Tong A Wenewenen Lamot
ESE lifilifil ika fite ierir, are met ar lewo, are menni fos ra eani, are menni einang ra popu seni, nge aramas meinisin ra fokkun tipeni ar repwe kuna tong seni aramas. Ika aramas rese kukkuna tong, resap pwapwa. Iei makkeien emon sou kaeo lon pekin safei: “Tong me pacheoch, ir alongolongun minne epwe tongeni asemmwenikich me apochokkulakich, minne epwe tongeni atoto letipechou me pwapwa, minne epwe tongeni eriaffoukich me achikarakich. Ika eu minefoon safei epwe tufichin fori ena mettoch, iteiten tokter meinisin lon fonuach ei repwe pesei chokewe mi etto safei rer ar repwe angei. Epwe ussun ita repwe ipweri alluk ika resap fori ena mettoch.”
Iwe nge, ei pilon aramas, nge akkaewin ekkan minen aporaus me ekkan aramas mi itefoulo, ra kan akkomwa wouun fonufan, pochokkulen nemenem, itepwa, me foffor lefilen mwan me fefin, nge esap ewe sokkun tong me chiechioch mi wesewesen lamot ngeni aramas. Chommong mi angang lon pekin sukul ra kan menlapei ekkan ekiek me wiis are angang tekia mi choufetal lein aramas, pun meefier nge ikkena ekkewe mettoch sopwochun aramas a kan longolong won. Mi enlet pwe a lamot sukul me an aramas angochuur ren met ra lipwakoch lon, nge sipwe ita akkomwa ekkena mettoch, iwe mwirin, esap wor ach fansoun fan iten ach famili me chienach kewe? Emon chon lom mi fiti sukul tekia, nge i emon soumak mi miritiitiochu lapalapen aramas, a makkei pwe ika emon aramas a angoch le fori chommong mettoch, nge esor an tong, a ussun “ngingin mecha mi akurang o leuwommongen tikin eu pel.” Eli ena sokkun aramas epwe pisekisekilo, are pwal mwo nge itefoulo, nge esap wesewesen pwapwa.
Jises Kraist, emon mi wewefichiiti me aucheani aramas, a akkomwa tong ngeni Kot me chon oruch lon an angangen afalafal. Iei alon: “Kopwe tongei Jiowa om Kot ren unusen letipom me unusen manauom me unusen ekiekum. . . . Kopwe tongei chon orum ussun om tongei pwisin en.” (Mattu 22:37-39, New World Translation) Chokewe chok mi apwonueta ekkena kapas repwe wesewesen noun Jises chon kaeo. Ina minne, pwal iei alon: “Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.”—Jon 13:35.
Iwe nge, ifa ussun emon epwe tongeni amaarata tong lon ei fansoun? Ifa ussun ekkan sam me in repwe tongeni aiti ngeni nour kewe ifa ussun repwe pwarata tong? Ena eu poraus mwirin ei epwe polueni ekkena kapas eis.
[Pictures on page 3]
A mmen weires ach sipwe amaarata tong lein chon ei fonufan mi nom fan nemenien tipemmong