1 | Pag-ampo “Itugyan Kaniya ang Tanan Ninyong Kabalaka”

ANG BIBLIYA NAG-INGON: “Itugyan [sa Diyos] ang tanan ninyong kabalaka, kay gimahal mo niya.”—1 PEDRO 5:7.

Kon Unsay Gipasabot Niana

Gidapit ta ni Jehova nga Diyos nga isulti kaniya ang bisan unsa nga nakapabalaka nato. (Salmo 55:22) Dako man o gamay ang atong problema, puwede nato ning iampo niya. Kon importante ni nato, importante ni kang Jehova. Ang pag-ampo kaniya importante aron makabaton tag kalinaw sa hunahuna.—Filipos 4:6, 7.

Kon sa Unsang Paagi Kini Makatabang

Kon magkaproblema ta sa mental health, mobati tingali tang nag-inusara. Dili sa tanang panahon nga bug-os masabtan sa uban ang atong giatubang. (Proverbio 14:10) Pero kon sinsero natong isulti sa Diyos ang atong gibati, kanunay siyang maminaw nato ug makasabot siya nato. Nakita ta ni Jehova, nahibalo siya sa atong kasakit ug pag-antos, ug gusto niya nga atong iampo niya ang bisan unsa nga nakapabalaka nato.—2 Cronicas 6:29, 30.

Ang pag-ampo kang Jehova magpalig-on sa atong pagsalig nga gimahal ta niya. Bation nato ang gibati sa salmista kinsa miampo: “Nakita nimo ang akong kasakitan; nasayod ka sa akong grabeng kagul-anan.” (Salmo 31:7) Ang pagkahibalo nga nakita ni Jehova ang atong giatubang dakog tabang nga dili ta mosurender. Pero dili lang kay nakita niya ang atong pag-antos. Siya ang mas nakasabot sa atong giatubang ug tabangan ta niya nga mahupay ug madasig pinaagi sa Bibliya.

Ang Bibliya Nakatabang Kang Julian

Kon Unsay Epekto sa Kabalaka Kanako

“Naa koy anxiety disorder ug obsessive-compulsive disorder (OCD). Ang akong anxiety disorder mokalit rag sugmat. Okey ko karon, dayon kalit lang nga mabalaka ko pag-ayo nga wala ray hinungdan. Mosugmat ni ilabina kon naay ubang tawo. Mabalaka ko pag-ayo kon unsay ilang gihunahuna nako.

“Ang akong mga higala nga nahibalo sa akong kahimtang, naningkamot sa pagtabang nako. Usahay makasulti silag mga butang nga dili makatabang nako. Pero naapresyar nako ang ilang paningkamot.

“Usahay tungod sa akong anxiety disorder ug OCD, maglisod kog ampo. Kinahanglan kong maningkamot pag-ayo aron makapokus ug makasulti kang Jehova diha sa pag-ampo. Daghan kaayo ang naa sa akong hunahuna, maong sagad maglibog ko pag-ayo. Dihang dili nako makontrolar ang akong hunahuna, maglisod kog sulti kang Jehova sa akong gihunahuna ug gibati.”

Kon sa Unsang Paagi Nakatabang Nako ang Bibliya

“Sa akong pagtuon sa Bibliya, akong nakat-onan nga ang pag-ampo dili kinahanglang taas o maayo kaayong pagkabalay aron dunggon sa Diyos. Naay mga panahon nga wala ko kabalo kon unsay isulti, maong moingon lang ko: ‘Jehova, palihog tabangi ko.’ Bisan pa niana, gibati nako nga nasabtan ko ni Jehova ug gihatag niya ang akong gikinahanglan anang panahona. Gawas pa sa pag-ampo, nagpa-medical therapy pod ko. Nalipay ko kay pinaagi niining duha ka tabang, miarang-arang gyod ang akong kahimtang. Wala gyod masayang ang akong paningkamot nga moampo sa akong langitnong Amahan kay nadawat nako ang iyang mahigugmaong tabang.”