Kapasen Emmwen fan iten Ach Sipwe Filata Chienach Kkewe

EKKEWE kukkun ra kan kukkutta emmwen seni chiener kkewe lap seni semer kkewe me iner ussun ufer kkewe me ekkewe nikatik, iei alon eu repot lon ewe Reader’s Digest. Ina minne, a lamot ngeni ekkewe sam me in ar repwe silei io nour kkewe ra chiechi ngeni me ia ra kan feilo ia.

“Ina wisom pwe kopwe cheki,” iei alon Esmé van Rensburg, emon sou afalafal lon ewe sukulen psychology lon ewe South African university. A pwal apasa: “Ese mwaal noum we epwe song ngonuk, nge epwe morelo.” Mwirin, a awora ngeni ekkewe sam me in ekkoch kapasen emmwen. Ekkewe alluk repwe ititioch me awora och lesen; auseling ngeni noum we, kesap songokai, nge kopwe mosonoson, me kopwe silei met kopwe apasa. Ika noum we a fen chiechi ngeni emon mi ingau, kapas ussun ekkewe fofformwaal ar chiechifengen a fen efisata lap seni om kopwe pinei ar chiechifengen.

Seni lom a wor ekkewe kapasen emmwen mi murinno lon an Kot we Kapas, ewe Paipel. Awewe chok, a apasa: “Repwe muttir le rong, repwe mang le kapas, repwe mang le song.” (Jemes 1:19) Ewe Paipel a pwal awora ei fon mi murinno ussun ir kkewe sipwe chiechi ngeni: “Emon mi chiechi ngeni aramas mi tipachem epwe tipachem, nge emon mi chiechi ngeni ekkewe chon tiparoch epwe feiengau.” (Än Salomon Fos 13:20) Ekkeei leenien appiru a aiti ngenikich tipatchem me suuk ngeni ir kkewe mi alleani ewe Paipel me akkapwonueta minne a apasa lon manauer.