Lamoten ewe Tänipiin Ichen Ngonuk

EÜ ME lein ekkewe kapasen eppet mi kon ämäirü ekkoch sou tipatchem ra epiietä usun pworausen Ichen, ina ar erä pwe ekkewe lusun puken Paipel rese pwal pworaus usun. Äwewe chök, Paul Morris, senseen pekin käeöön lamalam a makkeei: “Lon pwal ekkoch kinikinin Paipel, rese kapas sefäl usun ewe tänipiin Ichen.” Inaamwo chommong sou silelap ra tipeeü ngeni, nge alon na a ü ngeni ekkewe pworaus mi enlet.

Ren enletin, ewe Paipel a fos fän chommong usun mälämälen Ichen, Atam, If, me ewe serepenit.a Pwüngün, ekkena sou tipatchem ra mwäällilo le eäni ena ekiek, nge mi pwal wor mi kon watte seni me chöüfetäl. Ina ren än ekkewe nöüwisin lamalam me sou esiita Paipel apasa pwe ese pwüng pworausen Ichen, iwe, ra wesewesen erä pwe ese pwal pwüng ewe Paipel. Ifa usun?

Ach weweiti met a fis lon Ichen a lamot lon ach weweiti unusen ewe Paipel. Äwewe chök, a kawor än Kot we Kapas pwe epwe älisikich le küna pölüwen ekkewe kapas eis mi fokkun lamot ngeni aramas. Nge iteitan, minne Paipel a pölüwen ngeni ekkena kapas eis a riri ngeni met a fis lon Ichen. Nengeni ekkoch me leir.

● Pwata sia chinnapelo me mälo? Itä Atam me If repwe manau tori feilfeilo ika repwe äkkälleasochisi Jiowa, repwe chök mälo ika repwe ü ngeni. Iwe, lon ewe rän ra älleasolapa Kot, ra poputä le mälo. (Keneses 2:16, 17; 3:19) Rese chüen unusöch iwe mwirimwiriir kewe rese pwal unusöch. Ewe Paipel a äweweei: “Ren emön mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.”​—Rom 5:12.

● Pwata Kot a mutatä föfföringaw? Lon ewe tänipiin Ichen, Setan a erä pwe Kot emön chon kapas chofona mi amwöchü seni förian kewe minne a öchitiir. (Keneses 3:3-5) Ina minne, a epiietä tipemwaramwar usun än Jiowa pwüüng le nemenem. Atam me If ra filatä le fiti Setan; iwe ra pwal ü ngeni än Jiowa pwüngün nemenem, weween ra erä pwe aramas ra tongeni pwisin filatä met mi pwüng me mwääl. Ren unusöchün än Jiowa pwüng me tipatchem, a silei pwe ewe chök alen an epwe ataweei ena osukosuk, an a mut ngeni aramas och fansoun le pwisin nemeniir. Pokiten ar pwisin nemeniir pachelong än Setan ekketipetiper a fis föfföringaw. Iwe, ekis me ekis a pwälo ei pworaus mi fokkun enlet: Aramas resap tufichin pwisin nemeniir me lükün Kot.​—Jeremaia 10:23.

● Ifa än Kot kokkot ngeni fönüfan? Lon ewe tänipiin Ichen, Jiowa a föri ena leeni pwe epwe wesewesen lingöch. A ewisa Atam me If ar repwe aüralo fönüfan ren mwirimwiriir kewe me ‘nemeni,’ pwe unusen ei fönüfan epwe wor tipeeü me epwe lingelo. (Keneses 1:28) Ina minne, Kot a akkota pwe ei fönüfan epwe eü paratis mi masou ren nöün Atam me If kewe mi unusöch me tipeeüfengen. Lap ngeni masouen ewe Paipel a pworaus woon ifa usun Kot epwe apwönüetä an na kokkot me lepoputään.

● Met popun Jises Kraist a feitiw fönüfan? Ewe föfförün ü ngeni lon Ichen a efisatä mälo ngeni Atam me If me mwirimwiriir kewe, nge ren än Kot tong a awora eü äpilükülük allim. A tinato Nöün we woon fönüfan ren an epwe awora minne ewe Paipel a eita ngeni möön kepich. (Mattu 20:28) Met weween ena? Iwe, Jises i ewe “amüchülan Atam,” a sopwöch, nge Atam ese. Atun än Jises nonnom woon fönüfan a akkamwöchü manauan mi unusöch ren an äkkälleasochisi Jiowa. Mwirin, a asoresini manauan, me awora omusomusen tipis fän iten aramas mi tuppwöl, iwe repwe tongeni pwapwaiti ewe sokkun manau Atam me If ra eäni lon Ichen me mwen ar tipis. (1 Korint 15:22, 45; Jon 3:16) Ina minne, Jises a alükülükü pwe än Jiowa kokkot pwe ei fönüfan epwe wiliti eü paratis usun chök Ichen epwe pwönüetä.b

Än Kot kokkot a fokkun fataffatöch, esap chök och ekiekin lamalam. A wesewesen enlet. Usun chök ewe Ichen wesewesen eü leeni woon fönüfan mi masou ren wesewesen man me aramas, iwe än Kot pwon a fokkun lükülük, epwe wesewesen fis ekiselo chök. Iwe, kopwe wesewesen nom lon ena paratis? Epwe nonnom reom. Kot a mochen chommong aramas repwe eäni ena äpilükülük, pwal mwo nge chokkewe mi rukolo me aleni alen tipis.​—1 Timoti 2:3, 4.

Mwen än Jises we epwele mälo, a fos ngeni ewe mwän mi eitiwetä ünükün pokiten an föri mettoch mi ngaw. Ena mwän a silei pwe mi fich ngeni an epwe ninilo pun a atai allük. Nge a sap ngeni Jises an epwe küna aurur me äpilükülük. Iwe, Jises a ereni “Kopwe etiei lon Paratis.” (Luk 23:43) Itä Jises esap pwal mochen efeiöchuk usun chök an epwe efeiöchü me amanauasefäli ewe mwän mi föfföringaw me eäni äpilükülükün manau feilfeilo lon paratis? Ewer, Jises me Jiowa ra mochen! Ika ka mochen küna ena esin feiöch lon mwachkkan kopwe achocho le käeö usun Kot, ewe a föri ewe tänipiin Ichen.

[Ppii ekkewe pworaus fan]

[Lios lon pekin taropwe 10]

EÜ OESINI MI ERIRIFENGENI UNUSEN EWE PAIPEL

“Üpwe afiukemi [ewe serepenit] me ewe fefin, pwal mwirimwirum me mwirimwirin. Men epwe puri mökürom, nge en kopwe küw apilipilin pechen.”​—Keneses 3:15.

Ina ewe äkkäeüin oesini lon Paipel, Kot a apasa me lon ewe tänipiin Ichen. Iö keei fömön: ewe fefin me mwirimwirin, ewe serepenit me pwal mwirimwirin? Ifa usun a fis fiu lefiler?

EWE SEREPENIT

Setan ewe Tefil.​—Pwarata 12:9.

EWE FEFIN

Än Jiowa we mwicheich lon läng. (Kalesia 4:26, 27) Aisea a oesini usun emön “fefin” epwe nöünöü nge nöün na epwe wiliti eü mwu lon kapas äwewe.​—Aisea 54:1; 66:8.

MWIRIMWIRIN EWE SEREPENIT

Chokkewe ra filatä le föri letipen Setan.​—Jon 8:44.

MWIRIMWIRIN EWE FEFIN

Äkkäeüin Jises Kraist, i a feito seni än Jiowa we mwicheich lon läng. Pwiin Jises kewe mi fiti le nemenem lon läng ra pwal kapachelong lon ena ‘mwirimwir.’ Ekkena chon Kraist mi kepit ra choni eü mwu lon kapas äwewe, ina “ewe Israelin Kot.”​—Kalesia 3:16, 29; 6:16; Keneses 22:18.

FEIENGAWEN EPINIPININ PECHEN

Ewe Messaia a küna riäfföü nge ese nomofoch. Setan a efisi än Jises ninilo woon fönüfan, nge Jises a manausefälitä.

FEIENGAWEN MÖKÜRAN

Än Setan ninniilo. Jises epwe nielo Setan me epwe unusen morofochelo. Nge mwen ena, Jises epwe amoielo ekkewe mettoch mi ngaw Setan a poputääni me lon Ichen.​—1 Jon 3:8; Pwarata 20:10.

Ren pwal och pworaus usun itelapen ewe Paipel, ppi ewe puk The Bible​—What Is Its Message?, förien Chon Pwäratä Jiowa.

[Sasing lon pekin taropwe 11]

Atam me If ra küna pwününgawen tipis