Ewe Famili A Mwékút Ngeni Isip

JOSEF ese chúen tongeni túkúmi meefien letipan. A ereni meinisin néún kewe chón angang pwe repwe towu me lón ewe ruumw. Lupwen iir chék me pwiin kewe ra nóm, Josef a poputá le kechiw. Sia tongeni meefi úkúkún watteen rúkéén pwiin kewe, pún rese silei ika met popun an a kechiw. Iwe mwirin a apasa: ‘Ngang Josef. Semei we mi chúen manaw?’

A kon watte máirúún pwiin kewe pwe iwe rese tongeni kapas. Ra niwokkus. Nge Josef a apasa: ‘Ouse mochen oupwe kineto.’ Mwirin ar kine ngeni, a apasa: ‘Ngang pwiimi we Josef, ewe oua améméló ngeni Isip.’

Josef a sóssópwei an kapas ngeniir, nge fán kapas pwetete: ‘Ousap mengiringir pokiten ámi améméeiló ikkeei ie. Wesewesen Kot, ewe mi tiinieito ngeni Isip pwe upwe amanawa aramas. Farao a ewisa ngeniei ai upwe sou nemenemen unusen ei fénú. Ina popun, oupwe mwittir liwiniti semei we me ereni ei pwóróus. Iwe, pwal ereni pwe epwe feito me nónnóm ikkeei.’

Iwe, Josef a foropachei pwiin kewe meinisin me kissiir. Lupwen Farao a rong pwe pwiin Josef kewe ra feito, a ereni Josef: ‘Repwe wawa woken le ló angei semer we me ar kewe famili, iwe repwe liwinto ikkeei. Upwe liffang ngeniir ewe fénú mi múrinné seni meinisin lón Isip.’

Iwe, ina ewe mettóch ra féri. Ka tongeni kúna Josef lón ei lios an a souni seman we lupwen a mwékút ngeni Isip, iir me unusen an we famili.

Án Jakop we famili a fen wesewesen watteeló. Iir fengen meinisin 70, lupwen ar we ra mwékút ngeni Isip, pachelong Jakop me néún kewe me néún néún kewe. Nge mei pwal pachelong pwúlúwer kewe, eli pwal chómmóng néúr kewe chón angang. Iir meinisin ra nómwótiw Isip. Ra iteni chón Israel, pún Kot a siwili iten Jakop ngeni Israel. Ekkewe chón Israel ra wiliti eú aramas mi fókkun aúchea ngeni Kot, usun sipwap kúna me mwirin.