Unsay sinugdanan niining tinumotumong pagtulon-an?

“Ang unang Kristohanong mga pilosopo nagsagop sa Gregong ideya bahin sa pagkadili-mamatay sa kalag ug nagtuo nga ang kalag gilalang sa Diyos ug gibutang sa lawas panahon sa pagsamkon.”—The New Encyclopædia Britannica (1988), Tomo 11, panid 25.

Unsay giingon sa Bibliya?

“Ang kalag nga makasala maoy mamatay.”—Ezequiel 18:4, Ang Biblia—Bag-ong Hubad Nga Binisaya.

Bahin sa paglalang sa unang tawhanong kalag, ang Bibliya nag-ingon: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag [Hebreohanon, neʹphesh].”—Genesis 2:7.

Ang Hebreohanong pulong neʹphesh, nga gihubad ug “kalag,” nagpasabot nga ‘usa ka linalang nga nagginhawa.’ Sa paglalang sa unang tawong si Adan, ang Diyos wala magbutang kaniya ug dili-mamatay nga kalag, hinunoa Iyang gibutangan siya ug puwersa sa kinabuhi nga mamentinar pinaagig pagginhawa. Busa, sumala sa Bibliya, ang “kalag” nagtumong sa buhing linalang. Kon mawala ang puwersa sa kinabuhi nga gihatag sa Diyos sa sinugdan, ang kalag mamatay.—Genesis 3:19; Ezequiel 18:20.

Ang doktrina nga dili mamatay ang kalag nagpatunghag mga pangutana: Asa paingon ang kalag inigkamatay? Unsay mahitabo sa kalag sa mga daotan? Ang pagsagop sa nag-angkong mga Kristohanon sa pagtulon-an nga ang kalag dili mamatay miresulta sa ilang pagsagop sa laing tinumotumong pagtulon-an—ang doktrina sa impiyerno.

Itandi ang mosunod nga mga teksto sa Bibliya: Ecclesiastes 3:19; Mateo 10:28; Buhat 3:23

Unsay sinugdanan niining tinumotumong pagtulon-an?

“Sa tanang karaang Gregong mga pilosopo, si Plato ang nakaimpluwensiyag dako sa pagtulon-an bahin sa Impiyerno.”—Histoire des enfers (Ang Kasaysayan sa Impiyerno), sinulat ni Georges Minois, panid 50.

“Sukad sa tungatunga sa ika-2 nga siglo AD ang mga Kristohanon nga nakakat-on ug Gregong pilosopiya mibati nga kinahanglan nilang ipahayag ang ilang pagtuo subay sa panghunahuna sa mga pilosopo . . . Ang pilosopiya nga labaw nilang naangayan mao ang mga pagtulon-an ni Plato.”—The New Encyclopædia Britannica (1988), Tomo 25, panid 890.

“Ang pagtulon-an sa Simbahan nagpaluyo sa pagtulon-an bahin sa paglungtad sa impiyerno ug sa pagkawalay-kataposan niini. Sa pagkamatay, ang mga kalag sa mga nangamatay nga may mortal nga sala moadto dayon sa impiyerno, diin didto mag-antos sila sa mga silot sa impiyerno, ang ‘kalayo nga walay pagkapalong.’ Ang pangunang silot sa impiyerno mao ang walay-kataposang pagkanahimulag gikan sa Diyos.”—Catechism of the Catholic Church, 1994 nga edisyon, panid 270.

Unsay giingon sa Bibliya?

“Kay ang mga buhi nahibalo nga sila mamatay, apan ang mga patay walay nahibaloan, . . . kay walay buluhaton o hunahuna o kahibalo o kaalam sa Sheol, nga imong pagaadtoan.”—Ecclesiastes 9:5, 10, Revised Standard Version.

Ang Hebreohanong pulong nga Sheol, nga nagtumong sa “nahimutangan sa mga patay,” gihubad ug “impiyerno” diha sa pipila ka bersiyon sa Bibliya. Unsay gipadayag sa maong teksto bahin sa kahimtang sa patay? Nag-antos ba sila sa Sheol aron makabayad sa ilang mga sala? Wala, kay sila “walay nahibaloan.” Kanay hinungdan nga sa nag-antos sa labihan ang patriarkang si Job tungod sa usa ka grabeng sakit, siya nangaliyupo sa Diyos: “Panalipdi ako sa impiyerno [Hebreohanon, Sheol].” (Job 14:13; Douay-Rheims Version) May kapuslanan kaha ang iyang hangyo kon ang Sheol usa pa ka dapit sa walay-kataposang pagsakit? Sumala sa Bibliya, ang impiyerno mao ang komong lubnganan sa katawhan, diin wala nay bisan unsang buluhaton.

Dili ba ang maong kahulogan sa impiyerno mas makataronganon ug nahiuyon sa Kasulatan? Duna bay sala nga tungod niana ang Diyos sa gugma magpaantos sa usa ka tawo sa walay kataposan? (1 Juan 4:8) Kon ang impiyerno maoy tinumotumong pagtulon-an, nagpasabot ba kini nga tinumotumo usab ang pagtulon-an nga ang tanang maayong tawo moadto sa langit?

Itandi ang mosunod nga mga teksto sa Bibliya: Salmo 146:3, 4; Buhat 2:25-27; Roma 6:7, 23

Unsay sinugdanan niining tinumotumong pagtulon-an?

“Kon tukion pag-ayo, mopatim-aw nga ang doktrina sa Trinidad gimugna lamang sa hinapos nga bahin sa ika-4 nga siglo. Sa usa ka diwa kini husto . . . Sa wala pa matapos ang ika-4 nga siglo, ang pagtulon-ang ‘usa ka Diyos nga may tulo ka Persona’ dili pa establisado ug wala bug-os masabti ug tuohi sa mga Kristohanon.”—New Catholic Encyclopedia (1967), Tomo 14, panid 299.

“Ang Konsilyo sa Nicaea nagtigom niadtong Mayo 20, 325 [C.E.]. Si Constantino ang nagdumala ug aktibong naggiya sa mga panaghisgot, ug personal nga nagsugyot sa . . . hinungdanong pagtulon-an nga nagpahayag sa relasyon ni Kristo ug sa Diyos diha sa kredo nga giluwatan sa konsilyo, ‘nga siya usa rag kinaiyahan sa Amahan.’ . . . Ang tanang obispo, gawas lang sa duha, mipirma sa kredo tungod kay sila nahadlok sa emperador bisan pag daghan kanila ang supak niadto.”—Encyclopædia Britannica (1970), Tomo 6, panid 386.

Unsay giingon sa Bibliya?

“Si Esteban nga puno sa Espiritu Santo, mihangad sa langit ug nakita niya ang himaya sa Dios ug si Jesus nga nagtindog sa tuo sa Dios! Miingon siya, ‘Tan-awa, nakita ko ang langit nga naabli ug ang Anak sa Tawo nga nagtindog sa tuo sa Dios!’”—Buhat 7:55, 56, Ang Bag-ong Maayong Balita Biblia.

Unsay gipadayag sa maong panan-awon? Kay napuno sa aktibong puwersa sa Diyos, si Esteban nakakita kang Jesus nga “nagtindog sa tuo sa Dios.” Nan, tin-aw nga si Jesus wala mahimong Diyos human sa iyang pagkabanhaw ngadto sa langit, hinunoa, siya usa ka lahi nga espiritung persona. Walay gihisgotan nga ikatulong persona nga tapad sa Diyos sa maong asoy. Bisan pa sa paningkamot nga makakitag mga teksto nga magsuportar sa doktrina sa Trinidad, ang Dominican nga paring si Marie-Émile Boismard misulat diha sa iyang librong À l’aube du christianisme—La naissance des dogmes (Sinugdanan sa Kristiyanidad—Pagkamugna sa mga Doktrina): “Ang pamulong nga adunay tulo ka persona diha sa usa ka Diyos . . . dili mabasa bisan diin sa Bag-ong Tugon.”

Ang doktrina nga gipasiugda ni Constantino gilaraw sa pagtapos sa panagbangi sulod sa Simbahan sa ikaupat nga siglo. Apan kadto nagpatungha gayod ug laing isyu: Si Maria ba, nga maoy nanganak kang Jesus, “ang Inahan sa Diyos”?

Itandi ang mosunod nga mga teksto sa Bibliya: Mateo 26:39; Juan 14:28; 1 Corinto 15:27, 28; Colosas 1:15, 16