Lillipwákéchúló Usun Emén Chón Afalafal
1. Ikkefa ekkóch leenien áppirú lón fansoun ekkewe aposel ra pwáraatá pwe sipwe lipwákéchúló usun emén chón afalafal?
1 Chón Kraist repwe lipwákéchúló usun emén chón afalafal. Ina popun Jesus a ngeni néún kewe chón áppirú káit epwe álisiir le feffeitá lón ar tufichin afalafal. (Luk. 9:1-5; 10:1-11) Ina pwal ewe popun Akwila me Prisila ra uwealó Apollos lón imwer me “awewefichi ngeni ewe Alen ach Samol.” (Föf. 18:24-26) Pwal ina chék ewe popun, Paulus a pesei ewe chón afalafal mi lipwákéch Timoty pwe epwe sópweló le pwisin apwénúetá an kewe asukul pwe “aramas meinisin repwe küna” an feffeitá. (1 Tim. 4:13-15) Ese lifilifil ifa ttamen ach akkangang fán iten ewe Samol usun chón afalafala ewe pwóróus allim, nge a lamot sipwe lillipwákéchúló lón ach tufichin afalafal.
2. Ifa usun sia tongeni káé seni ekkewe ekkóch?
2 Káé Seni Ekkewe Ekkóch: Eú alen feffeitáách lón tufichich, ina ach sipwe káé seni ekkewe ekkóch. (SalF. 27:17) Ina popun, kosap túmúnúngaw atun ekkewe chón afalafal ra afalafal. Tingor álillis mi tichik seni iir kewe mi lipwákéch, iwe aúselingéch met ra apasa. (SalF. 1:5) Kese meefi núkúnúkéch ren ifa usun kopwe liwiniti ekkewe mi mochen aúseling, poputááni káé Paipel are féri ekkewe pwal ekkóch napanapen afalafal? Iwe, kopwe akkomw mwékút le tingorei ewe chónemmweni óm we kúmiin afalafal are emén chón afalafal mi lipwákéch ren eú káit. Kopwe pwal chechchemeni pwe án Jiowa we manaman mi fel epwe tongeni alapaaló ach tufich, ina popun kopwe tingor iteitan lón iótek.—Luk. 11:13.
3. Met sipwe féri ika a torikich éúréúr nge sise mmólnetá ngeni?
3 Kosap song ika a toruk kapasen éúréúr fán iten kopwe feffeitá inaamwo ika kese mmólnetá ngeni. (SalAf. 7:9) Etiwa ewe álillis fán tipetekison me kilisou usun Apollos. Óm féri ena a pwári mirit.—SalF. 12:15.
4. Ifa ewe populapen án Jesus apasa pwe sipwe lipwákéchúló usun emén chón afalafal?
4 Lipwákéchúló A Elingaaló Kot: Jesus a pesei néún kewe chón áppirú le lipwákéchúló usun emén chón afalafal ren áeáán kapas áwewe. A áwewe ngeni pwisin i efóch irá nge ekkewe palan néún kewe mi kepit. A erá pwe Seman we a limeti meinisin ekkewe palan mi uwa “pwe epwe chomongola uar.” (Joh. 15:2) Jiowa a mochen pwe sipwe lipwákéchúló lón tufichich ren uwaan “tinawach” usun chék ewe minne ká an ewe tánipiin wain a mochen pwe ekkewe palen iráán wain repwe fókkun uwaéch. (Ipru 13:15) Ifa ewe feiéch sipwe kúna atun sia lipwákéchúló usun emén chón afalafal? Jesus a pélúweni: “Iei chök mine Semei epwe küna ling ren, are oupwe uani ua mi chomong.”—Joh. 15:8.