PWÓRÓUS LÚKÚNPÉÉN: TÚMÚNÚ NOUM KEWE SEMIRIT!
Eú Minen Efeiengaw Sam me In Meinisin Ra Lólilen Ren
Heather me Scott, iir pwúpwúlú mi fókkun tunopwapwa me chiechiéch.a Mi wor emén néúr át, úlúngát ierin mi tipachem me lúkúpéchékkúl. Ra fókkun túmúnú néúr na. Nge lón ei fénúfan ikenái ese mecheres ena wis. Pún túmúnún semirit, eú angang mi weires fiti watteen lólilen. A kon chómmóng ekkewe mettóch mi lamot ekkewe semirit repwe káé usun! Nge ewe mettóch Heather me Scott ra fókkun tipeppós wóón, ina ar repwe túmúnú néúr we seni efeiengawen án aramas repwe kirikiringaw ngeni. Pwata?
Iei alon Heather: “Semei we ese pwáraatá an tong ngeniei, i emén sou sakaw mi nisossong. A awatangawaei me kirikiringaw ngenikem me pwii kewe.”b Chómmóng sousile ra erá pwe ena sókkun féfférún kirikiringaw a tongeni ekinasa le alóllóólun leutun emén. Ina popun, sise máirú ren án Heather tipeppós le túmúnú néún we át! A pwal ina usun meefien Scott.
Chómmóng sam me in ra lólilen usun ewe mettóch kirikiringaw ngeni semirit. Neman ka pwal lólilen. Ikaamwo ese wor emén a fen kirikiringaw ngonuk me kese kúna efeiengawan usun Heather, nge ese mwáál ka fen rongorong ekkewe pwóróus mi arúké ren úkúkún chéúfetálin ena féffér mi ánioput. Wóón unusen fénúfan ekkewe sam me in mi múrinné ra rúké lupwen ra silei met a fiffis ngeni semirit lón leenier.
Sise pwal máirú ren alon emén sou káé usun féfférún kirikiringaw, a erá pwe watteen chéúlóón ewe féfférún kirikiringaw ngeni semirit “ina eú me lein ekkewe pwóróus mi fókkun elichippúng lón ach ei fansoun.” Pwúngún pwe a mmen alólilen ena pwóróus, nge met itá ina eú minen ámáirú ngenikich? Ren chókkewe mi káé ewe Paipel esap ina eú minen ámáirú ngeniir. Án Kot we kapas a áweweei pwe sia nónnóm lón ewe fansoun weires, ekkewe “ränin lesopolan” ikewe a chéchéló ie ekkewe napanap “rochongaw,” án aramas “ekieki chök püsin ir” me ar “resap eäni tong.”—2 Timoty 3:1-5; Kapasen God.
A fókkun alólilen ei osukosuk usun kirikiringaw ngeni semirit. Pwúngún pwe ekkóch sam me in ra meefi niwokkus lupwen ra ekieki úkúkún ngawen án aramas mochen kirikiringaw ngeni ekkewe semirit. Iwe nge, itá pokiten a kon watte ei osukosuk ekkewe sam me in resap tongeni túmúnú néúr kewe seni? Are mei wor ekkóch mettóch ekkewe sam me in ra tongeni féri pwe repwe túmúnúúr? Ekkewe lesen mwirin ei repwe pélúweni ekkeei kapas eis.
a Iten ekkewe aramas lón ekkeei lesen ra siwil.
b Inaamwo ika ekkeei lesen repwe pwóróus usun ekkewe mettóch aramas ra kan meefi sáw le fóffós usun, nge mi lamot epwe tichik ewe áwewe pwe epwe álisi sam me in le túmúnúéchú néúr seni ewe féfférún kirikiringaw. Kirikiringaw ngeni semirit a fis lupwen emén watte a eáni emén semirit an leenien angasangas. Fán chómmóng a kapachelong ekkewe féffér ewe Paipel a eita ngeniir lisowumwáál, are por·neiʹa, ren choweán féfférún urumwotei pisekin fán maas, féfférún lisowu, pwúlúweni leenien pinché, are lisowu ren áeáán aw. Ekkóch féfférún kirikiringaw, ra tongeni nóm lón kinikinin féfférún “angolsa” are “sokun föför mi limengau” fiti tipemmóng, ekkewe féffér mi ánioput me ren Paipel. Ikkeei ekkóch me leir, án emén ouru oupun emén kúkkún, eppii ngeni sasingin me kachitoon kapasingaw, operi an seneló, tunomich ngeni usun féfférún lisowu, me seneló ngeni.—Kalatia 5:19-21, Testament Mi Fö; Efisos 4:19.