Hiop A Tuppwél Ngeni Kot

KA KAN tongei ei mwán mi semmwen? Itan Hiop, iwe ei fefin, pwúlúwan. En mi silei met a ereni Hiop? ‘Kopwe otteki Kot o máló.’ Sipwe ppii ika pwata neminnei a apasa ena, me pwata a kon watte án Hiop riáfféú.

Hiop, i emén mwán mi tuppwél me álleasochisi Jiowa. A nónnóm lón ewe fénú Us, ese towau seni Kanaan. Jiowa a fókkun tongei Hiop, nge mei wor emén a oput i. En mi silei ika ié ena?

I Satan ewe Tefil. Chechchemeni pwe Satan, i ewe chónláng mi ngaw, ewe mi oput Jiowa. A tongeni etipetipa Atam me Efa pwe repwe álleasolapa Jiowa, a pwal ekieki pwe epwe tongeni etipetipa aramas ese lifilifil, ar repwe pwal álleasolapa Jiowa. Nge a tongeni? Aapw. Ekieki mwo usun chómmóngun ekkewe mwán me fefin mi tuppwél sia fen káé usur. Fitemén me leir ka tongeni eiteiter?

Mwirin málóón Jakop me Josef lón Isip, Hiop, ewe emén mi kon tuppwél ngeni Jiowa seni meinisin wóón unusen fénúfan. Jiowa a mochen pwáraatá ngeni Satan pwe Satan ese tongeni etipetipa aramas meinisin, ina popun a apasa: ‘Nengeni Hiop. Nengeni úkúkún an tuppwél ngeniei.’

Nge Satan a anini ngeni: ‘Hiop a tuppwél pún ka kan efeiéchú, iwe a pwal nóm ren chómmóng mettóch mi múrinné. Nge ika ka angei seni ekkeei mettóch, epwe ottekuk.’

Ina minne Jiowa a apasa: ‘Kele angei seni ekkena mettóch. Féri ngeni Hiop mettóch mi ngaw meinisin ka mochen. Sipwap ppii ika epwe ottekiei. Nge túmúnú chék pwe kete nieló.’

Akkomw, Satan a tiinaaló ekkóch mwán pwe repwe solááni néún Hiop kewe kou me kamel, iwe repwe nieló néún kewe siip. Mwirin, a nieló néún kewe 10 alúwél me fépwúl lón eú mélúmél. Mwirin, Satan a pwal ásemmweni Hiop ren eú semmwen watte. Hiop a kúna riáfféú watte. Ina ewe popun pwúlúwen Hiop we a ereni: ‘Kopwe otteki Kot o máló.’ Nge Hiop ese féri ena mettóch. Pwal eú, úlúmén chiechi chofona ra feito ren, iwe, ra tipi ngeni pwe a féri tipis lemonomon. Nge Hiop a chék tuppwél.

Án Hiop tuppwél a fókkun apwapwaai Jiowa, iwe mwirin, a efeiéchú Hiop, usun en mi kúna lón ei lios. A apéchékkúla seni an we semmwen. Hiop a pwal néúni 10 mi átéch me liéch, iwe néún kewe kou, siip me kamel ra lapóló wóón fán ruu seni lóóm.

En mi tongeni tuppwél ngeni Jiowa fansoun meinisin usun chék Hiop? Ika kopwe ina usun, Kot epwe pwal efeiéchuk. Kopwe tongeni manaw esemuch atun fénúfan a lingéchúló usun lingéchún ewe leeni Eten lóóm.