Upwe Fiti are Usap Fiti Felin mi Má me Kókkótun Peias?
1. (a) Ifa ewe kefil mi weires neman sipwe kúna nge met sipwe akkomw ekieki? (b) Ikkefa ekkewe kapas eis sia mochen pwisin eisinikich?
1 Ach fiti felin mimáán emén esap chón Pwáraatá Jiowa, me kókkótun an peias ina eú kefil mi weires. Pokiten sia mochen pwe ach kefil epwe apwapwaai Jiowa, iwe a éch ach sipwe pwisin eisinikich: ‘Met Jiowa a mochen ai upwe féri? Ikkefa ekkewe kapasen emmwen repwe emmweniei lón ai kefil? Ifa usun upwe akkamwéchú eú mwelien letip mi múrinné me usap atai ai riri ngeni Jiowa are ngeni ekkewe ekkóch?’
2. (a) Ika eérenien eú mi má a álisatá lúkú ese pop seni Paipel, iwe epwe ifa meefiach ren ach fiti ena eéreni? (b) Etipetipaen aramas a tongeni efisi met?
2 Ekieki án Paipel Kapasen Emmwen: Eú kapasen emmwen seni Paipel mi weneiti ei mettóch, a mak lón 2 Korint 6:14-18. Iei alon Jiowa lón wokisin 17: “Oupwe towu seniir o aimwükemiila seniir. Ousap atapa och mettoch mi limengau.” Ina popun sisap fiti meinisin eérenien mi má mi riri ngeni ewe lúkú mi chofona pwe ekkewe ngúnún mi má a wor ar manaman wóón ekkewe mi manaw. Ikaamwo sia ekiekin fiti eú felin mi má me kókkótun peias ren ach sipwe chék katol, nge mi lamot ach sipwe eisini pwisin kich, ‘Ai nóm lein ekkeei aramas mi féri angangen lamalam chofona a áweiresiei ai usap fitiir?’ Ach álisatá fel chofona pwal mwo nge atun sia fiti meefien ekkewe chón letipetá, a pwári pwe sise tuppwél ngeni Jiowa Kot, nge ina eú mettóch sise fókkun mochen féri. Ika sia filatá le fiti eú felin mi má me kókkótun peias, mi lamot ach sipwe mmólnetá me mwan le tipeppós pwe sisap angolong lón meinisin met epwe asúfélúngawa Kot.
3. Met sipwe ekieki pwe site áchepeteki ekkewe ekkóch?
3 Oruuen kapasen emmwen, a mak lón 1 Korint 10:32: “Ousap manaueni eu sokun manau epwe afisätä chepetek ngeni ekewe chon Juta, ika ngeni ekewe chon lükün Israel, ika ngeni chon ewe mwichefelin Kot.” Ifa usun ika sia fiti eú eérenien mi má ese ffat ika a ngaw nge me ren ekkóch pwe a riri ngeni niwokkusiti ekkewe mi máló? Itá ach féffér epwe áchepeteki chókkewe mi silei lúkúen Chón Pwáraatá Jiowa me ach afalafal usun ekkewe mi máló? Itá ach fiti eú felin mi má me kókkótun peias ren ach sipwe chék katol, epwe áchepeteki mwelien letipen chón ewe mwichefel are chón ewe sópw? Nge itá ekkóch chón ewe sópw repwe chepetek ika sise fiti felin mimáán me kókkótun peiasen aramasach we esap Chón Pwáraatá?—Mat. 18:6; 1 Kor. 8:12, 13.
4. Pwata a fókkun lamot ach eáni eú mwelien letip mi múrinné mwen mesen Jiowa?
4 Ewe aúlúngátin kapasen emmwen, a mak lón Rom 14:22, 23, a apasa: “A feiöch ewe aramas esap mengiringir lupwen a föri och a ekieki pwe mi pwüng.” Iwe ekiekifichi met epwe fis ngeni pwisin mwelien letipom ren mwirilóón óm kefil!
5. (a) Ié epwe wisen filatá ika kopwe fiti felin mimáán emén esap Chón Pwáraatá me kókkótun peiasan? (b) Ifa usun sipwe eáni kefil mi múrinné wóón ekkena sókkun mettóch?
5 Pwisin Wisach: Mwirin án emén me emén Chón Kraist ekiekifichi fán iótek án Paipel kewe kapasen emmwen usun chék ekkewe mi mak asan, mi lamot an epwe pwisin filatá ika epwe fiti are esap fiti eú felin mi má me kókkótun peias, ese lifilifil ika epwe fis lón eú fál are lón pwisin imwen ewe mi má are ren ewe leenien peias. (Kal. 6:5) Emén me emén Chón Kraist a wor wisan le ekiekifichi ena me epwe etiwa ese lifilifil met epwe fis mwirin an kefil. (Rom 14:12) Án aramas kewe eéreni ra tongeni eppetikich me aosukosukakich. Iwe nge eú mwelien letip mi káit me ren án Kot kapas epwe álisikich le eáni kefil mi múrinné.—Kölf. 119:105.