Ka Tongeni Likiitü Fän Osukosuk
LON ei fansoun weires, chommong ra likiitü fän watteen osukosuk mi ussun chök mölümöl. Nge ren Chon Kraist, ar tongei Jiowa me än kewe kapasen alongolongun allük a älisiir le pwäkini. Ifa ussun? Pölüen ei kapas eis a pwä lon än Jises kapas awewe. A alöllö nöün kewe chon käeö mi älleäsochis ngeni “emön mwän mi tipatchem, a aüetä imwan woon achau.” Jises a erä: “A püng ütemong, chanpupu ra pwotä o pufetal o asepwäl a pöchökkül le eniti ewe imw. Nge ewe imw esap turula, pun a kaütä won achau.”—Mattu 7:24, 25.
Iwe, inaamwo ika ewe mwän lon ei kapas awewe a tipatchem, nge mi chüen chök küna fansoun osukosuk watte, ewe a liosutiu ren püngümwongun rän, pwotään chanpupu, me enienin asapwal. Ina minne, Jises ese erä pwe nöün kewe chon käeö repwe ngaselo seni ekkewe weires meinisin me pwapwaesini manauer lon kinamwe me lükülüköch. (Kölfel 34:19; Jemes 4:13-15) Nge a erä pwe nöün Kot kewe chon angang mi tuppwöl repwe tongeni mmolnetä ngeni me mökürochou fän ekkena sokkun watteen osukosuk mi watte me fitikoko.
Jises a poputäni ewe kapas awewe ren än erä: “Iei minne, iteiten aramas meinisin mi rong ai keei kapas, nge a pwal fori, epwe wewe ngeni chok emon mwan mi mirit, a auta imwan won achau.” Pwüngün pwe Jises ese kapas ussun än aramas wesewesen aüetä imw, nge a kapas ussun kaufichietään manau. Ir mi alleasochisi alon Kraist ra mirit me kefiliöch. Ra aüetä minne a amwökütüür me ar kewe föfför woon äitien Jises kewe mi lüküchar ussun chök eü achau ren ar föfföri minne met ra fen käeö. A fokkun amwarar pwe ei faü ese pwätä woon ppwul. Ewe mwän lon ei kapas awewe epwe “tuw alololetiu” pwe epwe ttikeri. (Luk 6:48) Pwal ussun chök, nöün Jises kewe chon käëo ra fokkun angang weires pwe repwe ämääraatä ewe esin napanap epwe atufichiir ar repwe arap ngeni Kot.—Mattu 5:5-7; 6:33.
Met a fis atun watteen osukosuk a sotuni tipepposun longolongun nöün Kraist kewe chon äppirü? Ar tipemecheresin älleäsochisi äitien Kraist kewe me pwal ar napanapeni napanapen Kraist epwe fokkun apöchökküleretä lon fansoun weires, me, äkkäeüin, lon Armaketon. (Mattu 5:10-12; Pwäratä 16:15, 16) Ewer, ren ar apwönüetä äitien Kraist kewe, chommong ra chök likiitü lon fansoun osukosuk. Ka pwal tongeni ina ussun.—1 Piter 2:21-23.