¿Kóne ni aj Jesucristu?

1. ¿Kácheʼda a uti aj Jesús?

U kuxlé aj Jesús u tɨkʼí tɨ cielu kaʼ espíritu. Mach kaʼ kɨ kuxlela ke u tɨkʼí pan Kaʼb. Une ajní kaʼ espíritu ante ke tik pan Kaʼb (Juan 8:23). Najtɨkɨ aj Jehová u chi aj Jesús i une u tɨklí u Pap u chen u pete kosajob (Proverbios 8:22, 23, 30). Ni Biblia u jokʼeʼ aj Jesús «juntul Ajloʼ» ta Dios, u juntumá aj Jehová u chi aj Jesús (Juan 1:14). Cheʼchi u yelbinte ni «Tʼan», kʼa une ajní de a numsa-tʼan ta u Pap. Tsikí tɨ Hebreos 1:2.

2. ¿Kokʼa a ti aj Jesús pan Kaʼb?

Dios u yelbí u yajloʼ ke julik pan Kaʼb. Jin tuba, u numsí u kuxlé aj Jesús tan u matriz ij María, untú virgen judía. Aj Jesús mach ajní u pap kaʼ untú winik (Lucas 1:30-35). Une a ti pan Kaʼb ta u chen uxpʼe patanib: 1) ta u yeʼeʼ u tojá de ni Dios, 2) ta u yeʼeʼ tʼo lu ke u chi, kacheʼda kɨ cherbenla u patanib ni Dios, anke yaʼanonla kɨ numsenla kʼuxe, i 3) ta u yɨkʼeʼ u kuxlé perfektu ta u «jelojob» o ta u japɨnonla. Tsikí tɨ Mateo 20:28.

3. ¿Kokʼa kʼɨnɨ-kɨkʼala japintikonla?

Ni jɨpom jin lu ke u tojkan ta japintik u kuxlé untú persona (Éxodo 21:29, 30). Ni chɨmó i ni noxiban mach jin u yolí ni Dios ta ni gente. Kuyila ke aj Jehová u yelbí aj Adán ke si mach u tsʼonben u tʼan, u je tɨ chɨmó, ni Biblia u yeleʼ ke jin ni pekadu. Si u tsʼoni ka, yaʼchi to ka an kuxu bada (Génesis 2:16, 17; 5:5). Ni Biblia u yeleʼ, ke aj Adán u yɨkʼí ni «chɨmo» tuba u pete pan Kaʼb. Aj Adán u numsbí u bijchʼokob ni pekadu i kaini u laj bisí tɨ chɨmó. Jin tuba, u pete kʼɨnɨ-kɨkʼala japintikonla de ni chɨmó ke u yɨkʼí aj Adán. Tsikí tɨ Romanos 5:12 i 6:23.

Bada, ¿kóne u je u tojeʼ ni jɨpom ta u japɨnonla de ni chɨmó? A kɨ tojeʼla ni kɨ pekadula tʼo ni chɨmó. Kʼa yaʼanonla tʼo pekadu, mach puede kɨ tojeʼla u pekadu ni gente. Tsikí tɨ Romanos 3:23.

4. ¿Kokʼa chɨmí aj Jesús?

Aj Jesús mach ajní tʼo pekadu, mach kaʼ u pete personajob. Une mach a chɨmí por u pekadu, a chɨmí ta u tojben u pekadu ni personajob. Al julik u yajloʼ tɨ chɨmó ta kɨ petela, Dios u chi demostrá ke kʼen u yajinlé ta u pete personajob. Cheʼchi aj Jesús u chi demostrá ke u yajinonla al u tsʼonben u tʼan u Pap i al u yɨkʼeʼ u kuxlé por ni kɨ pekadula. Tsikí tɨ Juan 3:16 i Romanos 5:18, 19.

5. ¿Ka yaʼan u chen aj Jesús bada?

Al ajnik pan Kaʼb, aj Jesús u tsʼaki jin kʼojotak, u kuxpesí aj chɨmejob i u tɨklí jin katak yaʼan tʼo kʼuxe, kaini u chi demostrá lu ke u je u chen, jimba tiempu ke u je tɨ te, ta jin katak u tsʼonben u tʼan ni Dios (Mateo 15:30, 31; Juan 5:28). Aj Jesús chɨmí i Dios u kuxpesí i u sutatsʼbi u kuxlé tʼo u kuerpu espiritual ta kuxlik tɨ cielu (1 Pedro 3:18). De yai aj Jesús u pijní tu noji aj Jehová ixta ke une u ɨben poder ta u chen mandá kaʼ Rey pan Kaʼb (Hebreos 10:12, 13). Bada, aj Jesús Rey tɨ cielu, i u discípulujob yaʼanob u tsʼajkunob de jimba pitsil tʼanob da tan u pete Kaʼb. Tsikí tɨ Mateo 24:14 i Apocalipsis 11:15.

Kʼa ni Dios u yɨkʼí de ni Rey aj Jesús, jimba Rey ke kʼen tʼo poder u je u laj tsupsen ni u pete personajob ke u chenob xuxlé i cheʼchi tʼo ni kʼuxe ke yaʼan por jimba xuxlé. U pete ke yaʼan u fe tʼo aj Jesús i u tsʼonben, u je tɨ kuxlé chʼaja u jinob tan umpʼe pitsil Kaʼb. Tsikí tɨ Mateo 5:5.