Eü Pwäratään Lükü!
1. Ikkefa ekkewe mettoch mi aniuokkus Jises a oesini ussur?
1 Ekkewe aposel ra fokkun aüselingöch ngeni Jises lupwen a kapas ussun an we waroto me sopwoloon ei otot mi ngaü. Epwe fis ekkewe mettoch mi fokkun aniuokkus ren choweän maun, nafangaüen möngö, chechchechin fönü me samwaü watte. Mwirin, Jises a pwal apasa pwe ekkewe chon tapwelo mwirin repwe küna koput, repwe afangemä ir me ninniilo. Ekkewe soufos chofona repwe pwä me otupu chommong. Än chommong aramas tong epwe patapatelo.
2. Pwata mi fokkun amwarar pwe ewe angangen afalafal a kan fis woon unusen fönüfan?
2 Pokiten Jises a kerän fos ussun ekkewe watteen osukosuk epwe tori ekkewe aposel, eli ra fen mäirü lupwen ra rongorong än Jises kapas pwe ewe kapas allimen än Kot we Mwu epwe afalafalfeil lon unusen fönüfan. (Mt. 24:3-14) Ikenäi sia fen küna amwararen pwönüetään ena oesini mi eingeing. Inaamwo ika sia nonnom lon fansoun weires, nge ekkewe Chon Pwäratä Jiowa ra tinikken le esilefetälei ewe kapas allim. Iei mwo atun än aramas tong a patapatelo, nge ach we tong mi fen pwichikarelo seni me mwan. Inaamwo ika sia küna koput seni “unusen fonufan,” nge kich mi akkafalafal lon arapakkan eü me eü fönü.
3. Met a apöchökkülok me lon ewe repotun ach angang woon unusen fönüfan?
3 A ifa me watteen ach pöchökkületä ren ach sipwe enniwili än Chon Pwäratä Jiowa angang lon ewe ier a lo ussun mi pwälo me lon ewe repot lon pekin taropwe 3 tori 6! Ren ükükün 16 ier mi chök tettenilo, lap seni eü billion awa ra äeä lon ewe angangen afalafal me ewe angangen föralo chon käeö. Mwa met ren ena pwäratään ach lükü! Ükükün ekkewe pioneer ra lapelo woon 5.8 percent, ekkewe chon afalafal ra lapelo woon 3.1 percent, me chon käeö Paipel ra lapelo woon 4.4 percent. Chon papatais mei lapetä woon 20.1 percent lap seni lon ewe ier mwan. Mi apwapwa ach sia küna pwe arapakkan fisu milion aramas ra tuppwel le fel ngeni Jiowa ikenäi nge ena ükükün chochchoon chon afalafal esaamwo pin fis fan eü lon uruwoon aramas! Met a apöchökkülok me lon ewe repot?
4. Ikkefa ekkewe föfför mi ngaü ena mwan epwe ükütiü seni ren an epwe papatais?
4 Ikaamwo ewe repot a fokkun amwarar nge sisap mönükalo pwe ekkena nampa ra pwäralo ükükün an ekkewe aramas ännetatä ar lükü. Awewe chök ren Guillermo, ewe a määritä lon Bolivia. A uputiu lon 1935, a angang lon eü ataken coca seni an ier 9. Seni le kükkünüün, a nunu chöön ewe irä coca ren an epwe meefi kinamwe seni an angang weires. Mwirin a poputä le unupuchelo sakau me un suupwa. Atun a poputä le käeö ussun met Jiowa a mochen seni, Guillermo a wes le un suupwa me kaülo seni an unupuchelo sakau. Ewe osukosuk watte epwe angang woon, ina ren an epwe ükütiü seni an nunu chöön ewe irä ewe a fen eörenalo seni me le kükkünün. Nge ren an achocho le ikkiotek iwe a ükütiü seni ena föfför. Lupwen a ükütiü seni ekkewe föfför mi ngaü, iwe a tongeni papatais. A apasa, “Iei ua meefi limöch me ua fokkun pwapwa.”
5. Met om mochen?
5 Jiowa mi enletin pwapwaiti aramas. A mochen pwe aramas repwe aier sefäl. (2 Pit. 3:9) Iwe, epwe pwal ina ach mochen. Amwo letipach epwe amwökütükich pwe sipwe föri unusen ach tongeni le sopwelo le älisi ekkewe mi mürinnö letiper ar repwe silei me tongei Jiowa ussun chök ach tongei.