Ukraine Giatake sa Russia

Sayo sa buntag sa Pebrero 24, 2022, giatake sa military sa Russia ang Ukraine, bisan pa sa paningkamot nga gihimo sa mga lider sa daghang nasod nga malikayan ang gubat. Unsa kahay epekto niini nga pag-atake sa tibuok kalibotan? Sa miagi lang nga mga adlaw, ang secretary-general sa United Nations nga si António Guterres miingon: ”Seguradong moresulta nig grabeng pag-antos ug kadaot, ug makapameligro ni sa seguridad sa mga nasod sa Europe ug sa ubang bahin sa kalibotan.”

Unsa may kahulogan niini nga mga panghitabo sumala sa Bibliya?

• Si Jesu-Kristo nagtagna nga moabot ang panahon nga “ang nasod makiggubat batok sa nasod ug ang gingharian batok sa gingharian.” (Mateo 24:7) Basaha ang artikulong “Unsa ang Ilhanan sa ‘Kataposang mga Adlaw,’ o ‘Panahon sa Kataposan’?” aron imong masayran kon sa unsang paagi gipakita sa Bibliya nga ang mga gubat karon maoy katumanan sa tagna ni Jesus.

• Sa basahon sa Bibliya nga Pinadayag, ang gubat gipakasamag mangangabayo nga nagsakay sa “usa ka kabayo nga ang kolor samag kalayo” nga ‘magkuha sa pakigdait gikan sa yuta.’ (Pinadayag 6:4) Basaha ang artikulong “Kinsa ang Upat ka Mangangabayo?” aron imong masayran kon sa unsang paagi kini nga tagna nagtumong sa mga gubat karon.

• Ang basahon sa Daniel nagtagna bahin sa panag-away sa “hari sa amihanan” ug “hari sa habagatan.” (Daniel 11:25-45) Tan-awa ang video nga Natuman nga Tagna—Daniel Kapitulo 11 aron imong mahibaloan kon nganong ikaingon nga ang Russia ug ang mga kaalyado niini mao ang hari sa amihanan.a

• Ang Pinadayag naghisgot sab sa “gubat sa dakong adlaw sa Diyos nga Labing Gamhanan.” (Pinadayag 16:14, 16) Pero dili ni gubat sa mga nasod sama sa atong makita karon. Basaha ang artikulong “Unsa ang Gubat sa Armagedon?” alang sa dugang impormasyon bahin niini nga panghitabo sa umaabot.

Nganong makalaom ka sa usa ka maayong umaabot?

• Ang Bibliya nag-ingon nga taposon sa Diyos “ang mga gubat sa tibuok yuta.” (Salmo 46:9) Basaha ang artikulong “Tinuod nga Paglaom Alang sa Mas Maayong Kaugmaon” aron makakat-on kag dugang bahin sa mga saad sa Diyos sa umaabot.

• Gitudloan ni Jesus ang iyang mga sumusunod sa pag-ampo nga moabot ang Gingharian sa Diyos. (Mateo 6:9, 10) Kini nga Gingharian maoy gobyerno sa langit nga magtuman sa kabubut-on sa Diyos dinhi sa yuta, apil niana ang tibuok kalibotan nga pakigdait. Aron imong mahibaloan kon unsa nga mga panalangin ang imong madawat niini nga Gingharian, tan-awa ang video nga Unsa ang Gingharian sa Diyos?

Dunay kapig 129,000 ka mga Saksi ni Jehova sa Ukraine. Sama sa mga Saksi sa ubang nasod, ilang gisundog si Jesus pinaagi sa pagpabiling neyutral sa politika ug sa dili pag-apil sa mga gubat. (Juan 18:36) Sa tibuok kalibotan, ang mga Saksi ni Jehova padayong nagsangyaw sa “maayong balita sa Gingharian” nga maoy solusyon sa tanang problema, apil ang gubat. (Mateo 24:14) Kon gusto kang makakat-on ug dugang bahin sa paglaom nga gisaad sa Bibliya, palihog sa pagkontak namo.