En mi Silei?
Pwata a múrinné án Jiowa mut ngeni chón Israel ar repwe eáni asor lisom me apansúsúún lisom?
FÁN ewe Allúkún Moses, ekkewe lisom me ekkewe apansúsúún lisom ra ketiw án aramas repwe eáni asor ngeni Jiowa. Fansoun meinisin ekkewe allúk usun asor ra kan féúnippékú ekkeei ruu sókkun machchang me ika ese wor eú sókkun ra tongeni eáni asor pwal ewe eú sókkun. (Lif. 1:14; 12:8; 14:30) Met feiéchún ena? Eú popun, pún esap fansoun meinisin a kan wor lisom. Pwata?
Lisom
Ekkewe lisom mi nóm lón unusen fénúen Israel, iir ra kan chang ngeni ekkewe leeni ese kon patekkich. Iteiten October, ra chang ngeni ekkewe leeni ese patekkich mi nóm éér, nge ra liwiniti Israel atun fansoun ráás. (SalK. 2:11, 12; Jer. 8:7) Ina minne, lón Israel lóóm a weires ngeni chón Israel ar repwe eáni asor lisom atun fansoun patapat.
Apansúsúún lisom
Iwe nge, ekkewe apansúsúún lisom ra kan chék nómwotiw lón Israel iteitan. Pwal och, iir machchang mi fesir. Ei puk itelapan, Bible Plants and Animals, a erá pwe “meinisin sóópw me telinimw mi nóm lón Palestine ra fóól apansúsúún lisom. Emén me emén souimw a féri och leeni, are pwaang wóón eú etiip pwe leenien néún kewe apansúsúún lisom.”
Apansúsúún lisom lón leenian
A pwáló pwe Jiowa emén mi tong me tipemecheres ren an etiwa ekkewe machchang mi kawor ngeni chón Israel lón unusen ewe ier ar repwe eáni asor.