Ang Pagpangita sa mga Tubag

“Kay nasayod na ‘kon sa unsang paagi’ mabuhi ug nakabaton na sa mga luho sa kinabuhi nga lisod mabatonan kaniadto—sama sa air condition ug dekalidad nga CD player, ug uban pa—kita maghunahuna ‘kon nganong’ kita nabuhi. Nganong mangamas pa man pag-ayo aron moasenso? Unsa may kapuslanan niini?” —David G. Myers, propesor sa sikolohiya sa Hope College, Holland, Michigan, U.S.A.

UNSAY imong tubag sa mga pangutana nga gisukna niini nga propesor? Ang uban maghunahuna tingali kon angay pa bang pangitaon ang tubag niana. Apan, kon dili nimo tagdon ang maong mga pangutana sama ra nga wala nimo panumbalinga ang gamayng bato nga nasulod sa imong sapatos—makapadayon tuod ka sa paglakaw, apan dili ka komportable.

Kon naghunahuna ka nga ang kinabuhi aduna gayoy katuyoan, wala ka mag-inusara. Ang World Values Survey, nga usa sa kinadak-ang panukiduki nga gihimo bahin sa mga prinsipyo sa tawo, nag-ingon nga sa daghang nasod nagkadaghan ang mga tawo nga naghunahuna bahin sa “kahulogan ug katuyoan sa kinabuhi.”

Kon gusto nimong makabaton ug tinuod nga kalinaw sa hunahuna, kinahanglang masayran nimo ang tubag sa tulo ka hinungdanong mga pangutana.

Diin kita gikan?

Unsay katuyoan sa kinabuhi?

Unsay anaa sa umaabot?

Asa ka man makakaplag ug kasaligang mga tubag niining hinungdanong mga pangutana? Ang mga tubag nga ipakita sa mosunod nga mga panid gibase, dili sa kaugalingong opinyon o sa pilosopiya sa tawo, kondili sa Pulong sa Diyos, ang Bibliya. Giawhag ka namo nga buksan ang imong Bibliya ug susihon mismo kon unsay gisulti niana.