Ka Tongeni Fiti Afalafal lon Räninfel?
1. Met sia tongeni käeö seni minne Paul me chienan kewe ra föri lon Filipai?
1 A tori ewe ränin Sapat, atun lap ngeni chon Jus lon Filipai ra asösö. Paul me chienan kewe ra chuuri chon ena telinimw lon ar säifetäl lon ar angangen misineri. Esor epwe esiiter ika ra pwal asösö seni ar angangen afalafal lon ena rän. Iwe nge, ra silei pwe ekkewe chon Jus ra chufengen lükün ewe telinimw pwe repwe iotek, iwe, ra alamota ena fansoun ren ar afalafal ngeniir. A ifa me pwapwaan Paul me chienan kewe atun Litia me unusen chon le imwan kewe ra aüseling me papataiselo! (Fofor 16:13-15) Pokiten chommong aramas ikenäi ra asösö lon Räninfel, iwe, pwata sise pwal ekis afalafal lon ena rän?
2. Ikkefa ekkewe osukosuk nöün Jiowa kewe aramas ra likiitü fan pwe repwe tongeni afalafal lon Räninfel nge esap wor eppetin?
2 Osukosuken Afalafal lon Räninfel: Lon ewe ier 1927, nöün Jiowa kewe aramas ra angei pesepes pwe repwe afalafal iteiten Räninfel. Nge a mwittir fis minen eppet. Lon Merika, chommong leir ra ares pun aramas ra tipi ngeniir pwe ra atai allükün Sapat me kinamween ewe sopw, me esor nöür license le amömö. Nge nöün Jiowa kewe aramas rese fangetä. Seni 1930, ra akkota pwe “kümiin afalafal” seni ekkewe mwichefel ünükür repwe etto älisiir le äwesaalo ekkewe leenien afalafal. Fän ekkoch, atun ekkewe chon afalafal ra ares, ewe mwu a osukosuk pwe ra kon chommong. Ka enletin aücheani än pwiich kewe likiitü fän ekkena osukosuk lon ena fansoun pwe sipwe tufichin afalafal lon Räninfel nge ese chüen wor eppetin?
3. Pwata Räninfel ina eü rän mi öch le afalafal?
3 Eü Rän mi kon Mürinnö le Afalafal: Chommong aramas ra asösö lon imwer lon Räninfel pun rese angang. Eli ekkoch mi fäffäl repwe pwapwa le foffos usun Kot lon ena rän. Ika sia mwich lon Räninfel, iwe üfach a fen fichiiti ewe angangen afalafal, iwe, pwata sise awora ekis fansoun le afalafal mwen ika mwirin ewe mwich? Kopwe uwei ekis amötum.
4. Ifa ewe pwapwa sipwe küna ika sia awora ekis fansoun le afalafal lon Räninfel?
4 Ika sia ekis afalafal lon Räninfel, epwe chüen wor ach fansoun asösö. Sipwe meefi kinamwe le asösö ika sia akkomw fiti ewe angang mi fel. (SalF. 19:23) Eli sipwe pwal mwo nge meefi pwapwaan ach chuuri emön mi usun chök Lydia!