Achechemenien Ekkewe Chon Pwarata Jiowa Mi Nninniilo
LON March 7, 2002, ewe telinimwen Körmend a nonnom notowun Hungary a fori eu esissinnen achechchem. A chechchemeni maloon ulumon Chon Pwarata Jiowa ekkewe Nazi ra nnielo lon 1945.
Ewe esissinnen achechchem a pacheta won etiippen ewe ofesin ewe fire department lon Hunyadi Road, ia ekkewe ulumon ra nninniilo ie. Ewe esissinnen achechchem a ffor fan iten ‘ekkewe chon Kraist mi nninniilo pokiten ar luku lon March 1945. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Chon Pwarata Jiowa.’
Ekkewe ulumon ra nninniilo ruu chok maram mwen wesiloon ewe Oruuen Maunen Fonufan. Met popun ra nninniilo? Ewe simpung lon Hungary itan Vas Népe a apasa: “Mwirin poputaan an Hitler nemenem lon Tois, esap chok ekkewe chon Jus nge pwal ekkewe Chon Pwarata Jiowa ra riaffou mwaal me kawet, me ra kalapus me malo ika rese poutalo ar lamalam. . . . Lon March 1945, niuokkus watte a nemeni notowun Hungary. . . . Eu popun ewe niuokkus pokiten an ekkewe sou nemenem atowu Chon Pwarata Jiowa seni leenier me nniirelo.”
Mei wor ruu kinikinin ewe prokram fan iten ewe esissinnen achechchem. Ewe aewin a fis lon ewe leenien mwich mi watte lon Batthyány Castle, ia Professor Szabolcs Szita, meilapen ewe Holocaust Documentation Center lon Budapest; László Donáth, emon mi choni ewe Parliament’s Committee fan iten Human Rights, Minority me Religious Affairs; me Kálmán Komjáthy, emon a kuna nninniiloon ekkewe ulumon me a wiiseni ewe wiis sou uruwoon ewe telinimwen Körmend ra eani afalafal ie. Mwirin, ekkewe lap seni 500 mi fiti ewe mwich ra fetal ngeni ewe leeni fan iten ewe oruuen kinikinin ewe prokram—ia Mayor József Honfi lon Körmend a suukalo ewe esissinnen achechchem ie.
Lon an saingoon taropween kapong, Ján Žondor (János Zsondor) a pese ngeni chienan kewe chon Kraist pwe resap letipechou. A makkei: “Ua ekieki ussun an Jon kewe kapas lon Pwarata 2:10: ‘Kopwe tuppwel tori malo.’ . . . Ereni chokkewe lon leeniei we pwe resap letipechou, pokiten ua malo fan iten ewe enlet nge esap ussun emon chon atai alluk.”
[Picture on page 32]
Bertalan Szabó
[Picture on page 32]
Antal Hőnisch
[Picture on page 32]
Ján Žondor