¿Kácheʼda puede kɨ nɨtsʼeʼ-kɨbala tʼo Dios?

1. ¿U yubín ni Dios u pete ni oración?

Dios u jokʼeʼ gente de u pete kajob ta u nɨtsʼeʼ-ubajob tʼo une tan ni oración (Salmo 65:2). Ni oración más kʼɨnɨ, i kaini a kɨ chinenla. Peru Dios mach u yubí u pete ni oracionob. Ni Biblia u yeleʼ ke ni oracionob de untú winik ke mach u che tratá uts u itʼok, Dios mach u je u yubín (1 Pedro 3:7). Jimba kʼin ke ni aj israelitajob u chijob lu ke mach uts mach umpʼe vez, Dios mach u yolí u yubín ni u oracionob. Une u yelbí: «Anke a chenla kʼen oracionob, machʼanon kubín; kʼa a kʼɨbla de anela butʼu yaʼan tʼo chʼichʼ» (Isaías 1:15). Peru, si untú persona u chi lu ke mach uts, i u chen-uba arrepentí, Dios u je u yubín. Tsikí tɨ Hechos 3:19.

2. ¿Kácheʼda debe kɨ chenla ni oración?

Ni oración cheʼchi jin ta kɨ chenla adorá ni Dios, jinukʼa debe kɨ cherbenla oración aj Jehová i niʼ untú más (Mateo 4:10; 6:9). Kʼa yaʼanonla tʼo pekadu, debe kɨ chenla oración tʼo u kʼabaʼ aj Jesús, kʼa une a chɨmí por kɨ pekadula (Juan 14:6). Aj Jehová mach yo kɨ ɨleʼla ni oracionob ke a kɨ kʼila tan kɨ kʼajalinla o ke tsʼibí yaʼan, une yo ke kɨ cherbenla ni oración ke pasik tan kɨ pixanla. Tsikí tɨ Mateo 6:7 i Filipenses 4:6, 7.

Kɨ Pap-la, aj Jehová, une u yubín ixta ni oracionob ke chʼijkab u yute (1 Samuel 1:12, 13). I une yo ke kɨ cherbenla oración u pete tiempu, tu teʼkiba kʼin i tu xupibá kʼin, ante kɨ kʼuxnákonla i jimba kʼin ke a kɨ numsenla kʼuxe. Tsikí tɨ Mateo 15:36 i 1 Pedro 5:7.

3. ¿Kácheʼda u tɨklénonla ni woyeʼibajob?

Tan jimba mundu da, yaʼanonla tɨ kuxlé tʼo ni personajob ke mach an u fe tʼo ni Dios i u tseʼtanob de lu ke Dios u yeleʼ, ke u je u tɨsen paz pan Kaʼb. Jinda puede u tsupsen tʼo ke esfuerzula de kɨ nɨtsʼeʼ-kɨbala tʼo Dios (2 Timoteo 3:1, 4; 2 Pedro 3:3, 13). Jinukʼa kʼɨnɨ kɨ woyeʼkɨbala tʼo otrojob ni kristianujob ta ɨlbíntikonla pitsil tʼanob. Unejob cheʼchi kʼɨnɨ-ukʼajob kɨ ɨlbenla pitsil tʼanob. Tsikí tɨ Hebreos 10:24, 25.

Al kɨ woyeʼkɨbala tʼo personajob ke u yajinob ni Dios a kɨ jela kɨ chen-kɨbala sentí más nɨtsʼɨ de ni Dios. Ni woyeʼibajob de ni aj testigujob tuba Jehová u ɨbénonla kɨ chen-kɨbala beneficiá tʼo u fe de otrojob. Tsikí tɨ Romanos 1:11, 12.

4. ¿Kácheʼda puede ane a nɨtsʼeʼ-aba tʼo ni Dios?

A je a nɨtsʼeʼ-aba tʼo Dios si a kʼajtiʼin lu ke a kɨní de une tan Biblia. Chen pensá en u pete lu ke u chen, u konseju i lu ke u yeleʼ ke u je u chen. Si a chen ni oración a kʼajtiʼin u pete kosajob da, u je u tɨklenet a chen entendé u yajinlé i de u kʼeʼnan u kʼajalin ni Dios. Tsikí tɨ 1 Timoteo 4:15, 16.

Si a wo a nɨtsʼeʼ-aba tʼo Dios debe ajnek a fe tʼo une i debe a chen konfiá tʼo une. Peru ni fe jin kaʼ untú ke yaʼan tʼo kuxlé: kʼɨnɨ kʼuxnesintik kada kʼin, i cheʼchi kaini, ni fe u chʼije al a kʼajtiʼin kokʼa a tsʼonɨn lu ke yaʼanet a kɨneʼ. Tsikí tɨ Mateo 4:4 i Hebreos 11:1, 6.

5. ¿Kámba ni beneficiujob yaʼan si a kɨ nɨtsʼeʼ-kɨbala tʼo ni Dios?

Aj Jehová u kɨnɨntan jin ke u yajinob. Une u tɨklénonla ta mach kɨ sɨteʼla ni fe i u ɨbénonla fuerza ta mach kɨ chenla kosajob xux i kaini, kuxlíkonla u pete tiempu (Salmo 91:1, 2, 7-10). Une u yelbenonla kamba kosajob mach uts ta kɨ saludla i kacheʼda puede ajnékonla chʼaja kɨ jinla, i u yeʼbenonla kamba ni kuxlé más uts. Tsikí tɨ Santiago 1:25 i 4:4, 8.