi sa kalayo.​—1Co 3:​12, 13.