YEʼJUN 9
¿Kácheʼda puede ajnek chʼajatak u jinob ni familiajob?
1. ¿Kokʼa kʼɨnɨ ni lotojan tɨ registru civil?
Aj Jehová, ni Dios chʼaja u jin i une u ɨbénonla kʼen pitsil tʼanob, yo ke u pete ni familiajob ajnek chʼajatak u jinob (1 Timoteo 1:11). Une u chi ni lotojesiá. Ni lotojan tɨ registru civil u chen ke ni papob i ni u bijchʼokob ajnekob chʼaja u jinob i u yajin-ubajob. Jin ke u tsʼonben u tʼan Dios debe u tsʼonɨn ni ley ke yaʼan tan registru civil ta ni lotojan. Tsikí tɨ Lucas 2:1, 4, 5.
Dios u yeleʼ ke ni lotojan de untú ixík i untú winik debe ajnek ixta ke chɨmikob. Une mach yo ke ni winik i ni ixík u sukpekɨn-ubajob tʼo otro (Hebreos 13:4). Aj Jehová une mach yo ke ni itʼokob u chen-ubajob divorciá (Malaquías 2:16). Peru u chen permití ke untú persona u chen-uba divorciá ta sujlik tɨ lotojan, si u itʼok u sukpeki tʼo otro. Tsikí tɨ Mateo 19:3-6, 9.
2. ¿Kácheʼda debe u bisán-ubajob ni winik i ni ixík ke lotó yaʼanob?
Aj Jehová u chi ni winik i ni ixík ta u tɨklen-ubajob tan ni lotojesiá (Génesis 2:18). Ni winik une aj mandá tan otot, une debe u tɨsen ni kʼuxbitá i u yeʼben u familia de ni Dios. Cheʼchi debe u chen ixta lu ke jin díficil ta une kʼa u yajin u itʼok. Ni itʼokob debe u yajin-ubajob i u chen-ubajob respetá. Kʼa niʼ untú de unejob perfektu, cheʼchi debe u kɨneʼob u chen-ubajob perdoná ta ajnek chʼajatak u jinob. Tsikí tɨ Efesios 4:31, 32; 5:22-25, 33 i 1 Pedro 3:7.
3. Si mach chʼaja a jin tʼo a witʼok, ¿puede a walɨktan-abala?
Si jin lotojob yaʼan u numsenob problemajob, debe u chen-ubajob esforzá por u chenob demostrá ke u yajin-ubajob (1 Corintios 13:4, 5). U tʼan Dios mach u yɨlɨ ke jin lotó anob debe u walɨktan-ubajob ta mach ajnekob tʼo problemajob, kʼa kaini u nume tan ni u kuxlé kone yaʼan lotojob. Tsikí tɨ 1 Corintios 7:10-13.
4. ¿Ka u yolín ni Dios ta ni bijchʼokob?
Aj Jehová u yolín ke ni bijchʼokob ajnek chʼaja u jinob. Jinukʼa u laj yeʼben kamba bij más uts kʼa chʼijikob chʼajatak u jinob. Cheʼchi yo ke ajnekob u kɨneʼob de u kʼajalin i de u kuxlé u papob (Colosenses 3:20). Cheʼchi, u yolín ke ajnekob tʼo chʼajaljin al u cherbenob u patan de une i de u yajloʼ. Tsikí tɨ Mateo 19:13-15; 21:15, 16 i 2 Timoteo 3:14, 15.
5. ¿Kácheʼda puede u chen ni papob ta ajnek chʼaja u jinob u bijchʼokob?
Ni papob debe u chenob u pete kosa ta u ɨkʼeʼ ni kʼuxbitá, umpʼe otot i u bukob (1 Timoteo 5:8). Peru ta ajnek chʼajatak u jinob ni bijchʼokob, ni papob debe u yeʼben u yajin ni Dios i u chenob kaʼ une (Deuteronomio 6:4-7). Si ni papob u yeʼeʼob tʼo lu ke u chenob ke u yajinob ni Dios, ni bijchʼokob u kɨneʼob u chenob kaini. Si ni papob u yeʼbenob ni u bijchʼokob tʼo u tʼan ni Dios jinda u chen ke u kʼajalin ni bijchʼokob ajnek tu tojá. Tsikí tɨ Efesios 6:4.
Kʼɨnɨ ke ni bijchʼokob ɨlbintik pitsil tʼanob por lu ke u chenob uts, ta ajnek chʼaja u jin. Cheʼchi, kʼɨnɨ ke ɨlbintik lu ke u chen jin mach uts i tɨklintik u chen lu ke jin uts (Proverbios 22:15). Jinda puede a chenla tʼo ni tʼanob o si kʼɨnɨ puede a jɨtsʼeʼ peru mach a tsʼibajtesan (yibajtan). Tsikí tɨ Colosenses 3:21.
Aj testigujob tuba Jehová u chijob kʼen librujob ta ni papob i ta bijchʼokob. U pete lu ke u yeleʼ jimba librujob da u chʼemkan tan Biblia. Tsikí tɨ Santiago 1:25.