Eú Pwáraatá Ngeni Jon
9 Ewe enimménún chónláng a ettiki néún we rappwa. Iwe, úa kúna eféú fúú a turutiw seni láng ngeni wóón fénúfan, me Kot a ngeni kiien pwangen ewe apis. 2 A suuki pwangen ewe apis me a étúwu étúét me lón ussun étúétún eú watteen umw mi sarara, iwe ewe akkar me pwal ewe ásepwál ra kirocholó ren ewe étúét mi étúwu me lón ewe pwaang. 3 Iwe, lifichifichimas ra towu seni lón ewe étúét o towu wóón fénúfan. Kot a ngeniir manaman, ewe esin manaman ekkewe scorpion wóón fénúfan ra eáni. 4 A ereniir ar resap efeiengawa ekkewe fetil wóón fénúfan are och petewel are efóch irá, nge ekkewe chék aramas án Kot pwaau ese nóm wóón chamwer.
5 A mumu ngeni ekkewe lifichifichimas ar repwe eriáfféwúr úkúúkún nimu maram, nge resap nireló. Ena riáfféú repwe kúna, epwe ussun riáfféún emén lupwen emén scorpion a kkúú. 6 Lón ekkena atun, aramas repwe kútta máló nge resap fókkun kúna. Repwe áneánei ar repwe máló, nge máló epwe chék sú seniir.
7 Napanapen ekkewe lifichifichimas ra ussun oris mi mmólnetá le maun. A wor epa mwárámwár kolt wóón chamwer, nge wóón meser a ussun wóón mesen aramas, 8 nge meten mékúrer a ussun meten mékúren fefin. Nge ngiir a ussun ngiin laion. 9 A wor chechchen leupwer ussun chechchen leupw mi ffér seni mechá. Nge úngúúngún péúkásiir, a ussun úngúúngún woken oris ra lukiir le ssálong lón maun. 10 Pwal och, a wor úkúúr mi wor máchewan ussun máchewen scorpion, me a nóm wóón úkúúr ar manamanen efeiengawa ekkewe aramas ren úkúúkún nimu maram. 11 A wor emén néúr king, i chónlángin ewe apis. Itan lón kapasen Ipru, Apaton,* nge lón kapasen Krik, Apolion.*
12 A wes ewe eú feiengaw. Nge nengeni, epwe pwal wor ruu feiengaw repwe fis mwirin ekkeei mettóch.
13 Ewe awonoménún chónláng a ettiki néún we rappwa. Me úa rong eú méngúngú mi feito seni lepwokukuun* ewe róngen asor mi ffér seni kolt mi nóm mwen mesen Kot, 14 a ereni ewe awonoménún chónláng mi wor néún rappwa: “Kopwe epichi ekkewe fémén chónláng mi féfé lón ewe chénúpupu mi watte, Iufretis.” 15 Iwe, ekkewe fémén chónláng ra pichiló, ekkewe mi ammól ngeni ewe kulók me rán me maram me ier ar repwe nieló eú na úlúngátin ekkewe aramas.
16 Úa rongorong úkúúkún chóchóón ekkewe soufiu mi wawa oris, iir rúúépúkú million. 17 Nge iei napanapen ekkewe oris me chókkewe mi wawa úa kúna lón ewe lángipwi: Chechchen leupwer a parapar ussun ekkei, araw, me oleol, nge chamwen ekkewe oris ra ussun chamwen laion, me a towu me lón awer ekkei, étúét, me primiston. 18 Eú na úlúngátin ekkewe aramas ra ninniiló ren ekkeei úlúngát feiengaw, ren ewe ekkei me ewe étúét me ewe primiston mi towu me lón awen ekkewe oris. 19 Pún án ekkewe oris manaman a nóm lón awer me wóón úkúúr kewe, pún úkúúr kewe ra ussun serepenit mi wor chamwer, me ra áeá le efeiengawa ekkewe aramas.
20 Nge ekkewe lusun aramas, iir kewe rese ninniiló ren ekkeei feiengaw, rese áier seni ar kewe angang.* Rese úkútiw le fel ngeni ekkewe timon me ekkewe uluulun mi ffér seni kolt, silifer, piras, faw, me émwúch, ekkewe rese tongeni kúner, rongorong, are fetál. 21 Rese pwal áier seni ar nimanaw are féri angangen roong are féfférún lisowumwáál* are solá.