Nobasa kumanya ota edini ey’amazima?

1. Mbehi hariho edini emwe ey’amazima?

Yesu akegesa abakurasi beye edini emwe kandi y’amazima. Ni nk’omuhanda oguri kuza aha magara. Yesu akagamba ku ‘abake’ ari bo bari kubona ogo muhanda. (Matayo 7:14) Abantu abari kuramya Ruhanga bakoresize Ekigambo keye ni bo bonka abu ari kwikiriza. Abari omu kuramya okw’amazima bona babuganire omu kwikiriza kumwe.​—Shoma omuri Yohaana 4:23, 24; 14:6; Abaefeso 4:4, 5.

2. Ni enki eki Yesu yagambire aha Bakristo ab’ebishuba?

Yesu akagamba ku abahanuzi b’ebishuba babire barije kushisha Obukristo. Obarebire enyima, nobasa kugira ngu ni Abakristo ab’amazima. Amadini gabo nigeyeta ag’Abakristo. Konka wayetegereza nobasa kubamanya. Bata shi? Edini ey’amazima ni yo yonka erimu Abakristo bine emitwarize n’ebikorwa birungi.​—Shoma omuri Matayo 7:13-23.

3. Nobasa kumanya ota Abakristo ab’amazima?

Yetegereze ebi bintu bitano:

• Abakristo ab’amazima nibaha Bibuli ekitinisa. Nibataho amani bagendera aha misingi ya Bibuli. Ni ahabw’eco edini ey’amazima teri kushushana n’edini ziri kwegesa ebitekateko by’abantu. (Matayo 15:7-9) Abakristo ab’amazima tibari kwegesa ebintu kandi ngu bo batabikore.​—Shoma omuri Yohaana 17:17; 2 Timoseo 3:16, 17.

• 

  Abakurasi ba Yesu ab’amazima nibaha ekitinisa izina rya Ruhanga, Yehova. Yesu akaha ekitinisa izina rya Ruhanga ari kurimanyisa abandi. Akakwasa abantu kumanya Ruhanga kandi yabegesa ku bashemerire kushaba ngu izina rya Ruhanga ryezibwe. (Matayo 6:9) Omu kacweka k’owanyu, ni eha dini eri kumanyisa abantu izina rya Ruhanga?​—Shoma omuri Yohaana 17:26; Abarooma 10:13, 14.

• Abakristo ab’amazima nibaburira Obukama bwa Ruhanga. Ruhanga akatuma Yesu omu nsi ngu ayegese obutumwa burungi bw’Obukama. Obukama bwa Ruhanga bwonka ni bwo mubazi gw’ebibuzo by’abantu. Yesu akagumizamu kubugambira abantu kuhisa ekiro eki yaferireho. (Luka 4:43; 8:1; 23:42, 43) Akagamba ku abakurasi beye na bo bashemerire kububurira. Mbehi hagira omuntu owakuburira Obukama bwa Ruhanga, nogira ngu naba ari omu dini eha?​—Shoma omuri Matayo 24:14.

• Abakurasi ba Yesu tibari ab’ensi egi mbi. Nobasa kubamanya ahabw’okuba tibari kwejwanga omu by’obutegeki bw’ensi ninga shi ngu bange bagenzi babo. (Yohaana 17:16; 18:36) Nambwenu, tibari kutoreza ebikorwa n’emitekatekere by’egi nsi mbi.​—Shoma omuri Yakobo 4:4.

• Abakristo ab’amazima nibakundana babyihire aha mutima. Bakega Bibuli bamanya kuha ekitinisa abantu b’omu bwoko bwona. Erizoba noshanga amadini g’ebishuba gari kwekwatanisa omu ndwano, konka Abakristo ab’amazima bo tibakakikora. (Mika 4:1-3) Ahobwe, Abakristo ab’amazima nibakoresa obwire bwabo n’obutungi bwabo bari kukwasa abandi.​—Shoma omuri Yohaana 13:34, 35; 1 Yohaana 4:20.

4. Mbwenu shi nobasa kumanya edini ey’amazima?

Ni eha dini eri kwegesa ebiri omu Kigambo ca Ruhanga byona, ekaha ekitinisa izina rya Ruhanga kandi ekamanyisa abantu ku Obukama bwa Ruhanga ari bwo mubazi gw’ebizibu byona? Ni baha bantu bari kukundana kandi bakanga kuza omu ndwano? Abo bantu nobamanya?​—Shoma omuri 1 Yohaana 3:10-12.