Ei Kapas Allim Usun ewe Mwu Epwe Esilefeil!
1. Pwata sia silei pwe esap wor och mettoch a tongeni aükatiw ei angangen afalafal?
1 Ese fokkun wor och mettoch epwe tongeni eppeti Jiowa le apwönüetä letipan. (Ais. 14:24) Usun itä ewe soukapwüng Kition me nöün kewe 300 sounfiu rese fokkun tongeni akkufu ekkewe 135,000 sounfiun Mitian. Nge Jiowa a ereni pwe epwe “angasala chon Israel seni lepöün chon Mitian. Ngang üa tinukela.” (Souk. 6:14) Ifa ewe angang Jiowa a äkkälisatä ikenäi? Jises a erä: “Iwe, aramas repwe afalafalafeili ewe Pworausen Manau usun ewe Mwün Kot won unusen fanüfan.” (Mt. 24:14) Ese fokkun wor emön epwe tongeni aükatiw ei angang!
2. Pwata sia tongeni lükü pwe Jiowa epwe älisi emön me emön leich lon ach angangen afalafal?
2 Jiowa A Älisi Emön me Emön Leich: Sia lükü pwe Jiowa epwe asopwöchü angangen An we mwichen Chon Pwäratä. Nge sia pwal tongeni lükülük pwe epwe älisi emön me emön leich? Lon fansoun osupwang, Paul a meefi pwe Jiowa a älisi ren nöün we, Jises. (2 Tim. 4:17) Sia tongeni lükülük pwe Jiowa epwe pwal efeiöchü pwisin ach achocho le apwönüetä letipan.—1 Jon 5:14.
3. Ineet atun Jiowa a kan älisikich?
3 A fen kükkünülo om pöchökkül le fiti afalafal ren om kewe angang? “A ngeni ekewe chon malülü pöchökül.” (Ais. 40:29-31) Ka kükküna riäfföü mwääl are koput? “Kopwe monätä woon ewe Samol mi Lapalap om weires, pwe i epwe tümwünük.” (Kölf. 55:22) Fän ekkoch ka meefi pwe ka lipwäkingaw? “Kopwe feilo, nge ngang üpwe älisuk le kapas.” (Eks. 4:11, 12) Kese kon lien fiffiti ewe angangen afalafal pokiten apwangapwang inisum? Inaamwo ika a chök kükkün om angang, Jiowa a chüen aücheani me a pwal tongeni nöünöü en le apwönüetä an angang.—1 Kor. 3:6, 9.
4. Ifa usun ach eäni lükülük woon Jiowa epwe amwökütükich?
4 Jiowa a fen “aitiela pöün, iö epwe tongeni numalong?” (Ais. 14:27) Pokiten sia lükülük pwe epwe efeiöchü ach angang, amwo sipwe tinikken me “pwora le afalafal usun ewe Samol.”—Fof. 14:3.