Kapas Eis Seni Chon Älleä
Pokiten a wor eü allük ngeni chon Jus ar resap möngö “och fiti iis” atun ewe Pasofer, met popun Jises a äeä wain, weween, och mettoch mi ussun itä lefenilo, lupwen a poputäni Ächechchemenien an mälo?—Ekistos 12:20; Luk 22:7, 8, 14-20.
Ewe Pasofer, ächechchemenien än Chon Jus towu seni Isip, a poputä lon 1513 B.C.E. Iei alon Jiowa lupwen a äiti ngeniir met repwe föri: “Ousap fokun mongö och fiti iis, pun lon leniemi meinisin oupwe chök mongö pilawa esap wor iis lon.” (Ekistos 12:11, 20) Ena allük seni Kot a chök weneiti ewe sokkun pilawa repwe möngö atun ewe Pasofer. Ese mak och pworaus ussun wain.
Iei äkkäeüin popun esap wor mettoch mi lefen, pun a atapwal än chon Israel sü seni Isip. Ekistos 12:34 a apasa pwe “Iwe, ekewe aramas ra angei ener pilawa mi öüwöü esamwo wor iis lon fiti sepier le öüwöü o firoskini, pwe repwe öüafara.” Ika esap wor mettoch mi lefen lupwen chon Israel repwap föri ewe Pasofer mwirin, iwe, epwe ächchema ngeni ekkewe täppin aramas repwap tapwoto ussun ena pworaus mi lamot.
Mwirin och fansoun, aramas ra poputä le ekieki pwe lefen a liosuetä tipis are mettoch mi ngaü. Awewe chök, ewe aposel Paul a eäni ei kapas eis lupwen a fos ussun emön mi tipis lon ewe mwichefelin chon Kraist: “Ousap silei pwe ekis chök iis a apwola unusen eu pilawa?” Mwirin, a pwal erä: “Oupwe atowu ewe issin lom, a aliosunätä tipis, pwe oupwe wesewesen limöch. Mürin oupwe wewe ngeni pilawa mi fö a öüwöü, esap wor iis lon. . . . Pun Kraist ach we Lamen Pasofer a fen ninnila. Iei mine ousipwe föri ewe mongön Pasofer, sap ren ewe pilawa mi wor ewe issin lom lon, a aliosunätä tipis me föföringau, nge ren ewe pilawa esap wor iis lon, a aliosunätä limöch me let.” (1 Korint 5:6-8) Ewe chök sokkun pilawa ese lefen epwe tongeni liosuetä inisin Jises we esor tipisin.—Ipru 7:26.
Chon Jus repwap poputä le äeä wain lon ewe Pasofer lon ekkewe fansoun mwirin. Neman a kapachelong mwirin ar liwinsefäl seni ewe fansoun choisä lon Papilon. Ese mak lon Paipel pwe a ngaü ena föfför, ina popun, esor ngaüen än Jises äeä wain lon ewe Pasofer. Pwüngün pwe a sokkolo wililoon chönün krep ngeni wain seni lefeniloon pilawa. Ren pilawa mi amas, epwe lefenilo ika sipwe walong iis. Nge esap ina ussun wain mi för seni krep. Minne chönün krep epwe wiliti sakau ren a pükün nom lon föün krep. Esap tongeni wor chönün krep atun ewe Pasofer, pun ewe räsin krep a fis fite maram mwen ewe Pasofer, weween, chönün krep meinisin repwe fen wililo ngeni wain me mwen ewe Pasofer.
Ina minne, än Jises äeä wain fän iten Ächechchemenien an mälo ese ü ngeni allükün ewe Pasofer ussun lefen. Sipwe tongeni äeä wain mi par meinisin fän iten an epwe liosuetä “chchaan Kraist mi aüchea,” ika esor och mettoch mi nofit ngeni fän iten an epwe siwili nennan.—1 Piter 1:19.