“Mei Pwung Reom, Manau A Fokkun Murinno!”

EN mi mochen silei wesewesen weween manau? Magdalena, engol me walu ierin, me emon Chon Pwarata Jiowa mi nonnom lon Szczecin, Poland, a alisi chienan we lon sukul itan Katarzyna ren an epwe silei ena mettoch. Katarzyna emon ese luku pwe mei wor emon Kot, nge lupwen Magdalena a fos ngeni i ussun ewe Paipel, a fokkun mochen auseling.

Inaamwo ika Katarzyna a saani met Magdalena a aiti ngeni seni ewe Paipel, nge ese tongeni unusen luku. Lupwen a kapas ngeni Magdalena ussun chiechi mi enlet, Katarzyna a apasa: “Mei wor reom ewe Paipel, en mi silei ekkewe kapasen alongolongun alluk kopwe fiti me ia kopwe kuna chiechiom. Nge epwe ifa ussun chokkewe resaamwo tongeni etiwa ekkenna kapasen alongolongun alluk?”

Met a alisi Katarzyna a fisita lupwen a sailo ngeni London, England. A chuuri an Chon Pwarata Jiowa branch ofes lon ena fonu, me kirokirochun ekkewe aramas ngeni a achungu letipan. A saani ekkewe mettoch ra fori, awewe chok ar suuki asam fan itan me ar pwarata pwe ra mochen rongorong met a apasa.

Lupwen a poputasefal sukul fan September 2001, Katarzyna a poputa le kaeo Paipel. A alapalo an aucheani ekkewe kapasen alongolongun alluk seni ewe Paipel me a poputa le apwonuureta lon manauan. Kanoto chok, a ereni Magdalena: “Ua meefi pwe ua ussun ita poputa eu minefoon manau.” A pwal apasa ei poraus won phone: “Kilisou chapur ren ach kaeo ikenai! Mei pwung reom, manauach a fokkun murinno! A fokkun murinno pwe sia silei io sipwe kilisou ngeni fan iten manauach.”