Climate Change ug ang Atong Kaugmaon—Unsay Giingon sa Bibliya?

“Nadaot na gyod ang atong klima. Moabot ang panahon nga di na gyod kapuy-an ang yuta.”—The Guardian.

Nag-atubang tag dakong problema nga tawo ra pod ang hinungdan. Kadaghanang siyentista nag-ingon nga ang mga ginahimo sa tawo maoy hinungdan sa global warming. Ang maong pagtaas sa temperatura sa yuta nakapausab sa klima ug miresultag mga kalamidad. Apil niini ang mosunod:

• Mas sagunson ug grabe nga heat wave, hulaw, ug bagyo, nga miresultag daghang pagbaha ug wildfire.

• Nagakatunaw nga ice sa Arctic.

• Pagtaas sa lebel sa dagat.

Tibuok yuta ang apektado sa climate change. Human tun-i sa New York Times ang kahimtang sa 193 ka nasod, kini mireport: “Nangayog tabang ang atong planeta.” Kay daghan na ang nangamatay ug nag-antos tungod sa climate change, gitawag ni sa World Health Organization nga “kinadak-ang kapeligrohan sa panglawas.”

Pero dili ta angayng mawad-ag paglaom. Ang mga nagakahitabo karon gitagna na sa Bibliya. Naghatag ni natog basehanan kon nganong makasalig ta nga molihok ang Diyos. Naghisgot pod ni kon unsay iyang himoon aron maseguro ang atong kaugmaon.

Katumanan ba sa tagna sa Bibliya ang climate change?

Oo. Ang climate change nga resulta sa global warming mohaom sa gitagna sa Bibliya nga mahitabo sa atong panahon.

Tagna: “Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya mahigugmaon sa kaugalingon, mahigugmaon sa kuwarta, … dili maunongon, … dili ikasabot, … traydor, gahig ulo.”—2 Timoteo 3:1-4.

Gitagna sa Bibliya ang mga kinaiya sa tawo nga maoy hinungdan sa climate change. Mas gipalabi sa mga gobyerno ug mga negosyante ang kuwarta kay sa kaayohan sa umaabot nga mga henerasyon. Bisan pag naningkamot sila nga magtinabangay, dili gihapon sila magkauyon kon unsaon pagsulbad ang global warming.

Gipakita niini nga tagna nga dili ta makadahom nga ang tanang tawo magbag-o ug ilang protektahan ang yuta. Ang Bibliya nag-ingon nga ang mga tawo nga naghunahuna ra sa ilang kaugalingon “mosamot pa ka daotan.”—2 Timoteo 3:13.

Nganong makaseguro ta nga molihok ang Diyos?

Gipakita sa Bibliya nga ang atong planeta ug ang mga nagpuyo niini importante kang Jehovaa nga Diyos, ang atong Maglalalang. Konsideraha ang tulo ka teksto sa Bibliya nga nagpakita nga molihok ang Diyos.

1. 1. Ang Diyos “wala maglalang [sa yuta] sa wala lamay kapuslanan, apan nag-umol niini aron puy-an.”—Isaias 45:18.

   Himoon sa Diyos ang iyang katuyoan para sa yuta. (Isaias 55:11) Dili niya tugotan nga madaot gyod ni o moabot ang panahon nga dili na ni kapuy-an.

2. 2. “Ang mga maaghop manag-iya sa yuta, ug mabatonan nila ang tumang kalipay tungod sa dagayang pakigdait. Ang mga matarong manag-iya sa yuta, ug sila magpuyo niini hangtod sa hangtod.”—Salmo 37:11, 29.

   Ang Diyos nagsaad nga ang mga tawo mabuhi nga malinawon sa yuta hangtod sa hangtod.

3. 3. “Kon bahin sa mga daotan, sila laglagon gikan sa yuta.”—Proverbio 2:22.

   Ang Diyos nagsaad nga wagtangon niya kadtong nagpadayon sa paghimog daotan, apil kadtong nagdaot sa yuta.

Kon unsay himoon sa Diyos para sa atong kaugmaon

Unsaon pagtuman sa Diyos ang iyang mga saad para sa yuta? Iyang gamiton ang usa ka gobyerno nga gitawag ug Gingharian sa Diyos, nga magmando sa tibuok kalibotan. (Mateo 6:10) Kini nga Gingharian magmando gikan sa langit. Dili ni makigsabot sa mga gobyerno sa tawo bahin sa mga isyu maylabot sa yuta ug sa kinaiyahan. Pulihan sa Gingharian sa Diyos ang tanang gobyerno sa tawo.—Daniel 2:44.

Ang Gingharian sa Diyos maghatag ug kaayohan sa tanang tawo ug sa planetang Yuta. (Salmo 96:10-13) Konsideraha kon unsay himoon ni Jehova nga Diyos pinaagi sa iyang Gingharian.

• Iyang ayohon ang kinaiyahan

  Ang giingon sa Bibliya: “Ang kamingawan ug ang umaw nga yuta magsadya, ug ang desyertong kapatagan magkalipay ug mamulak sama sa safron.”—Isaias 35:1.

  Ang kahulogan niini para sa atong kaugmaon: Ayohon ni Jehova ang atong planeta, bisan ang mga lugar nga gidaot pag-ayo sa mga tawo.

• Iyang kontrolon ang dili maayong panahon

  Ang giingon sa Bibliya: “Gipalurang [ni Jehova] ang unos; ang mga balod sa dagat milinaw.”—Salmo 107:29.

  Ang kahulogan niini para sa atong kaugmaon: Si Jehova naay gahom sa pagkontrol sa puwersa sa kinaiyahan (o forces of nature). Wala na unyay daot nga panahon.

• Iyang tudloan ang mga tawo kon unsaon pag-atiman sa yuta

  Ang giingon sa Bibliya: “Hatagan ka nakog lawom nga pagsabot ug tudloan sa dalan nga angay nimong laktan.”—Salmo 32:8.

  Ang kahulogan niini para sa atong kaugmaon: Gihatagan ni Jehova ang mga tawo ug responsibilidad nga atimanon ang yuta. (Genesis 1:28; 2:15) Iya tang tudloan kon unsaon pag-atiman sa iyang mga gilalang ug kon unsaon pagkinabuhi nga dili madaot ang atong planeta.