PANGUNANG TOPIKO | PUWEDE KANG MASUOD SA DIYOS
Suod Ka ba sa Diyos?
“Kon suod ka sa Diyos mobati kang kompleto, lig-on, ug may kasegurohan. Samag ang Diyos kanunayng naghunahuna sa imong kaayohan.”—CHRISTOPHER, BATAN-ONG LALAKI SA GHANA.
“Ang Diyos makakita sa tanan nimong kagul-anan, ug mas higugmaon ug atimanon ka niya nga labaw pa sa imong gidahom.”—HANNAH, 13-ANYOS, ALASKA, U.S.A.
“Makapalipay ug nindot kaayo ang bation kon suod ka sa Diyos!”—GINA, BABAYENG JAMAICAN NGA KAPIG 40 ANYOS.
Dili lang si Christopher, Hannah, ug Gina ang mibati niana. Daghang tawo sa tibuok kalibotan ang kombinsido nga giisip sila sa Diyos nga iyang mga higala. Ikaw, mibati ka bang suod sa Diyos? O gusto ba nimong masuod o mas masuod pa kaniya? Tingali maghunahuna ka: ‘Posible ba gyod nga ang ordinaryong tawo makabatog suod nga relasyon sa Labing Gamhanan nga Diyos? Kon mao, sa unsang paagi?’
POSIBLE ANG PAGPAKIGSUOD SA DIYOS
Sumala sa Bibliya, posible nga mahimong suod nga higala sa Diyos. Ang Bibliya nag-ingon nga gitawag sa Diyos si Abraham nga “akong higala.” (Isaias 41:8) Matikdi sab ang mahigugmaong pagdapit sa Diyos diha sa Santiago 4:8: “Duol sa Diyos, ug siya moduol kaninyo.” Busa, tin-aw nga posible gyod nga mahimong suod nga higala sa Diyos. Apan kay dili man makita ang Diyos, sa unsang paagi ka ‘makaduol’ ug makabatog maayong relasyon kaniya?
Aron matubag kana, tagda kon sa unsang paagi magsugod ang panaghigalaay sa mga tawo. Sagad magsugod kana sa ilang pag-ilaila. Dayon, kon sila regular nga mag-estoryahanay, mosulti sa ilang mga hunahuna ug pagbati, mas magkasuod sila. Ug kon mobuhat silag mga butang alang sa usag usa, molig-on ang ilang panaghigalaay. Ingon usab niana ang pagpakigsuod sa Diyos. Atong tan-awon kon sa unsang paagi.