Sundoga ang Matinumanon nga mga Anghel

1-2. (a) Sa unsang paagi lahi ta sa mga anghel? (b) Sa unsang paagi parehas ta sa mga anghel?

SA DIHANG gikabig ka ni Jehova sa kamatuoran, nahimo kang bahin sa dako kaayong pamilya nga nagsimba kaniya. Apil niini nga pamilya ang atong mahigugmaong mga igsoon sa lainlaing bahin sa kalibotan ug ang minilyong mga anghel. (Dan. 7:9, 10) Kon maghunahuna ta bahin sa mga anghel, sagad makahunahuna ta nga lahi gyod sila nato. Pananglitan, ang mga anghel dugay nang naglungtad sa wala pa ang mga tawo. (Job 38:4, 7) Mas gamhanan pod sila kay sa nato. Ug ang ilang pagkabalaan ug pagkamatarong dili gyod nato matupngan kay dili ta hingpit.—Luc. 9:26.

² Pero bisag lahi kaayo sila, parehas pod ta nila sa daghang paagi. Pananglitan, sama sa mga anghel, masundog nato ang nindot nga mga hiyas ni Jehova. Naa sab tay kagawasan sa pagpili. Kada usa pod nato naay ngalan ug lahilahig personalidad. Lahilahi pod tag responsibilidad. Ug sama sa mga anghel, naa tay espirituwal nga panginahanglan nga simbahon ang atong Maglalalang.—1 Ped. 1:12.

3. Unsay atong makat-onan sa matinumanong mga anghel?

³ Kay parehas ta sa mga anghel sa daghang paagi, ang ilang maayong ehemplo makadasig ug makapalig-on nato. Gani, makakat-on tag nindot nga mga leksiyon gikan nila. Niining artikuloha, atong konsiderahon kon unsaon nato pagsundog ang pagkamapainubsanon sa matinumanong mga anghel, ang ilang gugma sa mga tawo, ang ilang paglahutay, ug ang ilang paningkamot nga magpabiling hinlo ang kongregasyon.

ANG MGA ANGHEL MAPAINUBSANON

4. (a) Giunsa pagpakita sa mga anghel ang pagkamapainubsanon? (b) Nganong mapainubsanon ang mga anghel? (Salmo 89:7)

⁴ Ang matinumanong mga anghel mapainubsanon. Bisag mga eksperyensiyado sila, gamhanan, ug maalamon, nagsunod sila sa mga instruksiyon ni Jehova. (Sal. 103:20) Samtang gituman nila ang ilang mga asaynment, wala gyod sila manghambog o magpabilib sa ilang gahom. Malipayon silang naghimo sa kabubut-on sa Diyos bisag wala hisgoti ang ilang mga ngalan.a (Gen. 32:24, 29; 2 Hari 19:35) Wala sila mosugot nga dayegon sila, kay gusto nila nga ang pagdayeg ihatag ngadto lang kang Jehova. Nganong mapainubsanon kaayo ang mga anghel? Tungod kay gimahal nila si Jehova ug lawom kaayo ang ilang pagtahod kaniya.—Basaha ang Salmo 89:7.

5. Giunsa pagpakita sa usa ka anghel ang pagkamapainubsanon dihang gibadlong niya si apostol Juan? (Tan-awa sab ang hulagway.)

⁵ Konsideraha ang usa ka hitabo nga nagpakita nga mapainubsanon ang mga anghel. Sa mga 96 C.E., ang wala nganli nga anghel nagpakitag makapahingangha kaayo nga panan-awon kang apostol Juan. (Pin. 1:1) Unsay reaksiyon ni Juan sa panan-awon? Misulay siyag simba sa anghel. Pero gipugngan dayon siya niining maunongon nga anghel ug giingnan: “Pagbantay! Ayaw nag buhata! Isigkaulipon lang ko nimo ug sa imong mga igsoon . . . Ang Diyos maoy simbaha!” (Pin. 19:10) Mapainubsanon gyod kaayo ang maong anghel! Wala siya mangandoy nga dayegon o simbahon siya. Dihadiha, iyang giingnan si Juan nga simbahon si Jehova nga Diyos. Pero wala pod niya pakamenosa si Juan. Bisag gamhanan kaayo siya ug mas dugay nang nag-alagad kang Jehova kay sa kang Juan, mapainubsanon siyang miingon nga parehas ra sila nga mga isigkaulipon. Ug bisag kinahanglan niyang badlongon ang edaran nga apostol, wala niya siya kasab-i. Hinuon, ang anghel buotang nakig-estorya kaniya. Iyang giila nga nahingangha lang gyod si Juan.

6. Unsaon nato pagsundog ang pagkamapainubsanon sa mga anghel?

⁶ Unsaon nato pagsundog ang pagkamapainubsanon sa mga anghel? Sama sa mga anghel, dili ta manghambog sa atong mga nahimo sa pag-alagad aron lang dayegon ta sa uban. (1 Cor. 4:7) Dili pod ta angayng maghunahuna nga mas labaw ta sa uban kay mas dugay na tang nag-alagad kang Jehova o naa tay mga pribilehiyo. Gani, kon mas daghan tag responsibilidad, angay natong isipon ang atong kaugalingon nga mas ubos. (Luc. 9:48) Sama sa mga anghel, gusto natong alagaran ang uban imbes nga magpaimportante sa kaugalingon.

7. Unsaon nato pagpakita ang pagkamapainubsanon dihang motambag ta sa uban?

⁷ Mapakita pod nato ang pagkamapainubsanon dihang motambag ta sa uban—pananglitan, sa igsoon o sa atong anak. Usahay, kinahanglan tang mohatag ug prangkang tambag. Pero sama sa anghel nga nagtambag kang Juan sa buotan nga paagi, makahatag pod tag prangka nga tambag pero himoon nato ni sa paagi nga dili ra maulawan o masakitan ang atong gitambagan. Kon giisip nato ang atong kaugalingon nga mas ubos, makahatag ta ug binase sa Bibliya nga tambag sa buotan ug mahigugmaong paagi.—Col. 4:6.

ANG MGA ANGHEL NAHIGUGMA SA MGA TAWO

8. (a) Base sa Lucas 15:10, giunsa pagpakita sa mga anghel nga gimahal nila ang mga tawo? (b) Sa unsang paagi mitabang ang mga anghel sa buluhatong pagsangyaw? (Tan-awa sab ang hulagway .)

⁸ Ang mga anghel nahigugma sa mga tawo ug naghunahuna sa ilang kaayohan. Malipay kaayo sila dihang ang makasasala maghinulsol—sa ato pa, dihang ang usa nga nakahimog seryosong sala o mihunong sa pag-alagad kang Jehova maghinulsol ug mobalik kaniya, o dihang ang usa mohimog mga kausaban sa iyang kinabuhi ug moalagad kang Jehova. (Basaha ang Lucas 15:10.) Ang mga anghel aktibo pod nga nakigbahin sa buluhatong pagsangyaw. (Pin. 14:6) Bisag dili sila direktang mosangyaw sa mga tawo, giyahan tingali ta nila ngadto sa mga tawo nga gustong mokat-on bahin kang Jehova. Siyempre, dili sa tanang higayon nga makaingon ta nga ang mga anghel ang naggiya nato ngadto sa usa ka tawo. Hinumdoman nato nga si Jehova puwedeng mogamit ug ubang paagi, sama sa iyang balaang espiritu, aron tabangan ang mga tawo o giyahan ang iyang mga alagad. (Buh. 16:6, 7) Pero makaseguro ta nga gigamit gyod niya pag-ayo ang mga anghel. Busa dihang mosangyaw ta, makasalig gyod ta nga tabangan ta sa mga anghel.—Tan-awa ang kahong “Gitubag ang Ilang mga Pag-ampo.”b

9. Unsaon nato pagsundog ang gugma sa mga anghel para sa mga tawo?

⁹ Unsaon nato pagsundog ang gugma sa mga anghel para sa mga tawo? Dihang makadungog tag pahibalo nga naay napasig-uli, malipay gyod ta sama sa mga anghel. Ato gyong ipabati sa igsoon nga gimahal nato siya ug nga nalipay ta nga nakabalik siya sa pag-alagad. (Luc. 15:4-7; 2 Cor. 2:6-8) Masundog pod nato ang mga anghel kon himoon nato ang tanan natong maarangan sa buluhatong pagsangyaw. (Eccl. 11:6) Ug sama nga gitabangan ta sa mga anghel sa atong pagsangyaw, mangita pod tag mga paagi nga matabangan ang atong mga igsoon sa ilang ministeryo. Pananglitan, puwede tang makigpartner niadtong wala pa kaayoy eksperyensiya sa pagsangyaw. Puwede pod natong tabangan ang mga tigulang o infirm nga mga igsoon aron makasangyaw sila.

10. Unsay atong nakat-onan sa eksperyensiya ni Sara?

¹⁰ Komosta kon limitado na lang ang atong mahimo sa pag-alagad tungod sa atong kahimtang? Makapadayon gihapon ta sa atong buluhatong pagsangyaw uban sa mga anghel. Konsideraha ang eksperyensiya ni Sara,c sister nga taga-India. Mga 20 ka tuig na siyang nagpayunir sa dihang grabe siyang nasakit ug naglubog na lang sa higdaanan. Naguol gyod siya pag-ayo. Pero tungod sa mahigugmaong tabang sa mga igsoon ug sa iyang regular nga pagbasa sa Bibliya, anam-anam nga nabalik ang kalipay ni Sara. Siyempre, kinahanglan niyang usbon ang iyang paagi sa pagsangyaw base sa kon unsay makaya sa iyang kahimtang. Kay dili man siya makalingkod aron maka-letter writing, nag-telephone witnessing na lang siya. Iyang gitawgan ang iyang mga balikduaw, ug ila siyang gi-refer sa uban nga gusto pong magpa-Bible study. Unsay resulta? Sulod lang sa pipila ka bulan, 70 na ang Bible study ni Sara! Kay dili na niya kayang dumalahon ang tanan tungod sa kadaghan, gipasa niya ang uban ngadto sa mga igsoon. Daghan niini nga mga Bible study ang nagtambongan na sa mga tigom. Seguradong nalipay gyod ang mga anghel nga mag-alagad uban sa mga igsoon, sama kang Sara, nga naghimo sa tanan nilang maarangan sa pagsangyaw!

ANG MGA ANGHEL MILAHUTAY

11. Sa unsang paagi ang matinumanong mga anghel nagpakitag talagsaong paglahutay?

¹¹ Ang matinumanong mga anghel maayo kaayong ehemplo sa paglahutay. Sulod na sa libolibo ka katuigan, ilang gilahutay ang inhustisya ug pagkadaotan. Ilang nakita ang pagrebelde ni Satanas ug sa uban pang mga anghel kinsa kauban nila kaniadto sa pag-alagad kang Jehova. (Gen. 3:1; 6:1, 2; Jud. 6) Ang Bibliya naghisgot bahin sa usa ka matinumanong anghel nga nakasinatig pagsupak gikan sa usa ka gamhanang demonyo. (Dan. 10:13) Nakita sab sa mga anghel nga sukad pa sa una, gamay ra ang nag-alagad kang Jehova kon itandi sa mga wala mag-alagad kaniya. Bisan pa niana, kining maunongong mga anghel malipayon ug madasigon gihapong nag-alagad kang Jehova. Nahibalo sila nga sa hustong panahon, wad-on sa Diyos ang tanang inhustisya.

12. Unsay makatabang nato sa paglahutay?

¹² Unsaon nato pagsundog ang mga anghel sa ilang paglahutay? Sama sa mga anghel, makakita tingali tag inhustisya o makasinatig pagsupak. Pero kombinsido pod ta nga sa hustong panahon, wad-on sa Diyos ang tanang pagkadaotan. Busa sama sa matinumanong mga anghel, “dili ta mohunong sa pagbuhat ug maayo.” (Gal. 6:9) Ug ang Diyos nagsaad nga tabangan ta niya nga makalahutay. (1 Cor. 10:13) Makapangayo ta sa tabang sa balaang espiritu ni Jehova aron mahimo tang mapailobon ug malipayon. (Gal. 5:22; Col. 1:11) Komosta kon nakaatubang kag pagsupak? Salig sa bug-os kang Jehova ug ayaw kahadlok. Makasalig ka nga tabangan ug palig-onon gyod ka ni Jehova.—Heb. 13:6.

ANG MGA ANGHEL MITABANG NGA MAGPABILING HINLO ANG KONGREGASYON

13. Unsang espesyal nga asaynment ang gihatag ni Jehova sa mga anghel niining kataposang mga adlaw? (Mateo 13:47-49)

¹³ Niining kataposang mga adlaw, gihatagan ni Jehova ang mga anghel ug espesyal nga asaynment. (Basaha ang Mateo 13:47-49.) Ang buluhatong pagsangyaw nakadani sa minilyong tawo sa tibuok kalibotan. Ang uban nila mihimog mga kausaban sa ilang kinabuhi aron mahimong tinuod nga mga Kristohanon, pero ang uban wala mohimo niana. Ang mga anghel maoy giasayn sa “paglain sa mga daotan gikan sa mga matarong.” Nagpasabot ni nga giasayn sila aron motabang nga magpabiling hinlo ang kongregasyon. Pero wala ni magpasabot nga dili na makabalik kadtong mihunong na sa pagpakig-uban sa mga Saksi o wala na mag-alagad kang Jehova. Wala pod ni magpasabot nga dili na gyod magkaproblema ang kongregasyon. Pero makaseguro ta nga ang mga anghel naningkamot pag-ayo aron tabangan ang kongregasyon nga magpabiling hinlo.

14-15. Unsaon nato pagsundog ang mga anghel sa ilang paningkamot nga magpabiling hinlo sa moral ug espirituwal ang kongregasyon? (Tan-awa sab ang mga hulagway.)

¹⁴ Unsaon nato pagsundog ang mga anghel sa ilang paningkamot nga magpabiling hinlo ang kongregasyon? Masundog nato sila pinaagi sa paghimo pod sa atong maarangan nga maprotektahan ang moral ug espirituwal nga kahinlo sa kongregasyon. Busa maningkamot ta nga protektahan ang atong kasingkasing pinaagi sa pagpilig maayong mga higala ug paglikay kang bisan kinsa o bisan unsa nga makahatag natog dili maayong impluwensiya. (Sal. 101:3) Tabangan pod nato ang atong mga igsoon nga makapabiling matinumanon kang Jehova. Pananglitan, unsay atong himoon kon nahibaloan nato nga ang usa ka igsoon nakahimog seryosong sala? Kay gimahal nato siya, dasigon nato siya nga motug-an sa mga ansiyano. Kon dili siya motug-an, kitay mosulti sa mga ansiyano. Gusto nato nga matabangan dayon ang igsoon nga nasakit sa espirituwal.—Sant. 5:14, 15.

¹⁵ Makapaguol kay ang uban nga nakahimog seryosong sala kinahanglang tangtangon gikan sa kongregasyon. Niana nga mga kahimtang, kinahanglan tang ‘mohunong sa pagpakig-uban’ nila.d (1 Cor. 5:9-13) Kini nga kahikayan makatabang nga magpabiling hinlo ang kongregasyon. Ang tinuod, kon pilion nato nga dili makig-uban sa mga natangtang, ato silang gipakitaan ug gugma ug kaayo. Kon mobarog gyod ta ug suportahan nato kini nga kahikayan, makatabang ni nila nga makaamgo sa ilang nahimong sayop ug mobalik kang Jehova. Dihang mobalik sila, malipay gyod ta, sama kang Jehova ug sa mga anghel.—Luc. 15:7.

16. Sa unsang mga paagi masundog nimo ang mga anghel?

¹⁶ Dako gyod kaayong pribilehiyo nga gitugotan ta ni Jehova nga mahibalo bahin sa mga anghel, nga sama bag nakita nato sila sa atong mga mata sa pagtuo. Pribilehiyo pod nato nga mag-alagad uban nila. Hinaot maningkamot ta nga sundogon ang ilang maayong mga hiyas—ang ilang pagkamapainubsanon, gugma sa mga tawo, paglahutay, ug ang ilang paningkamot nga maprotektahan ang moral ug espirituwal nga kahinlo sa kongregasyon. Kon sundogon nato ang matinumanong mga anghel, kita pod mahimong bahin sa pamilya ni Jehova hangtod sa hangtod.