Obukama bwa Ruhanga ni enki?

1. Obukama bwa Ruhanga ni enki?

Obukama bwa Ruhanga ni obutegeki bw’omu iguru. Nibwija kwihaho obutegeki bwona bw’abantu kandi buryatuma ebi Ruhanga ari kwenda byakorwa omu nsi nk’oku biri kukorwa omu iguru. Obutumwa oburi kugamba aha Bukama bwa Ruhanga ni burungi! Juba aha Obukama bwa Ruhanga nibwija kutegeka abantu bona omu buryo burungi kandi bubahe ebi bari kwenda byona. Buryatuma abantu b’omu nsi yona baba bamwe.​—Shoma Danieli 2:44; Matayo 6:9, 10; 24:14.

Obukama bushemerire kuba bwine omugabe. Yehova akataho Omwana weye, Yesu Kristo, ngu abe Omugabe w’Obukama bweye.​—Shoma omu Kushuuruurwa 11:15.

2. Ahabw’enki Yesu ari Omugabe murungi?

Omwana wa Ruhanga ni Omugabe murungi ahabw’okuba ayine embabazi kandi narwanirira ebirungi. (Matayo 11:28-30) Nambwenu, ayine obushoborozi bw’okukwasa abantu ahabw’okuba aryategeka ensi ari omu iguru. Ku yamazire kuzoka akaza omu iguru, yasitama aha rubaju rwa buryo rwa Yehova. (Abaheburaayo 10:12, 13) Bwanyima, Ruhanga akamuha obushoborozi bw’okutandika kutegeka.​—Shoma omuri Danieli 7:13, 14.

3. Ni baha abaritegeka na Yesu?

Omutwe gw’abantu bari kwetwa ‘abari kwera’ nibija kutegeka na Yesu omu iguru. (Danieli 7:27) Abari kwera abatorinwe omu mwanya og’okubanza ni entumwa za Yesu eziri kwesigwa. Kuhisa hati, Yehova akagumizamu kutorana abashija n’abakazi abesigwa abari kwera. Kimwe na Yesu, ku bari kufa nibazoka bine omubiri og’omwika.​—Shoma omuri Yohaana 14:1-3; 1 Abakorinso 15:42-44.

Ni abantu bangahe abariza omu iguru kutegeka na Yesu? Yesu akabeta ‘obusyo buke.’ (Luka 12:32) Baryija kuhika aha 144,000. Nibija kutegeka ensi bakwatanisize na Yesu.​—Shoma omu Kushuuruurwa 14:1.

4. Ni enki ecabireho Yesu ku yatandikire kutegeka?

Obukama bwa Ruhanga bukatandika kutegeka omu mwaka gwa 1914.a Eki Yesu yabandize kukora ku yabire Omugabe ni okunaga Sitaane na ba dayimoni beye aha nsi. Sitaane akatandika kureta okubonabona omu nsi yona ahabw’okuba ayine ekiniga kingi. (Okushuuruurwa 12:7-10, 12) Kwiha obwe abantu nibabugana oburemezi kandi bugenda nibweyongera. Engamba, enjara, endwara n’emisisa, byona ni ‘akamanyiso’ akari kwereka ngu Obukama bwa Ruhanga buri hihi kutegeka ensi omu bwijwire.​—Shoma omuri Luka 21:7, 10, 11, 31.

5. Obukama bwa Ruhanga hati buri kukora ki?

Obukama bwa Ruhanga bukatandika kubuganisiza hamwe abantu b’omu mahanga gona, birabire omu murimo g’okuburira. Abantu bingi munonga b’emitima eyorobi bamazire kuba abaturage b’Obukama buri kutegekwa na Yesu. Obukama bwa Ruhanga nibwija kubarinda omu bwire bw’okumaraho egi nsi yasisikire. Ni ahabw’eco abantu bona abari kwenda Obukama bwa Ruhanga bashemerire korobera Yesu.​—Shoma omu Kushuuruurwa 7:9, 14, 16, 17.

Omu myaka 1,000, Obukama buryakora ebi Ruhanga yabire ari kwenda obu yahangire abantu. Ensi yona eryaba paradiso. Aha muheru, Yesu aryagarurira Ishe Obukama. (1 Abakorinso 15:24-26) Mbehi hine omuntu owu ori kwenda kugambira ebikwatirine n’Obukama bwa Ruhanga?​—Shoma omuri Zaaburi 37:10, 11, 29.