Andam na ba Ka nga “Mapanunod ang Yuta”?

ANDAM NA SA PAGHIMO SA YUTA NGA PARAISO

Dihang gisugo ni Jehova ang mga tawo nga ‘pun-on ang yuta ug gamhan kini,’ nagpakita ni nga sa ngadtongadto, ang tibuok kalibotan mahimong Paraiso. (Gen. 1:28) Kana nga sugo kinahanglan sab nga sundon niadtong makapanunod sa yuta. Pero sa sugod, dili pa Paraiso ang yuta kay wala na man ang tanaman sa Eden. Human dayon sa Armagedon, daghan unya tag buhaton aron hinloan ang mga lugar nga nangadaot. Dako unya nâ nga trabaho!

Nagpahinumdom ni nato sa buluhaton sa mga Israelinhon pagbalik nila gikan sa Babilonya. Way nagpuyo sa ilang yuta sulod sa 70 ka tuig. Pero si Isaias nagtagna nga tabangan sila ni Jehova nga mapasig-uli ni. Si Isaias miingon: “Ang kamingawan niini himoon niyang sama sa Eden ug ang desyertong kapatagan niini sama sa tanaman ni Jehova.” (Isa. 51:3) Gitabangan ni Jehova ang mga Israelinhon nga mapanindot ang ilang yuta. Sa samang paagi, tabangan ni Jehova kadtong makapanunod sa yuta aron mahimo ning Paraiso. Ug karon pa lang, imo nang mapakita nga gusto nimong makigbahin sa maong buluhaton.

Ang usa ka paagi mao ang pagpaningkamot nga kanunayng limpiyo ug hapsay ang imong balay ug palibot. Imo nang mahimo bisag dili ingon ana ang imong mga silingan. Makatabang pod ka sa pagpanglimpiyo ug pagmentinar sa Kingdom Hall ug Assembly Hall. Kon itugot sa imong kahimtang, puwede pod kang moaplay aron moboluntaryo sa disaster relief. Pinaagi niini, mapakita nimo nga andam kang motabang sa mga igsoon. Puwede kang mokat-on ug skill nga magamit nimo kon usa ka sa makapanunod sa yuta.

ANDAM NA SA PAG-ATIMAN SA MGA BINANHAW

Human banhawa ni Jesus ang anak ni Jairo, miingon dayon si Jesus nga hatagag pagkaon ang dalagita. (Mar. 5:42, 43) Dili tingali lisod ang pag-atiman sa maong 12 anyos nga bata. Pero hunahunaa kon unsa ka dako unya ang trabaho dihang tumanon ni Jesus ang iyang saad nga “ang tanang anaa sa handomanang mga lubnganan makadungog sa iyang tingog ug mangabanhaw.” (Juan 5:28, 29) Bisag wala maghatag ang Bibliya ug daghang detalye, makaingon ta nga ang mga binanhaw magkinahanglag pagkaon, puy-anan, ug sinina. Karon pa lang, unsaon nimo pagpakita nga andam kang motabang? Niay pipila ka pangutana nga puwede nimong pamalandongon.

Dihang ipahibalo nga moduaw sa inyong kongregasyon ang tigdumala sa sirkito, moboluntaryo ba ka nga imbitahon siya sa pagpangaon? Kon may Bethelite nga mareasayn ug magpasakop sa inyong kongregasyon o kon ang usa ka tigdumala sa sirkito mahunong na sa iyang asaynment, makatabang ba ka niya nga makakitag kapuy-an? Kon dunay rehiyonal o espesyal nga kombensiyon sa inyong lugar, makaboluntaryo ba ka sa dili pa o human sa kombensiyon o makatabang ba ka sa pag-abiabi sa mga delegado?

ANDAM NA SA PAGTUDLO SA MGA BINANHAW

Gipakita sa Buhat 24:15 nga bilyonbilyong tawo ang banhawon. Daghan kanila ang wala makaila kang Jehova, pero hatagan silag kahigayonan human sa ilang pagkabanhaw.a Ang matinumanon ug eksperyensiyado na nga mga alagad sa Diyos motabang aron tudloan sila. (Isa. 11:9) Naghinamhinam ana si Charlotte, nga nakasangyaw sa Europe, South America, ug Africa. Siya miingon: “Eksayted ko nga tudloan ang mga binanhaw. Kon makabasa ko bahin sa usa ka tawo nga nabuhi sa una, makaingon ko: ‘Kon nakaila pa ni siya kang Jehova, lahi gyod unta ang iyang kinabuhi.’ Eksayted ko nga sultihan ang mga binanhaw bahin kang Jehova ug kon unsa ka maayo ang ilang kinabuhi kon mag-alagad sila kaniya.”

Bisan ang matinumanong mga alagad ni Jehova nga nabuhi sa wala pa si Jesus sa yuta daghag angayng makat-onan. Hunahunaa kon unsa ka dakong kalipay ug pribilehiyo ang pagpatin-aw kang Daniel sa katumanan sa mga tagna nga iyang gisulat pero wala niya masabti. (Dan 12:8) O kaha ang pagtabang kang Ruth ug Noemi nga mahibaloan kon sa unsang paagi nahimo silang katigulangan sa Mesiyas. Malipay gyod unya ta nga tudloan ang mga tawo sa tibuok kalibotan kay nianang panahona, wala nay presyur ug impluwensiya niining daotang kalibotan!

Unsay imong mahimo karon aron maandam ka sa pagtudlo sa mga binanhaw? Ang usa ka paagi mao ang pagpaningkamot nga mahimong mas maayong magtutudlo ug ang regular nga pagsangyaw. (Mat. 24:14) Kon limitado na ang imong mahimo karon tungod sa edad o ubang kahimtang, ang paghimo kutob sa imong maarangan magpakita sa imong kaandam nga tudloan ang mga binanhaw.

Oo, maayong pamalandongon nato kini nga mga pangutana, Naghinamhinam na ba gyod ka nga mapanunod ang yuta? Eksayted na ba ka nga motabang nga himoong Paraiso ang yuta ug atimanon ug tudloan ang mga binanhaw? Mapakita nimo nga andam na ka pinaagi sa paghimo sa mga buluhaton nga mao poy imong himoon dihang mapanunod na nimo ang yuta!