Mettoch Aramas Ra Ingelo Ren Fansoun Nangattam

I TEITEN ier, Chon Pwarata Jiowa lon en me fonuer ra kan chufengen lon an chon Kraist kewe mwichelap. Ra foffori ena mettoch fan iten ar repwe pochokkuleta lon pekin ngun ren ar auseling ngeni porausen Paipel me ar chiechifengen. Nge pwal ekkoch mettoch lon ar kewe mwich a pwal tongeni efisata minne aramas repwe ingelo ren fansoun langattam.

Ren chok awewe, lon 1999 fan July, fite ngerou Chon Pwarata ra chufengen lon Mozambique ukuukun ulungat ran lon ewe mwichelap mi iteni “God’s Prophetic Word” District Convention. Ren chommong chon fiti, a ina keran aewin ar fiti eu mwichelap. Sap minne ra chok ingelo ren ekkewe afalafal ra rong, nge ra pwal ingeiti minne ra kuna lon leenien ewe mwichelap.

Iei alon emon mi nom lon ewe Maputo Assembly Hall: “A iei keran aewin ewe fansoun ua kuna ei sokkun leeni mi lingoch lon unusen manauei! A wor soop me kinasen ori lon ekkewe imwen ngaselo, me a ussun ita sia tufichin tini limochuur. Ewe leenien mwich a kinamwe me esor akurang seni semirit mi fiffiu. Ese pwal wor aramas mi owurumou. Ua kuna sarafo mi pwapwa ar ra fosfengen ussun mettoch mi murinno. Ua pwal ingeiti torotorochun ufen meinisin chon fiti. Ika upwe fiti pwal eu mwichelap, upwe uwei nei kewe me etipetipa puluwei we pwe a mmen lamot ach sipwe fiti ewe mwichelap.”

Ewer, aramas ra kan kuna wenecharen, tuppwolun, me limochun Chon Pwarata Jiowa. Pwata ra sokkolo ekkewe Chon Pwarata? Popun, pun ra wesewesen achocho ngeni ar repwe apwonueta minne ra kaeo seni ewe Paipel. Pwata kosap fitiir lon ei ier lon ar kewe mwichelap are lon ar kewe mwich iteiten wiik lon ar we Kingdom Hall me pwisin pi ewe popun ar ra sokkolo seni aramas?

[Picture on page 32]

ZAMBIA

[Picture on page 32]

KENYA

[Picture on page 32]

MOZAMBIQUE