Án Aramas Oesini, Ekkóch Ra Pwénútá, nge Chómmóng Rese

En mi mochen silei met epwe fis ngeni manawom lón mwachkkan? Chómmóng ra mochen silei. Iwe chómmóng aramas ra kan oesini usun met epwe fis lón mwach, ekkóch ar oesini ra pwénútá, nge chómmóng rese. Nengeni ekkeei mettóch:

• SCIENTIST ra kan áeá ekkewe mwesin mi kon mesemesekkis me tipachem me néúnéú watteen moni ren ar repwe tufichin silei met epwe fis ngeni sókkópaten mettóch, áwewe chék ren epwe ifa úkúkún feiengawen fénúfan pokiten limengawelóón, me ika epwe púng rán lesor lón leeniom.

• SOU TIPACHEM ra oesini usun fetálin ekkewe business me politics. Warren Buffett, i emén chón business me emén lein ekkewe mi fókkun pisekisek wóón unusen fénúfan. Ekkóch ra fen eita ngeni emén soufós pokiten a tongeni oesini ika menni business epwe win epwe tongeni awatteeló manawen néún moni. Nate Silver, pwal emén sou tipachem a tongeni oesini met epwe fis ngeni sókkópaten mettóch ren an áeá tipacheman lón pekin math le káéfichi sókkópaten repot, áwewe chék ren met epwe fis ngeni politics lón Merika me menni kachito epwe nampa eú me angei néún award.

• EKKÓCH MAKKEIEN ARAMAS LÓÓM aramas ikenái ra meefi pwe ra usun oesini. Ekkóch aramas ra meefi pwe makkeien emén mwán itan Michel de Notredame mi manaw nimepúkú ier lóóm, a pwénúetá lón ach ei fansoun. Néún chón Maya we pwinin maram a muchúló lón December 21, 2012, iwe ekkóch ra ekieki pwe ina esissillen warotoon eú watteen feiengaw wóón fénúfan.

• NÉÚWISIN LAMALAM ra oesini fán ekkóch pwe epwe fis watteen feiengaw wóón fénúfan pwe epwe eú minen éúréúr ngeni aramas me lukiir ngeni ar lamalam. Áwewe chék ren soufós Harold Camping me néún kewe chón káé, ra esilefetálei pwe ei fénúfan epwe taló lón ewe ier 2011. Nge ese fis.

• SOU PWEE ra kan erá pwe mi wor ar tufich mi kkóló aúchean le oesini usun met epwe fis lón mwachkkan. Edgar Cayce me Jeane Dixon ra oesini usun ekkóch mettóch epwe fis lón ekkewe ier 1901 ngeni 2000 nge ra pwénútá. Nge a pwal wor ekkóch mettóch ra oesini usun rese pwénútá. Áwewe chék, Dixon a oesini pwe epwe fis Aúlúngátin Maunen Fénúfan lón ewe ier 1958. Cayce a oesini pwe ewe telinimw New York epwe séénútiw leset órun 1975.

Mi wor eú alen ach sipwe silei met epwe fis lón mwachkkan nge mi wesewesen alúkúlúk? A fókkun lamot ei kapas eis. Ika ka tongeni silei ekkewe mettóch repwe fis lón mwach me mwen ar repwe fis, neman epwe kkúú manawom.