Eú Mesen Makken Ipru mi Fókkun Kúkkún A Wesewesen Alúkúlúkúkich

Sia tongeni wesen lúkú pwe meinisin án Kot kewe pwon repwe pwénútá? Jesus a lúkú ena, me minne a eáni káit a apéchékkúla lúkúen chókkewe mi aúseling ngeni. Ekieki usun ewe kapas áwewe a eáni lón an we Afalafal Wóón ewe Chuuk, a mak lón Mateus 5:18: “Enlet, ngang üpwe ürenikemi, pwe tori än läng me fanüfan repwe morola, esap wor och kükün mesen mak are och tik won eföü mesen mak epwe morola tori an epwe pwönüetä ekei mettoch meinisin.”

Ewe mesen mak lón fósun Ipru mi kúkkún seni meinisin, ina ewe mesen mak י (yod), a nóm lepoputáán ewe Tetragrammaton, iten Kot we mi pin, Jiowa.a Me lúkún ekkewe kapas me mesen mak lón án Kot Allúk, ekkewe senseen allúk me Farisi ra meefi pwe iteiten “tik,” are erierin mesen mak, ra fókkun lamot.

Weween alon Jesus we pwe epwe fen mecheres án láng me fénúfan repwe móróló lap seni án ekis chék kinikinin ewe Allúk esap pwénútá. Nge ewe Paipel a affata ngenikich pwe wesewesen láng me fénúfan repwe nónnóm tori feilfeiló chék. (Kölfel 78:69) Iwe, ena itiitin kapas Jesus a apasa, a pwáraatá pwe pwal mwo nge kinikinin tichikin ewe Allúk mi kúkkún seni meinisin epwe wesewesen pwénúetá.

Itá Kot a kan ekieki ekkewe kúkkún tichikin pwóróus? Fókkun ewer. Ekieki usun ei mettóch. Kot a ereni ekkewe chón Israel lóóm ar resap kupi chúún ewe lamen Pasofer. (Ekistos 12:46) Neman sipwe ekieki pwe ese kon lien aúchea ena. Iir mi weweiti popun ar itá resap kupi chúún ewe lam? Eli rese weweiti. Nge Jiowa Kot a silei pwe tichikin kinikinin ewe Allúk na, ina eú oesini usun ewe Messaia pwe esap fókkun kup meinisin chúún kewe lupwen a ninniiló wóón ewe iráán ninni.​—Kölfel 34:20; Johannes 19:31-33, 36.

Met sia káé seni alon Jesus na? Sia tongeni unusen lúkúlúk pwe meinisin án Jiowa kewe pwon repwe pwénútá, pwal mwo nge ekkewe kúkkún tichikin kinikinin pwóróus. Ena mesen mak mi fókkun kúkkún lón fósun Ipru a wesewesen alúkúlúkúkich!