Eu Porausen Sai Mi Amwarar

RICHARD E. Byrd a sailo Antarctica fan limu lefilen 1928 me 1956. Pokiten an a makkei pwisin porausan lon eu puk me pokiten ewe poraus ussun ewe sai mi titchik me a makketiu lon eu puk, ei mwan me chiechian kewe ra tongeni kaeo mwokutukutun asapwal, ammonlata map, me angei chommong silei ussun Antarctica.

An Byrd kewe sai a pwalo aucheaan an aramas makkei lon eu puk poraus mi titchik ussun ar sai. Lon ei sokkun puk, epwe makketiu poraus mi titchik ussun eu sai won siip are won sepilin. Aramas mi tongeni kaeo ei poraus ren ar repwe enniwili met a fen fis atun ewe sai are kaeo poraus mi auchea fan iten ekkewe sai lon mwach kkan.

Ewe Paipel a awora porausen ewe Nooter lon ranin Noa we. Ttamen ewe Nooter a lap seni eu ier. Noa, puluwan we, me nour kewe ulumon me puluwer kewe ra angang 50 are 60 ier fan iten ar repwe falei efoch waaimw​—⁠efoch waa mi fokkun watte, saisin orun 1,400,000 cubic feet, ren ar repwe ammonlata mwen ewe Nooter. Met popun ra fori ewe waaimw? Ewe waaimw epwe tumunu manauen ekkoch man me aramas atun ewe Nooter.​—Keneses 7:​1-3.

Sipwe tongeni era pwe porausen ewe Nooter lon ewe puken Keneses a ussun chok an aramas makkei porausen ar kewe sai won siip are sepelin ikenai me a kapachelong porausen an Noa sai seni le poputaan ewe Nooter tori Noa me an we famili ra towu seni ewe waaimw. Mei wor poraus lon mi auchea fan itach ikenai?