Eú Pwáraatá Ngeni Jon

8 Lupwen a suuki ewe efisuen pwaau, a mosonoson lón láng ren úkúúkún ina epwe esopw awa. 2 Iwe, úa kúna fúmén chónláng mi útá mwen mesen Kot, me Kot a ngeniir fúúfóch rappwa.

3 Iwe, pwal emén chónláng mi kémwéch eú leenien asoren appach mi pwokkus seni kolt a feito me útá únúkkún ewe róngen asor. A kawor ngeni chómmóng appach mi pwokkus pwe epwe eáni asor fiti meinisin án ekkewe chón pin kewe iótek wóón ewe róngen asor mi ffér seni kolt mi nóm mwen ewe leenien móótun king. 4 Étúétún ewe appach mi pwokkus lón péún ewe chónláng fiti án ekkewe chón pin kewe iótek a étútá mwen Kot. 5 Nge mwittir chék ewe chónláng a angei ewe leenien asoren appach mi pwokkus, ammasoua ngeni ekkei seni wóón ewe róngen asor, me oturatiw wóón fénúfan. Mwirin, a púng chopulap, fi inefi, me a fis eú chechchechin fénú. Úa pwal rong méngúngú. 6 Iwe, ekkewe fúmén chónláng fán néúr kewe fúúfóch rappwa ra ammólnatá ar repwele ettikiir.

7 Ewe áeménún chónláng a ettiki néún we rappwa. Iwe, útten faw me ekkei mi nofit chcha a turutiw wóón fénúfan. Iwe, eú na úlúngátin fénúfan, eú na úlúngátin ekkewe irá, me meinisin fetil ra kareló.

8 Ewe arúúeménún chónláng a ettiki néún we rappwa. Me och mettóch mi ussun eú watteen chuuk mi ngetenget ren ekkei a turutiw lemataw. Iwe, eú na úlúngátin ewe mataw a wiliiti chcha, 9 me eú na úlúngátin ekkewe ménúmanaw lemataw ra máló, me eú na úlúngátin ekkewe siip ra taló.

10 Ewe aúlúménún chónláng a ettiki néún we rappwa. Iwe, eféú fúú mi fókkun féúmmóng mi ngetenget ussun eú lamp a turutiw seni láng, me a turutiw wóón eú na úlúngátin ekkewe chénúpupu me wóón ekkewe puwachchen konik. 11 Iten ewe fúú, Maras.* Eú na úlúngátin ekkewe konik ra maraseló ren, me chómmóng aramas ra máló ren ekkena konik, pún ra maras.

12 Ewe aféménún chónláng a ettiki néún we rappwa. Iwe, eú na úlúngátin ewe akkar me eú na úlúngátin ewe maram me eú na úlúngátin ekkewe fúú ra kirocholó. Iwe, ese wor saram lón eú na úlúngátin ewe rán pwal lón eú na úlúngátin ewe pwiin.

13 Mwirin úa kúna emén ikel mi ákkáás fán láng mi apasa fán léúwommóng: “Feiengaw, feiengaw, feiengaw ngeni chókkewe mi nóm wóón fénúfan pokiten ewe méngúngú mi feito seni ekkewe rappwa ekkewe úlúmén chónláng repwele ettiki!”