Kapong Ngeni Filáik, Úttút me Angangen Mwú nge Ese Álisatá Maun

Kapong ngeni filáik. Chón Pwáraatá Jiowa ra lúkú pwe án emén chapetiw are kapong ngeni ewe filáik, lap ngeni mi fiti ttikin ewe kélún mwú nge ina eú angangen fel mi pwári pwe amanawen aramas a feito seni mwúún fénúfan are sou nemeneman nge ese feito seni Kot. (Aisea 43:11; 1 Korint 10:14; 1 Johannes 5:21) Emén me lein ekkena sou nemenem, ina i King Nepukatnesar, ewe kingen Papilon me lóóm. Ren án ena king mi péchékkúl einga ngeni aramas tekian me tinikkenin lón an angangen fel, a aútáái eú ululun mi watte me aumwesi ekkewe mi nóm fán nemenian ar repwe chapetiw ngeni atun a ttik eú nikáttik, usun chék ewe kélún mwú. Iwe nge ekkewe úlúmén re Ipru iter Satrak, Mesak me Apetneko rese mochen chapetiw ngeni ewe ululun, inaamwo ika repwe kúna kapwúngún máló.​—Taniel, sópwun 3.

Emén sou uruwo itan Carlton Hayes a makkeei pwe lón ach ei fansoun ewe filáik ina “eú mettóch aramas ra fel ngeni. Ekkewe mwán ra pwiliti imwer akkaw atun ewe filáik a pássiniir. Ekkewe soumak ra makkeei kúúkúún fós mi mwareiti ewe filáik me ekkewe semirit ra eáni kélún lamalam.” A pwal apasa pwe pokiten tongen fénúer, a wor “rán mi pin” fán itan, usun chék an chón Chuuk we FSM Independence Day me ewe Fourth of July lón Merika. A pwal wor néúr kewe aramas mi pin me itéch. Lón Brazil, ewe meilapen soufiu a ereni eú pwiin aramas pwe “aramas ra kon aúcheani ewe filáik me fel ngeni . . . usun chék ar fel ngeni pwisin fénúer.” The Encyclopedia Americana a apasa: “Ewe filáik a pin, usun chék ewe irápenges.”

Ena encyclopedia a kerán chék apasa pwe ekkewe kélún mwú, iir “esissillen tongei ewe mwú me lap ngeni lón ekkena kél ra usun iótekin tingor pwe Kot epwe emmweni me túmúnú ekkewe aramas are néúr kewe sou emmwen.” Ina popun néún Jiowa kewe chón angang ra pwáraatá mirit lón ar lúkú pwe féfférún tongen mwú, kapachelong kapong ngeni filáik me eáni ekkewe kélún mwú, ina eú angangen fel. Iei met ewe puk American Character a erá atun a fós usun néún Chón Pwáraatá Jiowa kewe semirit rese kapong ngeni filáik are pwon fán akkapél ngeni ewe filáik lón ekkewe sukul lón Merika: “Ekkena féffér iteiten rán iir angangen fel, ina met ewe Kapwúng Tekia a fen affata ngeni aramas lón ekkewe osukosuk ra angang wóón.”

Néún Jiowa kewe aramas ra súféliti án ekkewe ekkóch pwúúng le féri ekkena féffér mi pwáraatá tongen mwú inaamwo ika rese fiti pokiten ra lúkú pwe Paipel ese tipeeú ngeniir. Ra pwal súféliti ekkewe filáik mi tupuni ewe mwú me ra mirititi pwe repwe álleasochisi ekkewe sou nemenem mi fen kefilitá usun “nöün Kot chon angang.” (Rom 13:1-4) Ina popun, kich Chón Pwáraatá Jiowa sia álleasochisi ei kapasen éúréúr pwe sipwe ióteki “ekewe king me ekewe nöüwis meinisin” pwe epwe wor ach “manau fän mosonoson me kinamwe, sipwe pwal asamolu Kot o aramasöch ngeni aramas.”​—1 Timoty 2:2.

Úttút lón án ewe mwú ránin úttút. Chón Kraist mi enlet ra súféliti án ekkewe ekkóch pwúúng le úttút. Rese ú ngeni ewe angangen úttút nge ra álleasochisi ekkewe ra kefilitá. Iwe nge, rese fókkun angolong lón mwékútúkútún ekkewe mwú. (Mateus 22:21; 1 Petrus 3:16) Met emén Chón Kraist epwe féri lón ekkewe fénú mi allúk pwe meinisin repwe úttút? Met epwe pwal féri lón ekkewe leeni ikewe ie aramas ra fókkun oput chókkewe rese ló ngeni ekkewe leenien úttút? Án emén Chón Kraist chemeni pwóróusen án Satrak, Mesak me Apetneko ló ngeni ewe masies Tura, neman ina met epwe pwal filatá ika epwe ló lón ewe leenien úttút ika mwelien letipan ese aosukosuka. Iwe nge, mi lamot epwe túmúnú pwe esap pekini eú pekin. Mi lamot epwe ekieki ekkeei wonu kapasen emmwen:

1. Néún Jesus kewe chón áppirú rese “peekini fönüfan.”​—Johannes 15:19, Agapé.

2. Chón Kraist ra tupuni Kraist me an we Mwú.​—Johannes 18:36; 2 Korint 5:20.

3. Mwichefelin Chón Kraist ra tipeeúfengen lón ar lúkú me chón ekkewe mwichefel ra pinúkfengen ren án Kraist tong.​—1 Korint 1:10; Kolose 3:14.

4. Atun chókkewe ra útti emén néúwis, ra pwal kapachelong lón minne a féri.—Nengeni ekkewe kapasen emmwen mi mak lón 1 Samuel 8:5, 10-18 me 1 Timoty 5:22.

5. Jiowa a ekieki pwe án chón Israel tipeni pwe epwe wor néúr king, ina esissillen ar oput I.​—1 Samuel 8:7.

6. Chón Kraist repwe eáni pwora atun ra afalafala ewe Mwúún Kot ngeni aramas meinisin mi pekini sókkópaten mwúún fénúfan pwe repwe silei pwe Chón Kraist ra chék pekini án Jiowa we Mwú.​—Mateus 24:14; 28:19, 20; Ipru 10:35, TF.

Angangen mwú nge ese álisatá maun. Lón ekkóch fénú, ewe mwú a allúkú pwe chókkewe rese fiti angangen maun repwe fiti och sókkun angangen mwú nge ese álisatá maun lón och fansoun mi kaúk. Ika sipwe féri kefil wóón met sókkun angangen mwú, mi lamot sipwe iótek usun, are neman fós ngeni emén Chón Kraist mi ásimaw. Mwirin, sipwe áeá mwelien letipach le féri kefil mi lóngólóng wóón met sia káé usun ena mettóch.​—Än Salomon Fos 2:1-5; 11:14.

Án Kot we Kapas a erenikich pwe sipwe “aleasochis ngeni ekewe samol me sounemenem, repwe pwal molotä ngeni ar repwe föri sokun föför mi mürina” me tipemirit. (Titus 3:1, 2) Ina popun, sipwe eisini pwisin kich ekkeei kapas eis: ‘Ai etiwa eú angangen mwú epwe atai ai lúkú usun án Chón Kraist resap pekini epek ika epwe efisi ai upwe angolong lón angangen lamalam chofona?’ (Mika 4:3, 5; 2 Korint 6:16, 17) ‘Ai féri ena angang epwe áweiresiei le apwénúetá wisei wisen Chón Kraist are pwal mwo nge eppetiei le apwénúretá?’ (Mateus 28:19, 20; Efisos 6:4; Ipru 10:24, 25) ‘Are kókkótun ena angang epwe efisi ai upwe alapaaló ai angangen Chón Kraist, are fen pwal mwo nge fiti ewe angangen pioneer?’​—Ipru 6:11, 12.

Ika mwelien letipen emén Chón Kraist a kinamwe ren an féri ena angangen mwú ese álisatá maun lap seni an epwe kalapus, iwe chiechian kewe Chón Kraist repwe súféliti filian. (Rom 14:10) Ikaamwo ese féri ena angang nge repwe pwal chúen súféliti filian.​—1 Korint 10:29; 2 Korint 1:24.