Among mga Magbabasa Nangutana
Ang Diyos ba Magkuhag mga Bata Aron Himoong mga Anghel sa Langit?
Sa dihang mamatay ang usa ka bata, ang mga higala sa namatyan sagad mohupay kanila sa pag-ingon, “Nanginahanglan pa ang Diyos ug dugang pang mga anghel sa langit.” Motuo ka ba niana?
Kon tinuod nga ang Diyos magkuhag mga bata aron himoong mga anghel sa langit, kana magpasabot nga ang Diyos walay pagbati o mangtas. Apan, sukwahi niana ang giingon sa Bibliya. (Job 34:10) Ang usa ka maluluy-ong amahan dili gayod mokuha sa anak sa laing tawo aron lamang modaghan ang membro sa iyang pamilya.
Si Jehova labaw pang maluluy-on kay ni bisan kinsang ginikanan. Ang iyang naglabaw nga hiyas mao ang gugma. (1 Juan 4:8) Tungod sa iyang dakong gugma, dili gayod siya makahimo nianang daotang buhat.
Pangutan-a ang imong kaugalingon, ‘Nanginahanglan ba ang Diyos ug dugang pang mga anghel sa langit?’ Ang Bibliya nag-ingon nga ang tanang buhat sa Diyos maayo ug hingpit. (Deuteronomio 32:4) Gilalang niya ang minilyong mga anghel nga kompleto ang gidaghanon, ug wala nay kulang. (Daniel 7:10) Wala kaha masayop ang Diyos sa pagkalkulo sa gidaghanon sa mga anghel nga iyang gikinahanglan? Wala gayod! Ang Labing Gamhanang Diyos dili gayod masayop. Tinuod, si Jehova mipilig mga tawo nga mahimong espiritung mga persona aron makauban ni Jesu-Kristo sa pagmando didto sa langit, apan sila dili mga bata sa dihang sila namatay.—Pinadayag 5:9, 10.
Dili usab uyon sa orihinal nga katuyoan sa Diyos nga ang mga bata kuhaon dinhi sa yuta aron himoong mga anghel sa langit. Sa tanaman sa Eden, ang Diyos miingon kang Adan ug Eva: “Magmabungahon ug magdaghan kamo ug pun-a ang yuta ug gamhi kini.” (Genesis 1:28) Ang mga bata maoy gasa gikan sa Diyos, ug maoy iyang katuyoan nga makabatog mga anak ang mga tawo aron pun-on ang yuta sa matarong nga mga tawo. Dili gayod katuyoan sa Diyos nga mamatay ang mga bata aron mahimong mga anghel. Ang Bibliya tin-awng nag-ingon nga ang mga bata maoy “panulondon gikan ni Jehova.” (Salmo 127:3) Bawion ba ni Jehova, nga Diyos sa gugma, ang regalo nga iyang gihatag sa mga ginikanan? Dili gayod!
Grabeng kaguol ug kasakit ang bation sa mga ginikanan kon mamatyan silag anak. Apan, unsay malaoman sa nagbangotang mga ginikanan? Ang Bibliya nagsaad nga banhawon sa Diyos ang minilyon sa paraiso dinhi sa yuta. Handurawa ang mga bata nga mahibalik na sa ilang himsog nga panglawas, ug makauban pag-usab ang ilang mga minahal sa kinabuhi. (Juan 5:28, 29) Kabubut-on gayod sa Diyos nga ang mga bata managko, makapahimulos sa kinabuhi, ug makakat-on bahin kaniya ug sa iyang katuyoan dinhi sa yuta. Busa, ang mga bata nga nangamatay wala mahimong mga anghel sa langit, kondili sila naghulat nga banhawon sa paraisong yuta. Sa maong panahon, ang mga batan-on ug mga tigulang magkalipay sa pagsimba kang Jehova nga Diyos sa walay kataposan ubos sa mahigugmaong pag-atiman sa atong Maglalalang.