Among mga Magbabasa Nangutana
Nganong Dili Moapil sa Gubat ang mga Saksi ni Jehova?
Latas sa kasaysayan, ang mga Saksi sa tanang dapit dili gayod makigbahin sa tanang matang sa gubat. “Ang mga Saksi ni Jehova neyutral gayod panahon sa gubat,” miingon ang Australian Encyclopædia 50 ka tuig na ang milabay.
Ang pangunang rason kon nganong ang mga Saksi dili makigbahin sa maong mga panagbangi maoy tungod kay supak kana sa ilang tanlag ingong mga Kristohanon. Ang ilang tanlag nabansay sa mga sugo ug panig-ingnan ni Jesu-Kristo. Iyang giawhag ang iyang mga sumusunod sa paghigugma sa ilang silingan. Siya usab nagsugo kanila: “Magpadayon sa paghigugma sa inyong mga kaaway, sa pagbuhat ug maayo niadtong nagadumot kaninyo.” (Lucas 6:27; Mateo 22:39) Sa dihang usa sa iyang mga apostoles milanit ug espada aron sa pagpanalipod kaniya, si Jesus miingon: “Ibalik ang imong espada sa sakoban niini, kay ang tanang mogamit sa espada mamatay pinaagi sa espada.” (Mateo 26:52) Busa sa pulong ug sa buhat, gipakita ni Jesus nga ang iyang mga sumusunod dili gayod mogamit ug hinagiban aron sa pagpakiggubat.
Ang laing rason kon nganong dili moapil sa gubat ang mga Saksi maoy tungod sa ilang tibuok-kalibotang panag-igsoonay. Kon moapil sila sa gubat, mahimong mapatay nila ang ilang igsoon ug masupak nila ang sugo ni Jesus nga maghigugmaay sa usag usa.—Juan 13:35.
Para sa mga Saksi, ang maong prinsipyo sa gugma kinahanglang ipadapat gayod. Pananglitan, tagda ang ilang baroganan panahon sa Gubat sa Kalibotan II, sa 1939-1945. Sa Amerika, kapin sa 4,300 ka Saksi ni Jehova ang gibalhog sa prisohan tungod kay dili sila magsundalo. Sa Britanya, kapin sa 1,500 ang nabilanggo tungod kay sila dili mosuportar sa gubat, ug kapin sa 300 niana maoy mga babaye. Sa Nazi Alemanya, kapin sa 270 kanila ang gipatay sa Gobyerno tungod kay dili sila mobakyaw ug armas. Ilalom sa pagmando sa Nazi, kapin sa 10,000 ka Saksi ang gibalhog sa mga bilanggoan ug mga kampo sa pinugos nga pagtrabaho. Grabe usab ang naagoman sa mga Saksi sa Japan. Busa, si bisan kinsa nga namatyag minahal sa kinabuhi sa Gubat sa Kalibotan II—o sa misunod nga mga gubat—makaseguro gayod nga walay Saksi ni Jehova ang responsable niana.
Ang baroganan sa mga Saksi ni Jehova madayag gayod diha sa mga pulong ni Wolfgang Kusserow una pa sa iyang kamatayon. Sa 1942, gipunggotan sa mga Nazi kining 20 anyos nga Aleman tungod kay wala siya magsundalo. (Isaias 2:4) Siya miingon didto sa hukmanan sa mga sundalo: “Gipadako ako nga usa ka Saksi ni Jehova, sumala sa pulong sa Diyos diha sa Balaang Kasulatan. Ang labing bililhon ug labing balaang balaod nga iyang gihatag sa mga tawo mao: ‘Higugmaon mo ang Diyos labaw sa tanan ug ang imong silingan sama sa imong kaugalingon.’ Ang ubang sugo nag-ingon: ‘Ayaw pagpatay.’ Gipasulat ba kini sa atong Maglalalang aron tumanon sa mga kahoy?”—Marcos 12:29-31; Exodo 20:13.
Ang mga Saksi ni Jehova nagtuo nga si Jehova lamang, nga labing gamhanang Diyos, ang makahatag ug dumalayong kalinaw sa yuta. Sila may pagsalig nga tumanon sa Diyos ang iyang saad nga ‘pahunongon ang mga gubat hangtod sa kinatumyan sa yuta.’—Salmo 46:9.