Üppos Le Peppeni “Mine A Let”
1. Ifa usun ewe puk Paipel A Apasa a älillisöch ngeni chon käeö?
1 A ifa me pwapwaach pwe iei a wor ewe puk Met ewe Paipel A Wesewesen Apasa? lon lap seni 200 fos, kapachelong fosun ekkewe fönüen Micronesia! Ei puk a fen älisi ekkewe chon käeö le mwittir weweiti ewe enlet me arap ngeni Jiowa.—Jem. 4:8.
2. (a) Ikkefa ekkewe osukosuk sia küna atun sia nöünöü ekkewe Paipel mi afföü ngeni fosun Chuuk? (b) Met ei lesen epwe älisikich le weweiti?
2 Iwe nge, chommong ekkewe Paipel mi afföü ngeni ekkewe fosun Micronesia, pachelong fosun Chuuk, ra nöünöü ekkoch kapas rese tipeeü ngeni met ewe popun Paipel a wesewesen apasa. Ekkena kapas ra nöünöü ra pop seni än ekkewe tipitipin lamalamen Kraist afalafal mi ösüfölüngawa Kot, usun choweän Trinitas me ngünün aramas ese tongeni mälo. Ei pworaus epwe äweweei pwata epwe siwil ekkoch kapas sia piin nönnöünöü lon nöüch kewe puk pwe epwe affata pwüngün enletin alon Paipel.
3. (a) Ikkefa ekkewe kapas rese pwüng afföür me lon ekkewe Paipelin Chuuk, iwe, pwata? (b) Ifa ewe siwil epwe fis lon nöüch kewe puk?
3 Äwewe chök, chommong tipitipin lamalamen Kraist ra afalafala pwe a wor ülümön kot lon emön, iwe, ewe “Ngunmifel” are “Ngünupin,” itä ina i ewe aülümönün kot. Ina popun, ekkewe Paipelin Chuuk ra afföüni ekkewe kapas “än Kot manaman” ngeni “Ngünüpin” are “Ngünmifel,” usun itä nge a wewe ngeni emön sise tongeni küna. Ina popun, atun sia afalafal ngeni aramas, sipwe äweweei pwe ese pwüng afföün “än Kot manaman” ngeni “Ngünüpin” are “Ngünmifel.” Ina pwata, ewe puk Paipel A Apasa me pwal nöüch kewe puk repwe nöünöü ei itiitin kapas, “Än Kot manaman mi fel” pwe epwe älisi aramas le wewefichiti ewe enlet.
4. Ikkefa pwal ekkoch osukosuk ra fis seni ach nöünöü ewe kapas “ngün” seni ekkewe Paipelin Chuuk, me ikkefa ekkoch itiitin kapas rese pwüng sisap chüen nöünöü?
4 Ese pwal pwüng nöünöün ewe kapas “ngün” lon chommong wokisin. Äwewe chök, ewe Paipelin Noomoneas a nöünöü ei itiitin fos “lon pekin ngün” le äweweei usun än emön nom fän emmwenien än Kot manaman mi fel me an ämääraatä uwaan kewe, are än emön süföliti me älleasochisi Kot me aücheani an riri ngeni I. (1 Kor. 2:14-16, TF; Kal. 5:22, 23) Ra pwal nöünöü “möngöön ngün” pwe epwe wewe ngeni än Kot kewe kapas mi akkapöchökkülakich. (1 Kor. 10:3) Sia pwal mwo nge fen nöünöü “paratis lon pekin ngün” le äweweei ekkewe feiöch nöün Jiowa kewe aramas woon fönüfan ra pwapwaiti. Iwe, sisap chüen nönnöünöü ekkena sokkun kapas pun ra pop seni mwäällin än ekkewe tipitipin lamalamen Kraist afföüni ekkena kapas.
5. Met ekkoch chon Chuuk ra lükü usun weween ewe kapas “timon,” iwe, pwata ese pwüng?
5 A pwal piitä eü osukosuk usun ewe kapas “timon.” Nöün Jiowa kewe aramas ra weweiti pwe atun ra küna ena kapas lon Paipel, a wewe ngeni ekkewe chonläng mi ü ngeni Jiowa me fel mi limelimöch. (Juta 6) Iwe nge, ekkoch chon Chuuk ra ekieki pwe ewe kapas timon a wewe ngeni ngünün ekkewe mi mälo, chokkewe mi eriäfföüü me eniuokkusu aramas. (Luk 8:29, 9:42) Iwe, ar na ekiek a ü ngeni ewe enlet seni Paipel. (SalAf. 9:5, 6) Ina popun, sisap chüen nöünöü ewe kapas “timon,” nge sipwe nöünöü ekkewe kapas “chonläng mi ngaw” are “chonläng mi ü ngeni Jiowa.”
6. Met epwe fis ngeni ewe puk Paipel A Apasa lon fosun Chuuk, iwe pwata?
6 Chon ewe mwich mi alükülük me tipatchem ra usun chök Jises lon ar üppos le peppeni “mine a let.” (Jon 18:37) Ina popun, ra akkota pwe epwe wor ekkeei ekkesiwil mi lamot lon ewe puk Paipel A Apasa pwe epwe affataöchü met ewe popun Paipel a wesewesen apasa.
7. Ifa usun sipwe nöünöü lusun kapiin ewe puk Paipel A Apasa tori an epwe war ekkewe mineföön kapi?
7 Nge ifa usun sipwe nöünöü ekkewe lusun kapiin ewe puk Paipel A Apasa? Iei sisap mwo chüen anöünöü lon ach angangen afalafal. Iwe nge, sia chüen tongeni nöünöü le äiti ngeni aramas ewe kokkotun käeö. Ika sia poputä le käkkäeö ngeni emön, eli sipwe tongeni anöünöü ngeni ena puk. Atun epwe war ena puk mi wor ekkesiwil lon, sia tongeni angei seni ekkewe chon käeö ewe minen loom me ngeniir eü minefö.
8. Ifa usun ewe puk Paipel A Apasa epwe eü minen feiöch?
8 A ifa me feiöchüch ren ewe puk Paipel A Apasa, a usun ach ‘pisekin maun mi manaman,’ pun a akkufu afalafal chofona ‘mi eppeti än aramas repwe silei Kot’ pwe aramas meinisin “repwe pwal silei ewe let.”—1 Tim. 2:4; 2 Kor. 10:4, 5.